Urtarrila 17
-
Bilboko Udalak, aurten, urtarrilaren 22tik 26ra Madrilen egingo den Fitur azokan aurkeztuko du hiriak turismo urbanoaren hiriburu gisa duen potentzial eta erakargarritasun guztia; 2024ko datuen lehen balantzea positiboa da, orain arte ikusi gabeko aukerekin, izan ere, aireko ibilbide berriak izango ditu, besteak beste, New York eta Stockholm hiriekin.
-
Bilbok Bizkaiko bisitarien ia %70 hartzen eta ostatatzen du, Euskadi bisitatzen dutenen herena, hain zuzen. Gainera, hiria 24. postuan dago probintziako hiriburuen artean, eta mila biztanleko 41 plaza eskaintzen ditu, ostatuaren presio turistiko potentzialaren arabera.
-
Kontxi Claver Bilboko Udaleko Ekonomiaren Garapeneko, Merkataritzako, Turismoko eta Enpleguko Zinegotzia, bere lantaldearekin batera, azoka horretan izango da, hiria turismo kultural eta sortzailearen lider bihurtzen duten datuekin, “tokiko ekonomia aberasten dutenak”.
Aurten Bilbok “hiriaren erakargarritasun, indargune eta trakzio-aukera zabala” aurkeztuko du Fiturren, Iberoamerikako merkatu hartzaile eta igorleentzako azoka liderra eta turismoko profesionalentzako topagunea.
Bilboko Udaleko Ekonomiaren Garapeneko, Merkataritzako, Turismoko eta Enpleguko Zinegotzia, Kontxi Claver, bere lantaldearekin batera izango da datorren astean lehen aldiz hitzordu garrantzitsu horretan, berriki sail horretako arduradun izendatua izan ostean. Bere helburua izango da hiriak turismo urbano gisa duen potentziala aurkeztea, Bilboren ardatz nagusien pean, hala nola Kultura Hiria, Jaialdiak eta Ekitaldiak, bai eta hiriaren erakargarritasunak aurkeztea ere, xarma eta historia handiko abangoardiako hiri gisa, kalitatezko turismo jasangarria helburu duena.
Hori guztia, une honetan non Bilboko jarduera turistikoak eta bidaiarien mugimenduak datu “oso positiboak” erregistratu dituen 2024. urtean (abenduko itxierako informazioa falta da), berretsiz, horrela, hiriak baduela bisitariak erakartzeko gaitasuna. Horren erakusgarri da 2024ko Bilboko jarduera turistikoa —azarora arteko datuak kontuan hartuta, eta hotel establezimenduen eskaintza bakarrik kontabilizatuta, hau da, hotelak eta apartamentuak— 2023ko aldi berean erregistratutakoa baino handiagoa dela, 1.151.075 sarrera eta 2.289.706 ostatu-gau erregistratu baitira.
Zinegotziak aurreratu duenez, “inoiz ikusi gabeko bisitari-kopuruekin itxiko dugu ekitaldia” eta horiei gehitu beharko litzaizkieke beste ostatu-eredu batzuetan erregistratutakoak eta hirian lo egiten ez duten baina turismoari lotutako jarduerak (gastronomia, kultura, biltzarrak, kirol-ekitaldiak…) dinamizatzen laguntzen duten pertsonak. Datu horiei esker, Bilbo turismo kultural eta sortzailearen liderra da, “tokiko ekonomiaren zati garrantzitsua”.
Zifren balantzea egin eta hiriaren potentzialtasuna ezagutzera emateaz gain, zinegotziak 2025eko Nazioarteko Turismo Azokan aurkeztu nahi du Bilbo “munduari irekitako ate” gisa hartzeko aukera; izan ere, aireportuak emaitza historikoak izan ditu: 6,77 milioi bidaiari baino gehiago izan ditu, eta, orain arte inoiz ikusi gabeko aireko ibilbide berriak izango ditu, hala nola Bilbo-New York linearen ozeanoz haraindiko apustua eta Europako hirietarako zuzeneko beste hegaldi batzuk.
BILBO, JAIALDIEN HIRIA
Bestalde, Udalak katalogo bat aurkeztuko du FITURen: “Bilbao City of Festivals 2025. Bizi ezazu apartekoa den hori”. Ehun plan baino gehiago biltzen ditu, oso erakargarriak izango direnak eta honako helburu hauek dituztenak: Bilbok kulturaren arloan duen lidergoa sendotzea; kultura- eta sormen-turismoari lotutako turismo-eskaintza sakontzea eta dibertsifikatzea, Europako eta distantzia luzeko merkatuei zuzendutakoa, eta sektoreko industriari eta hiriaren garapenari laguntzea.
Ildo horretatik, Bilbo helmuga paregabea dugu, non jaialdiak eta ekitaldiak hiriaren kultura- eta sormen-eskaintzaren arima diren eta proposamen erakargarriak egiten diren musikaren, artearen, zinemaren, literaturaren, dantzaren, kulturaren eta kirolaren arloan.
Bilbao BBK Live uztailean, BIME urrian, Bilbao Blues Fest ekainean, BBK Bilbao Music Legends Fest ekainean, Jazzon Fest urtearen azken hiruhilekoan, Musika-Música martxoan… Urte osoan zehar hirian egiten diren musikaren arloko mugarrietako batzuk baino ez dira. Eskaintza hori osatzen duten ekitaldi ugari ere badaude: ZINEBI, FANT, JA! Festival, BBK Mendifilm Bilbao Bizkaia, Thinking Football Film Festival, ZINEGOAK, Seriesland, BAD, Dantzaldia, Museo Guggenheim Bilbaoko eta Arte Ederren Museoko erakusketak, edo hiriaren nortasuna islatzen duten ospakizun handiak, hala nola abuztuan Aste Nagusia, Aste Santuan Bilbao Basque Fest, Gabonetan Bilbao Gabonak eta Santo Tomas Azoka.
Bilbo hiri bizi eta erakargarri gisa erakusten da argitalpenean, etengabe eraldatzen ari dena eta kirol ekitaldiak egiteko esparru ezin hobea eskaintzen duena, hala nola UEFA Europa League 2025eko Finala, San Mamesek maiatzaren 21ean hartuko duena eta Euskadin lehen aldiz jokatuko dena, iaz UEFA Women’s Champions Leagueko Finalak izandako arrakastaren ondoren; La Vuelta 2025, datorren irailaren 3an Bilbora itzuliko dena, hirian irteera eta helmuga izango duen etapa batekin, eta kirolaren arloko beste ekitaldi batzuk, besteak beste: Bilbao Jai Alai Iron Cup, BBX3 Bilbao Basket, TotalEnergies Bilbao Night Running Fest…
ZIFRA HISTORIKOAK
Datuek berresten dute hiriak ahalmen handia duela bisitariak erakartzeko, Eustatek argitaratutako azken zifren arabera, 2024ko urtarrila-azaroa aldiari erreferentzia egiten diotenak. Jarduera turistikoari dagokionez, hauexek dira Bilbok izan dituen zifrak: 1.151.075 sarrera eta 2.289.706 ostatu-gau; beraz, 2023ko aldi berean erregistratutako datuak gainditu dira. Bidaiarien sarrerak %0,1 hazi dira eta ostatu-gauek %0,5eko igoera izan dute. Zifra horiek turismo urbanoaren erreferentziazko hiriburu gisa kokatzen dute Bilbo, non apartamentu turistikoetan ostatu hartutako bidaiarien kopuruak % 24ko igoera izan baitu 2023arekin alderatuta.
Era berean, Bilbo bisitatzen duten pertsonen proportzioa orekatua da estatuko bisitarien (%48) eta atzerriko turisten (%52) artean. Azken horiei dagokienez, nabarmentzekoak dira Frantziatik, Alemaniatik, Ameriketako Estatu Batuetatik, Erresuma Batutik eta Italiatik etorritakoak. Turisten batez besteko egonaldia bi gau ingurukoa da Bilbon, eta hiriak ia 17.000 plaza eskaintzen ditu egunero hoteletan, apartamentu turistikoetan, etxebizitzetan eta logela turistikoetan; horietatik gehienak (%68) hotel-establezimenduetan eta apartamentu turistikoetan biltzen dira. Gainera, hiriak Bizkaiko bisitarien %68 baino gehiago hartzen du, baita EAEko hotel eta apartamentuetan ostatu hartzen dutenen herena ere.
Hiribilduko etxebizitza turistikoak hirian erroldatutako etxebizitza guztien %0,77 baino ez dira; Donostiaren kasuan, adibidez, zifra hori %1,56ra igotzen da. Garrantzitsua da zehaztea Bilbon ia 5.000 plaza eskaintzen dituzten 1.200 etxebizitza turistiko baino gehiagoren eskaintza ezagutzen den arren, gaur egun ez dagoela etxebizitza horien benetako okupazioaren erregistrorik.
Ostatuaren presio turistiko potentzialaren arabera, Bilbo 24. postuan dago probintziako hiriburuen artean, mila biztanleko 41 plaza eskaintzen baititu. Granada da zerrenda horren buru estatu mailan, 115 plaza baititu mila biztanleko, eta Donostiak 75 plaza baino gehiago ditu mila biztanleko.
MUNDUARI ATEAK IREKITA
Horri guztiari Bilboko aireportuaren datu historikoak ere gehitu behar zaizkio, 2024an 6.777.267 bidaiari hartu baititu, hortaz, % 7ko hazkundea izan du 2023arekin alderatuta (440.826 bidaiari gehiago). Era berean, nazioarteko zuzeneko aireko ibilbide berriak kontuan hartu behar dira, hala nola Bilbo-New York ozeanoz haraindiko ibilbidea eta Kopenhage, Stockholm, Berlin, Basilea, Palermo edo Corkerako zuzeneko hegaldiak, Bilbori ateak irekiko dizkiotenak, turismo urbanoaren erreferente gisa.
Ildo horretatik, Ameriketako Estatu Batuak, Kolonbia, Mexiko, Japonia, Hego Korea edo Singapur dira Bilbon turismo jasangarria garatzeko lehentasuna duten nazioarteko merkatuetako batzuk. Gastu-profil ona duten nazioarteko kolektiboak dira, erosketa-ahalmen handia dutenak, batez besteko egonaldi handikoak eta, gainera, urte osoan zehar bidaiatzen dutenak, hirian turismoa urtaroen arabera desestazionalizatuz, turismo orekatua eta kalitatezkoa lortzeko.
SARE SOZIALAK:
