by

  • Din dan don eta Alaken abesti ospetsuen melodiek bat egingo dute Zuhaitz Handiaren eta Argizko Tunelaren ikuskizunekin, hurrenez hurren, bihartik aurrera.

Beste bi abestik, elementu bakoitzeko bana, bat egingo dute bihartik aurrera, abenduak 5, Moyuako Zuhaitz Handian eta Casilda parkeko Argizko Tunelean egunero hiru emanalditan banatuta eskaintzen diren argi-, kolore- eta soinu-ikuskizunekin. Hain zuzen ere, horiek dira aurten urian jarritako Gabonetako argi-nobedaderik nabarmenenak. Guztira 1.500.000 led-argi baino zertxobait gehiago banatu dira uriko auzo guztietatik. Argiok urtarrilaren 6ra arte, igandea, egongo dira piztuta egunero, 18:00etatik 22:00etara.

Horiek horrela, tunelean Alaken abestia izango da entzungai egunero eskainiko diren hiru emanaldietan: 18:30ean, 19:30ean eta 20:30ean. Hator hator, It’s beginning to look a lot like Chritsmas (Michael Bublé) eta John Lennonen Happy Chritsmas abestiekin bat egingo du.

Bestalde, Moyuako Zuhaitz Handia Hator hator, El tamborilero eta Santa Claus is coming to town (Frank Sinatra) abestiekin girotu da eta, orain, gainera, Din Dan Don abestia ere entzungai izango du.

Kasu honetan, gogoratu emanaldiak arratsaldero eskainiko direla: 19:00etan, 20:00etan eta 21:00etan.

Bilboko Udalak urteak daramatza argiteria publikoan energia-efizientziaren alde egiten, bereziki, Gabonetako argiekin. Ildo horretatik, azpimarratzekoa da Udalak Gabonetan jartzen dituen argi eta apaingarri guztiak led motakoak direla.

REDES SOCIALES:

#BilbaoGabonak

by

  • Guztira, 1,5 milioi LED argik baino gehiagok apainduko dute hiria urtarrilaren 6ra arte. Egunero 18:00etatik 22:00etara.

Bilboko alkateak, Juan Mari Aburtok —udal-korporazioko zenbait kidek, merkatarien elkarteetako ordezkariek eta bilbotar ugarik lagunduta—, “botoia” sakatu zuen atzo, uriko auzo guztietan sakabanatutako 1.500.000 led argiak ia aldi berean pizteko. Argiekin uriak ongietorria eman die Gabonei eta urtarrilaren 6ra arte, igandea, egongo dira piztuta egunero, 18:00etatik 22:00etara.

Ekitaldi maitagarri hau leku berri batean egin zen: Casilda parkeko pergolan. Hain zuzen ere, bertan dago aurten Bilbok Gabonetako paisaiari gehitu dizkion bi argi- eta soinu-instalazio berrietako bat: argizko tunela.

Alkateak botoia sakatu zuenean,  tuneleko argiak piztu egin ziren eta, gainera, datozen asteotan instalazio honek eskainiko dituen argi- eta soinu-ikuskizunetako lehena miresteko aukera egon zen, honako abesti hauek entzungai izango dituena: Hator hator, It’s beginning to look a lot like Chritsmas (Michael Bublé) eta John Lennonen Happy Chritsmas.

Gaurtik aurrera, hilak 28, Casilda Iturrizar parkeko paseak 18:30ean, 19:30ean eta 20:30ean izango dira.

Aurtengo beste nobedadeetako bat Moyua plazako zuhaitz handia dugu. Hori ere, tunelak bezala, argia eta soinua izan ditu. Kasu honetan, argi- eta soinu-ikuskizunaren lehen pasea 21:00etan izan zen. Hator hator, El tamborilero eta Santa Claus is coming to town (Frank Sinatra) abestien erritmora argiztatuko da zuhaitza.

Argi- eta soinu-ikuskizunak, kasu honetan, gaur, hilak 28, hasi eta urtarrilaren 6ra arte, arratsaldero izango dira, 19:00etan, 20:00etan eta 21:00etan.

Bi instalazio horiez gain, Gabonetako irudi tradizionalak bizi-bizirik egongo dira urian: Arriaga plazako zuhaitz izugarria, Areatzako baso magikoa, Kale Nagusiko argi urdinak, Olentzero eta Mari Domingi Emakumeen plazan eta Udaletxeko apaingarriak. Urrezko Balea Handia, iaz bezala, Udaletxearen parean egongo da. Halaber, zortzi barrutietan zehar jarri dira baldosak eta Gabonetako apaingarriekin dotoretutako 57 zuhaitzak.

Gogorarazi beharra dago Bilboko Udalak urteak daramatzala argiteria publikoan energia-efizientziaren alde egiten, eta, zehazki, Gabonetako argiekin. Ildo horretatik, azpimarratzekoa da Udalak Gabonetan jartzen dituen argi eta apaingarri guztiak led motakoak direla.

SARE SOZIALAK:

#BilbaoGabonak

by

  • Juan Mari Aburto alkateak, arratsalde honetan, 20:00etatik aurrera, sakatuko du botoia, urtarrilaren 6ra arte uri osoa argiztatuko duten argiak aldi berean piztuko dituena. Guztira 1,5 milioi led-argi baino gehiago izango dira.

  • Ekitaldi zinez berezia izango da, eta Udalak parte hartzeko gonbita luzatu nahi die haurrei, familiei eta herritar guztiei.

Gaur, arratsaldeko 20:00etan, Bilboko alkateak, Juan Mari Aburtok —udal-korporazioko zenbait kidek, merkatarien elkarteetako ordezkariek eta bilbotar ugarik lagunduta—, “botoia” sakatuko du, uriko auzo guztietan sakabanatutako 1.500.000 led argiak ia aldi berean pizteko. Argiekin uriak ongietorria emango die Gabonei eta urtarrilaren 6ra arte, igandea, egongo dira piztuta egunero, 18:00etatik 22:00etara.

Udalak herritar guztiei luzatzen die ekitaldi polit honetara etortzeko gonbita, aurtengoan toki berri batean egingo dena: Casilda parkeko pergolan. Hain zuzen ere, bertan dago aurten Bilbok Gabonetako paisaiari gehitu dizkion bi argi- eta soinu-instalazio berrietako bat: argizko tunela.

Alkateak botoia sakatzean, tuneleko argiak piztu egingo dira eta, gainera, datozen asteotan instalazio honek eskainiko dituen argi- eta soinu-ikuskizunetako lehena miresteko aukera egongo da, honako abesti hauek entzungai izango dituena: Hator hator, It’s beginning to look a lot like Chritsmas (Michael Bublé) eta John Lennonen Happy Chritsmas. 20:30ean beste pase bat egongo da.

Bihartik aurrera, osteguna, hilak 28, Casilda Iturrizar parkeko paseak 18:30ean, 19:30ean eta 20:30ean izango dira.

Aurtengo beste nobedadeetako bat Moyua plazako zuhaitz handia dugu. Hori ere 20:00etan piztuko da eta, tunelak bezala, argia eta soinua izango ditu. Kasu honetan, argi- eta soinu-ikuskizunaren lehen pasea 21:00etan izango da. Hator hator, El tamborilero eta Santa Claus is coming to town (Frank Sinatra) abestien erritmora argiztatuko da zuhaitza.

Argi- eta soinu-ikuskizunak, kasu honetan, ostegunean, hilak 28, hasi eta urtarrilaren 6ra arte, arratsaldero izango dira, 19:00etan, 20:00etan eta 21:00etan.

Bi instalazio horiez gain, Gabonetako irudi tradizionalak bizi-bizirik egongo dira urian: Arriaga plazako zuhaitz izugarria, Areatzako baso magikoa, Kale Nagusiko argi urdinak, Olentzero eta Mari Domingi Emakumeen plazan eta Udaletxeko apaingarriak. Azken horretan, berriro ere, Gabonetako bola handia eta Bilboko baldosa piztuko dira. Urrezko Balea Handia, iaz bezala, Udaletxearen parean egongo da. Halaber, zortzi barrutietan zehar jarri dira baldosak eta Gabonetako apaingarriekin dotoretutako 57 zuhaitzak.

Gogorarazi beharra dago Bilboko Udalak urteak daramatzala argiteria publikoan energia-efizientziaren alde egiten, eta, zehazki, Gabonetako argiekin. Ildo horretatik, azpimarratzekoa da Udalak Gabonetan jartzen dituen argi eta apaingarri guztiak led motakoak direla.

SARE SOCIALAK:

#BilbaoGabonak

by

  • Bilboko Alkateak, Juan Mari Aburtok, Hiribilduko Gabonetako argiak piztuko ditu azaroaren 27an 20:00etan Casilda Iturrizar parketik, 70 metro baino gehiagoko luzerako argi-tunel berriaren ondotik.

  • Bihar, ostirala, azaroak 22, arratsaldeko 16:30ean irekiko dituzte Areatzan eta Erripan kokatuko diren txirrista, izotz-pista eta umeei zuzendutako Gabonetako Ametsen Faktoria karpa. Gabonetako Azoka abenduaren 5ean irekiko dute.

  • Olentzeroren eta Mari Domingiren kalejira Bilboko kaleetan ibiliko da abenduaren 23an arratsaldeko 18:00etatik aurrera, eta Ekialdeko Errege Magoen desfilea urtarrilaren 5ean izango da arratsaldeko 18:00etan.

  • #BilbaoGabonak Udalaren Gabonetako proiektuaren baitan, jarduera guztiak gaur aurkeztu dituzte Itziar Urtasun, Kontxi Claver eta Kepa Odriozola Zinegotziek.

Bilboko Udalak gaur aurkeztu du #BilbaoGabonak Gabonetako programazioa. Helburu nagusia Gabonen magia eta ilusioa hiriko txoko guztietara zabaltzea da, hain bereziak diren egun horietan. Beste urte batez, jarduera horiei esker, Bilbo aisialdi-, kultura-, eta merkataritza-erreferentea izango da Gabonetan, bai bilbotarrentzat, bai bisitarientzat.

Gaur goizean Bilboko Udalean egin duten prentsaurrekoan, Itziar Urtasunek, Berdintasun eta Jaietako Zinegotziak, hau esan du: “hilabeteak daramatzagu bete-beteko programazio bat prestatzen, guztiok disfrutatzeko jarduerekin. Adin eta gustu guztietarako aukerak egongo dira. Halaber, irrikan gaude Olentzero, Mari Domingi eta Errege Magoak ikusteko, haien kalejira eta desfile tradizionalekin. Gure asmoa Hiribildua Gabonen hiriburua izatea da, Gabonez gozatzeko aukera paregabea”.

Bestalde, Kontxi Claverrek, Ekonomiaren Garapen, Merkataritza, Turismo eta Enplegu Zinegotziak, hauxe azpimarratu du: “gure Hiribildua Gabonetako aisialdi- eta merkataritza-erreferente gisa indartzen jarraitu nahi dugu. Herritarrei gure dendetan kontsumitzeko dei egiten diegu eta, bereziki, jarduera guztiez goza dezaten eskatzen diegu. Gure asmoa da baita ere Gabonetan gure hirira datozen bisitariek jende guztiarentzat prestaturiko kalitatezko programazioaz gozatu ahal izatea”.

Kepa Odriozolak, Obra Publikoen eta Zerbitzuen Zinegotziak, bilbotar guztiei hitz egin die baita ere, eta esan die “gozatu dezatela Gabonetako argi ederrez apaindutako hiribilduaz. Argi batzuk betikoak izango dira, baina aurten ikusizko eta soinuzko bi berritasun egongo dira, eta oraintxe bertan muntatzen bukatzen ari dira; alde batetik, Moyua plazan  zuhaitz erraldoia jarriko dute eta Casilda Iturrizar parkean 70 metro baino gehiagoko luzerako tunela egongo da”.

Bilboko Gabonak iaz baino astebete lehenago hasiko dira aurten: bihar, ostirala, azaroak 22, arratsaldeko 16:30ean, txirrista eta izotz-pista sintetikoa irekiko dituzte, baita Gabonetako Ametsen Faktoria izeneko umeei zuzendutako jardueren karpa ere.

Udal-programazioko beste egun garrantzitsu bat azaroaren 27a izango da; egun horretan, Gabonetako argiak piztuko dituzte leku oso berezi batetik: hain zuzen ere, Casilda Iturrizar parketik. Bertan, 70 metroko luzera gaindituko duen argiz eta musikaz girotutako tunel handi bat instalatzen ari dira. Juan Mari Aburto Alkateak pultsadorea zapalduko du 20:00etan, eta, orduan, beste leku enblematiko batzuen artean, aipatutako tunela, Areatzako urrezko baso magikoa, udaletxea, Alde Zaharreko eta Kale Nagusiko argiak eta hiri osoko auzoetan sakabanatutako 1.500.000 led argiak piztuko dira. Guztien artean, kolorea eta berotasuna emango diete egun hain bereziei. Une horretan piztuko da baita ere aurtengo berritasunetako bat; Moyua plazako zuhaitza handi bat.

IZOTZ-PISTA ETA PATINATZEKO TXIRRISTA

Areatzan patinatzeko izotz-pista sintetikoa egongo da eta, berriro ere, 800 metro karratuko azalera izango du. Egiaz, estatuko horrelako izotz-pista handienetakoa da. Azalera osoaren % 60 estalita egongo denez, izotz-pista hiriko hainbat lekutatik askoz ere nabariagoa izango da. Bihar, azaroaren 22an, irekiko dute 16:30ean eta 2025eko urtarrilaren 6an itxiko da. Ordutegia hau izango da: 11:00etatik 14:00etara eta 16:30etik 20:30era lanegunetan eta 11:00etatik 14:00etara eta 16:00etatik 21:00etara asteburuetan, jaiegunetan eta eskolako Gabonetako opor-egunetan. Salbuespen modura, abenduaren 24an eta 31n 11:00etatik 14:00etara egongo da irekita eta abenduaren 25ean eta urtarrilaren 1ean 17:00etatik 21:00etara.

Izotz-pistako prezioak hauek izango dira: 4 euro 30 minutuz patinatzeko (patinak barne) eta 3 euro 30 minutuz patinatzeko familia ugarientzat. Jarduera hori publiko osoari zuzenduta dago (3 urtetik gorakoak), baina 3 eta 7 urte bitarteko umeekin beti egon beharko da heldu bat eta bere sarrera erosi beharko du.

Izotz sintetikodun txirristak sei errei izango ditu eta bihar irekiko da baita ere, azaroaren 22an, 16:30ean, eta 2025eko urtarrilaren 6ra arte egongo da irekita. Izotz-pistaren ordutegi berberak izango ditu eta Erripan egongo da. 3 euroko prezioan lau aldiz jaisteko aukera egongo da. Kasu honetan, 2 urtetik gorako guztiei zuzenduta egongo da. Doakoa izango da 2-3 urteko umeentzat, eta bere sarrera erosi beharko duen heldu batekin joan beharko dira.

Jarduera bietarako taldeko erreserbak (20 pertsona edo gehiago) egiteko aukera egongo da. Horretarako, mezu bat bidali beharko da helbide elektroniko honetara: reservasgabonak@proasur.com.

Bi jardueretarako sarrerak erosi ahalko dira leihatilan bihartik aurrera (leihatila instalazioak itxi baino ordu erdi aurretik itxiko dute) edo webgune honetan: https://www.bilbaopistadehielo.com/eu/. Zalantzak 670 347 556 telefono-zenbakian argitu ahalko dira.

UMEEN JARDUERETARAKO KARPA

Erripan, aurten ere Gabonetako Ametsen Faktoria umeei zuzendutako espazioa egongo da: 450 metro karratuko karpa batean 12 urtera arteko umeentzat jarduerak eta ikuskizunak egongo dira. Bihar arratsaldetik, azaroaren 22tik, urtarrilaren 5era arte irekita egongo da, astelehenetik ostiralera, 16:00etatik 20:30era eta asteburuetan eta jaiegunetan, 11:00etatik 14:00etara eta 16:30etik 20:30era. Abenduaren 24an eta 31n eta urtarrilaren 5ean goizez irekiko dute, 11:00etatik 14:00etara. Abenduaren 25ean eta urtarrilaren 1ean eta 6an itxita egongo da.

Umeen karpa doakoa izango da, baina webgunean edo aurrez aurre karpan bertan izena eman beharko da, jarduera bakoitzaren edukiera bete arte. Esteka honetan izena eman daiteke: https://www.eventbrite.es/o/bilboko-udala-ayuntamiento-de-bilbao-35384619543

Espazio horretan bi zona egongo dira, adinaren arabera bereizita: 3 eta 6 urte arteko umeentzat Baso Magikoa izeneko ludoteka antolatuko da. Bertan, tailerrak egingo dira eta Olentzerori edo Errege Magoei eskutitzak bidaltzeko postontziak ere jarriko dira. Bestalde, 6 eta 12 urte arteko umeentzat Ganbara espazioa sortuko da eta, bertan, bitxikeriak, ipuinak, altzarien labirintoa, sormen-espazioa, ipuin-kontalariak, argazki-erakusketak eta abar egongo dira.

26 ETXETXO GABONETAKO AZOKAN

Gabonetako Azoka Erripan egongo da aurten ere. Edizio honetan 26 etxetxo egongo dira, hau da, 2023an baino 5 gehiago, eta guztietan salduko dituzte Gabonetako produktu tipikoak.

Abenduaren 5etik urtarrilaren 5era irekita egongo da, 11:30etik 14:30era eta 16:30etik 21:00etara, baina abenduaren 25ean eta urtarrilaren 1ean itxita egongo da.

Saltoki hauek etxetxo bana izango dute aurtengo Gabonetako Azokan (26 izango dira guztira): Princess Courts, Xaboi, Arce Tocados Bilbao, Revoluciona Taller de Cuero, Insphyria, Bilbo Dulce Salado, El Gallo de Oro, Vintique, Lakarola Kintana, Bazar Rif, Delitxia, Kiliken Euritakoak, La Tallerteka, Ositos con Alcohol, Libera, Magora Bakery, Flores para Venus, Kai Denda, Licores Lujo, Tu Bola de Navidad, Fefa, Estudio 14, Ker Fatou, Polvorones Solokoetxe, Bizkorna eta Accesorios Oli.

Eskaintza komertzialaren osagarri, Gabonart artisautza azoka izango dugu berriro. Azoka abenduaren 13an irekiko da, 11:00etan, eta hamabigarren edizioa Bilbon izango da 2025eko urtarrilaren 5era arte.

GABONETAKO ARGIAK

Asteazkenean, azaroaren 27an, arratsaldeko 20:00etan, Casilda Iturrizar parketik ofizialki piztuko dituzte Gabonetako argiak, eta ostegunetik aurrera (azaroak 28) urtarrilaren 6ra arte egunero, 18:00etatik 22:00etara, 1.500.000 led argik baino gehiagok hiria argiztatuko dute.

Gabonetako irudi tradizionalak bizi-bizirik egongo dira hirian; Arriaga plazako zuhaitz izugarria, Areatzako baso magikoa, Kale Nagusiko argi urdinak, Olentzero eta Mari Domingi Emakumeen plazan eta udaletxeko apaingarriak. Azken horretan, berriro ere, Gabonetako bola handia eta Bilboko baldosa piztuko dira. Urrezko Balea Handia, iaz bezala, Udaletxearen parean egongo da, Uribitarte kaian.

Aurten, aurrekoez gain, bi instalazio berri eta ikusgarri egongo dira —jabetzan eskuratu direnak 430.000 eurotan—, zehazki, Moyua plazan eta Casilda Iturrizar parkean. Udal-langileek egunak daramatzate biak instalatzen. Argia eta soinua konbinatuko dituzte eta hiriko Gabonetako ikusizko eta soinuzko paisaian beste elementu erakargarri bat izango dira:

  • Moyua plazan zuhaitz ikaragarri handi bat egongo da. Horretarako, plataforma batekin iturria estali dute eta bere gainean egongo da zuhaitza.
  • Casilda Iturrizar parkean 70 metroko luzera gaindituko duen argiz betetako tunel handi bat instalatzen ari dira.

Kasu bietan ere, egiturek argia izateaz gain, soinua ere izango dute. Hala, elementu bakoitzak hiru abesti izango ditu eta argi-proiekzioekin sinkronia ezin hobean entzungo dira. Sei pase egongo dira (hiru Moyua plazan eta hiru Casilda Iturrizar parkean), ordutegi txandakatuan.

  • Moyuako Zuhaitz Handian Hator hator, El tamborilero eta Santa Claus is coming to town (Frank Sinatra) abestiak entzungo dira. Paseak arratsaldero izango dira, 19:00etan, 20:00etan eta 21:00etan.
  • Bere aldetik, Casilda Iturrizar parkeko tunelean Hator hator eta It’s beginning to look a lot like Christmas (Michael Buble) eta John Lennonen Happy Chritsmas abestiak entzungo dira. Kasu horretan, paseak 18:30ean, 19:30ean eta 20:30ean izango dira.

Berritasun horietaz gain, iaz bezala, hiri osoan zehar baldosa argiztatuak jarriko dira. Barruti bakoitzean bana egongo da, leku hauetan:

  • 1. barrutia: Eugenio Olabarrieta plazan, Zorrotzaurren.
  • 2. barrutia: Arabella auzoan, makina bio-osasungarrien ondoan.
  • 3. barrutia: Garai lorategietan, Txurdinagan.
  • 4. barrutia: Basarrate zelaian, Santutxun.
  • 5. barrutia: Ibaizabal zelaian, La Peñan.
  • 6. barrutia: Ercilla kalean, Indautxun.
  • 7. barrutia: Camilo Villabaso eta Diaz Enparantza kaleen elkargunean, Errekalden.
  • 8. barrutia: Azoka plazan, Zorrotzan.

Halaber, eta hurrengo asteetako bisitariei ongietorria emateko, hiriko sarrera nagusietan (Juan de Garai kalea, Sabino Arana etorbidea, Zumalakarregi etorbidea, Miribillako sarrera Mirafloresen, Kastrexana eta Zorrotza) sei kartel jarri dira, “Zorionak” hitzarekin eta Bilboko “B”aren ikurrarekin.

Bilboko Udalak urteak daramatza argiteria publikoan energia-efizientziaren alde egiten, eta, zehazki, Gabonetako argiekin. Aurrekoarekin lotuta, Udalak Gabonetan hirian jartzen dituen argi eta apaindura guztiak led motakoak dira.

Bukatzeko, guztira 57 Gabonetako zuhaitz egongo dira barrutietan, Moyua plazakoa barne. Horietatik 28 artifizialak izango dira eta gainerakoak naturalak. Azken horiek, urte osoan zehar beren espazio naturalean egoten dira eta egun hauetarako apaintzen dira bereziki.

GABONETAKO IZAR MAGIKOAK

Hilabete pasatxoan Olentzero, Mari Domingi eta Errege Magoak Bilboko kaleetan zehar ibiliko dira berriro ere ilusioa banatzen. Lehenengo biak abenduaren 23ko arratsaldean, eta azkenak urtarrilaren 5ean, hurrenez hurren.

Gabon Egunaren bezperan, astelehenean, abenduaren 23an, arratsaldeko 18:00etatik aurrera, Olentzerok, Mari Domingik eta Galtzagorriek kalejira magikoa egingo dute Moyua plazatik Arriaga plazaraino.

Lehendabizi, Carlton Hoteletik jendea agurtuko dute eta bukatzeko, Arriaga plazan musika-ikuskizuna egongo da. Gau horretan, Olentzerok eta Mari Domingik Arriagan lo egingo dute eta, astearte goizean, abenduaren 24an, umeekin egongo dira berriro ere. Pertsonaiak aurrez aurre ezagutzeko eta eskariak egiteko, familiek tiketak erreserbatu beharko dituzte webgunean abenduaren 20an.

Bestalde, urtarrilaren 5ean, Ekialdeko Errege Magoak, Meltxor, Gaspar eta Baltasar, umeekin eta familiekin egongo dira arratsaldeko 18:00etan hasiko den desfilean. Argiz, soinuz eta kolorez betetako karrozak Kale Nagusitik ibiliko dira, eta Udaletxeko balkoira iristean bertaratutako guztiak agurtuko dituzte. Aurten, Errege Magoekin hitzordua urtarrilaren 5ean izango da goizez Udaletxean, eta Olentzerorekin bezala, tiketak webgunean erreserbatu ahalko dira urtarrilaren 2an.

OSTALARITZAKO ORDUTEGIAK ZABALDUKO DIRA

Bilboko Udalak, Gabonak direla-eta, ostalaritza-lokalen itxiera-ordutegia luzatuko du eta bi ordu beranduago itxi ahalko dituzte. Erabaki hori hartu dute Bizkaiko Ostalarien Elkarteak eskaera egin zuelako, hirian ekitaldi eta jai handiak antolatzen direnerako.

Gabonen aurretik ere ordutegi hori aplikatuko da; hala, ostalaritza-establezimenduek beranduago itxi ahalko dute egun hauetan: azaroak 30, abenduak 5, 6, 7, 12, 13, 14, 19, 20, 21, 26, 27, 28 eta 31, eta urtarrilak 2, 3, 4 eta 5.

Ordutegi hori ostalaritza-lokal guztietan aplikatu ahalko dute, “eguneko” establezimenduek, establezimendu “osagarriek” eta terrazek ez ezik; horiek, egungo ordutegia mantenduko dute. Ez da ordutegia luzatuko ezta ere establezimenduetako kanpoaldean kontsumitzeko.

MERKATARIEN ELKARTEEI LAGUNTZEA

Hiriko merkataritzari laguntzeko eta Gabonetako kanpainak indartzeko, beste behin ere, Bilboko Udalak  merkatarien 13 elkarteri  argietarako dirulaguntzak eman dizkie. Ekimen horrekin hiria argiz bete nahi da eta hiriko leku gehiago argiztatu nahi dira. Hauek dira dirulaguntzak jaso dituzten erakundeak: Bilbo Hiriguneko merkatarien elkarteak, Deustu Bizirikek, Alde Zaharreko merkatarien elkarteak, Hiru Auzok, Rekalde Bihotzeanek, Distrito 2- Auzoa Berritzenek, Santutxuk, Otxarkoagak, Basurtu-Basurtu Berrik, Txurdinagak, Abusu-La Peñak, Iralabarrik eta San Frantziskoko, Bilbo Zaharreko eta Zabalako merkatarien eta enpresen elkarteak.

KULTURA PROTAGONISTA IZANGO DA BILBOKO GABONETAN

Gabonetan, Bilbo eta Bilboko auzoak genero guztietako kultura-jarduerez beteko dira, publiko eta gustu guztientzako aproposak izango direnak. Udalak eta tokiko eragileek KULTUR GABONAK programa diseinatu dute. Punta-puntako sormen-ikuskizunak eskainiko dituzte, dibertsioz beteak.

Azaro bukaeratik urtarril hasierara arte, bilbotarrek eta bisitari guztiek antzerkiaz, clownez, bakarrizketez, magiaz, txotxongiloez, ipuin-kontalariez, musikaz, dantzez, bertsoez eta tradizioa eta hiriko kultura-nortasuna aberastuko dituzten beste hainbeste ekimenez gozatu ahal izango dute.

  • ANTZERKIA, CLOWNAK, IPUIN-KONTALARIAK, MAGIA, BAKARRIZKETAK…

Abendura arte luzatuko den Bilboko Zirkuitua programaz gain, gazteei, helduei, familiei eta haurrei zuzendutako askotariko ikuskizunak ere antolatuko dira. Halaber, Bilboko auzoek protagonismo berezia izango dute. Izan ere, jarduerak Basurtuko, Otxarkoagako, Santutxuko, Begoñako, Castañoseko, San Inazio-Ibarrekolandako, Altamirako, Solokoetxeko, Errekaldeko, San Frantziskoko, Abandoko, Uretamendiko, Masustegiko eta Olabeagako gizarte-etxeetan, San Ignazioko Levante plazan, Zorrotzako pilotalekuan eta Abusu-La Peñako kaleetan antolatuko dituzte.

Antzerki-proposamenen artean daude “La ratonera”, Itxartu Antzerki Taldearena; “Alguien voló sobre el nido del cuco”, Nueve Teatro konpainiarena; antzerki laburrak, besteak beste, “Monólogos de dos”, “Corsarios” eta “Un ratito”; “Alas de hierro”, Kalamua Antzerki Taldearenak; “Una bofetada no es nada” Patxi Pérez eta Belén Cruzena; “Reza”, Cía. Edición Limitadarena; “Billie”, La Pacheca Colectivena; “El público”, Amaira Teatrorena; “Entre flores”,La Burla Teatrorena eta “Calla y come”, La cocinarena.

Gazteentzat eta helduentzat inprobisazioak egongo dira Mitxel Santamarinarenakin, Leire Orberekin eta Josu Anguloren “Inpro_Komeryak” ikuskizunarekin, eta bakarrizketak egingo dituzte Garazi San Martínek “Corazón porque rima con melón” ikuskizunarekin, Axlor Riezuk “Tengo FOMOrekin”, Gurutze Beitiak “Yo y mis circunstancias” ikuskizunarekin eta Óscar Terolek “El humor de Óscar Terolekin”. Gainera, proposamen horiekin batera, Heyoka Clownek “Lo que me sale de la concha” ikuskizuna emango du.

Gabonetan magia-ikuskizunak ere egongo dira: Oliver Magoak “Los inventores” ikuskizuna aurkeztuko du, Magi & Ilusioakek “Azterketa magia”, Edu Magoak “Zu zara magoa”, Liuba Magoak “Denok dugu magia” eta Eva Magoak “Mugarik gabeko magia”.

Familiei zuzendutako ikuskizunen artean, azpimarratzekoak dira zirkua, Two Much Circusen “Double Billekin”; clown-antzerkia, Ana Apikaren “Paperezko Zirkuarekin”, Arrieraren paperezko antzerkia “Café cantante AMARGURA” ikuskizunarekin, “Trapos”, Coriolis Teatroren txotxongiloen-objektuen antzerkia, Zirkozaurreren “Olentzero” zirku-kalejira, Bego Alabazanen “Gutixago gehiago da” ikuskizuna; eta “Batetik Bestera: Kontzertua” Benetan Berenmusika- eta antzerki-ikuskizuna, Pantzart Teatroren “Korri, kuru, korriko” txotxongiloak, Firulette Antzerkiaren “Etxe sorginduaren misterioa” eta Monda & Lirondaren “Desioak” clown-ikuskizuna. Horrekin bukatuko da KULTUR GABONAK programazioa.

Abenduaren 17an, 19:00etan, Argazkineta show ikuskizun parte-hartzailea izango da Uretamendin (Masustegi, Altamira), “Tras recolectar, es hora de contar” izenburuarekin. Gazteei eta helduei zuzenduta egongo da. Ekitaldi hori Bilboko Udalaren Bilbao Izan programaren barnean egongo da.

  • EUSKAL FOLKLOREA, GURE NORTASUN-IKURRA

Euskal folkloreak espazio berezia du udalak urtean zehar antolatzen duen kultura-programazioan eta, hala, hiribilduko kultura-nortasunaren zati gisa aldarrikatzen da.

Aurten, KULTUR GABONAK programak dantza-ikuskizunak antolatuko ditu talde hauekin: Bihotz Alai Dantza Taldeak kalejira bat egingo du Zabala auzoan eta Irutasun Dantzari Taldeak, aldiz, Altamira auzoan.

Bertsoak ere protagonista izango dira urte bukaeran. Miren Amurizak, Aissa Intxaustik eta Maite Sarasolak bertso-saioa eskainiko dute Deustuko udal-zentroan. Aurkezlea Idoia Anzorandia izango da eta Aner Euzkitze eta Libe Goenaga Arrieta musikariak bertan izango dira.

  • MOTA GUZTIETAKO MUSIKA

Gabonetako abesbatzen kontzertuak urte bukaerako programazioaren ezinbesteko parte dira bilbotarrentzat zein bisitarientzat. Aurten, Atxuriko, San Ignazioko, Castañoseko, Iralako, San Frantziskoko, Basurtuko, Zorrotzako, Otxarkoagako, Indautxuko, Errekaldeko, Abusu-La Peñako, Zabalako, Santutxuko, Olabeagako, Txurdinagako, Altamirako eta Abandoko elizetan ikuskizunak emango dituzte Ars Canticum Ensemblek, Garaizarko Matsorriak taldeak, Lagundi Bizkaiko Esperientzia Ikasgeletako abesbatzak, Bilbao Kameratak, Club Deportivo Bilbao abesbatzak, Mikel Deuna abesbatzak, Pagasarri Abesbatza Elkarteak, Arraizpe Agrupación Coral abesbatzak, Agrupación Coral Otxarkoaga abesbatzak, Otxote Bilbo Argiakek, Asociación Coral Rossini de Bilbao abesbatzak, Begoñako Sustraiak abesbatzak, Andre Berri abesbatzak, Gaudeamusek, Inmakuladako Abeslariak taldeak, Orfeón San Antón taldeak, Bilbao Musikako gazteen abesbatzak, Ingeniarien abesbatzak, Emays abesbatzak, San Inazio abesbatzak, Jakorkik, Otxote Lur Maiteak, Sanfran Kourek, Deustoarrak abesbatzak eta Ars Vivak

Musika-ekitaldiekin bukatzeko, Antonio Forcione & Giorgio Sercik “Guitar duo” ikuskizuna emango dute, Cristina Nareak “Viento Sur”, Bilboko Udal Txistulari Bandak, Gorka Aginagak eta abesbatzako kide batek “Elur malutak”, Ispirit: Lidia Insausti, Lide Hernando eta Noa Egiguenek “Rivers of Babylon”, eta, bukatzeko, Iren Uka & Space Jam Rockek eta Trikilekuk trikitixa-kalejira.

  • BIDEBARRIETAKO KULTURGUNEA: LITERATURA, BERTSOAK ETA KONTZERTUA

Gabonak garai egokia dira baita ere literaturari arreta jartzeko. Horretarako, Bidebarrieta Kulturguneak programazio oparoa prestatu du Bidebarrietako liburutegian.

Egiaz, “Eztabaidak literaturarekin” eta “Gaurkotasunarekin topaketak” programek jarraitu egingo dute, hurrenez hurren, abenduaren 10ean eta 17an. Halaber, liburu-aurkezpen hauek egingo dira: María Jesus Cavaren eta Elena Ciordiaren “Bilbao y la arquitectura urbana. Recorriendo la villa”; José Fernándezek, Lorenzo Olivánek eta Beñat Arguinzonizek Blas de Oteroren “Ángel fieramente humanoren” edizio berria aurkeztuko dute; Luis Zuecok “El mapa de un mundo nuevo” izeneko bere lana aurkeztuko du; Kirmen Uribek “En mis sueños siempre tienes 20 años” lana aurkeztuko du errezitaldi batean; eta Dolores Redondo idazleak literatura-aurkezpenen zikloa itxiko du “Las que no duermen” bere azken eleberriarekin.

Bertsolaritza eta zientzia uztartuko dira Bidebarrietako liburutegian abenduaren 4an, asteazkenean, Bertsozientzia ekitaldian, zehazki, “Jakinduriek mundue erreko dau” izenburupean. Halaber, ‘Bidebarrieta Zientifikoa’ zikloan teknologia kuantikoa landuko dute abenduaren 19an.

Ostiralean, abenduaren 20an, Bidebarrietako Kulturgunean musika-kontzertu bat antolatuko dute gazteentzat zein helduentzat.

HIRIBILDUKO BESTE KULTURA-ESPAZIO BATZUK

  • ARRIAGA ANTZOKIA

Arriagan Gabonak musikatuak izango dira, musikalen generoaren historiako ikuskizunik garrantzitsuenetako batekin; produkzioa izugarria da. Arriaga Antzokiak 2024ari amaiera bikaina emango dio Broadwayko “Chicago” ikuskizun bikainarekin. Ikuskizun hori karteldegian egongo da abenduaren 5etik 29ra eta, beraz, Bilboko Gabonetarako ikuskizun erakargarri eta ezin hobea izango da.

2025 hastean, urtarrilaren 3tik 5era, Arriaga antzokiak ABAO Txiki Arriagan familiei zuzendutako programa aurkeztuko du berriro ere. ABAOk eta Arriaga Antzokiak berak antolatuko dute: D´Artagnan eta mosketari gazteak  Ikuskizuna honela hasten da: D’Artagnan fidelari laguntza eskatzen dio Austriako Anak, bere lagunak berriro ere batu eta azkenaren semea non dagoen deskubritu dezaten. Baina hortik aurrera, misioak familiarekin batera gozatzeko sorpresa asko eskainiko dizkigu. Abentura oso dibertigarria da eta musikarik onena du.

  • BILBAO MUSIKA

Bere aldetik, Bilbao Musikak Gabonetako kutsu handia duen programazioa prestatu du urtea bukatzeko. Bilboko Txistularien udal-bandak Gabonetako kontzertuak “Elur Malutak” ikuskizunarekin hasiko ditu, Gorka Zabaletaren zuzendaritzapean. Bi saio egongo dira: abenduaren 14an 19:00etan San Adriango elizan eta abenduaren 18an 19:00etan Campos Eliseos Antzokian.

Abenduaren 16an, 19:00etan, Campos Eliseos Antzokian, Udal Musika Eskolako taldeek Gabonetako kontzertua eskainiko dute, eta abenduaren 22an, Bilboko Udal Bandak “Un grito por la paz” ikuskizuna aurkeztuko du José Rafael Pascual Vilaplanaren zuzendaritzapean. Kontzertua Euskalduna Jauregiko Auditoriumean izango da eguerdiko 12:00etan eta Carmen Climent aktoreak, Marina Penas aktore eta abeslariak, José Manuel Díaz baritonoak, Pedro Pomares eta Sergi Albert aktore eta abeslariek eta Sociedad Coral de Bilbao abesbatzak parte hartuko dute. Zuzendaria Enrique Azurza izango da.

Halaber, Bilbao Musikak hurrengo hilabetetarako hainbat kontzertu programatu ditu. Lehenengoa abenduaren 1ean izango da Bilboko Udal Bandarekin. “Gora musika!” deitzen da, eta horren ondoren, konbo-kontzertuak, kontzertu lirikoak, kantu modernokoak, entzunaldi sinfonikoak, akordeoi-kontzertu bat, Jam Session bat, Bilbao Musika Eskolako eta Juan Crisostomo de Arriagako kontserbatorioko ikasleek emango duten akordeoi-kontzertua eta Bilbao Musikako Musika eta Dantza Tradizionaleko Sailak eskainiko duen erromeria ere egongo dira.

  • BILBAO ARTE

Arte garaikideenak ere badu bere lekua Bilboko Gabonetan. Hala, Udalaren URIBITARTE40 erakusketa-aretoan, azaroaren 22tik aurrera “Nadie puede compartir el sabor de la menta”, erakusketa egongo da. Komisarioak Lorenzo Galgó eta Iñigo Villafranca Apesteguía izango dira eta Maider Aldasoro, Miguel Alejos, Gorka Eizagirre, Usoa Fullaondo, José Jurado, Martí Madaula, Sofía Montenegro, Milena Rossgnoli eta Ander Pérez Puelles artisten piezak egongo dira ikusgai.

Erakusketa 2025eko martxoaren 2ra arte bisitatu ahal izango da, asteartetik larunbatera, 11:00etatik 14:00etara eta 16:00etatik 20:00etara, eta igande eta jaiegunetan 11:00etatik 14:00etara. Gainera, abenduaren 4an (euskaraz) eta abenduaren 18an (gaztelaniaz) bisita gidatuak antolatu dira. Sarrera dohainik izango da, edukiera bete arte.

  • BILBAO BIZKAIA MUSEOAK

Bilboko Berreginen Museoak umeei zuzendutako (6-10 urte) Gabonetako tailerrak antolatu ditu. Abenduaren 26an eta 27an izango dira 10:00etatik 13:30era museoan bertan.

Tailerretako protagonista Ama Lurra izango da, eta bestelako bitxikerien artean, umeek bere askotariko izenak eta istorioetako batzuk ezagutu ahalko dituzte. Hala, umeek beren sormena lantzeko aukera paregabea izango dute, naturako materialak erabiliko dituzte eta sortutakoak etxera eramateko aukera ere izango dute. Gozatzeko eta ikasteko Gabon egunak.

  • AZKUNA ZENTROA

Azkuna Zentroa – Alhóndiga Bilbaon egun hauetarako antolatu duten kultura-programazioa ikusmen-arteen ingurukoa izango da. “KLIMA”  erakusketak  Allora & Calzadilla bikote artistikoaren pieza esanguratsuenak bilduko ditu eta bertan egongo dira baita ere “Ninguna noche en llamas”, Abel Jaramillorena  (Babestu programako egoiliarra) eta Elena Aitzkoaren “Ur aitzak” eskultura-proiektua (Azkuna Zentroari atxikitako artista).

Mediateka Galerian, Leticia Paschetta artistak eta arkitektoak “BRUMA. Jugar en paisajes brumosos” izeneko instalazioa sortu du. “Paisaia ludikoak” dira   eta esperientzia espazialek artea, diseinua eta egiturazko berrikuntza uztartzen dituzte.

Instalazio hori umeei eta familiei zuzendutako Mediateka Gabonetan 2024-2025 programaren bidez hedatzen da. Jarduerak abenduaren 26tik urtarrilaren 4ra izango dira eta material eta arte-mintzaira ezberdinekin esperimentatuz, sorkuntza garaikidera hurbilduko dira parte-hartzaileak.

GAZTERIA, KIROLA ETA EUSKARA

Bilboko Udalak 2.600 plaza baino gehiago eskaini ditu eta horien bitartez, Gabonetako udal-programak antolatuko dira, besteak beste, umeen eta helduen aisialdian, kirolean eta euskaran. Kasu guztietan ere, helburu bikoitza betetzen da: Bilboko familien lan-kontziliazioan laguntzea eta umeek jolasten gozatzea oporretan daudenean.

Aurten, Gabongune eta Gabonkide programetan 777 plaza eskainiko dira bi txandatan:  abenduaren 23tik 27ra eta abenduaren 30etik urtarrilaren 3ra.  Beste alde batetik, eta Azkue Fundazioarekin batera, “Hala, Birala!” kultura digitalari buruzko campusa antolatu da. 2012 eta 2013 urteetan jaiotako umeei zuzenduta dago eta abenduaren 26an eta 27an eta urtarrilaren 2an eta 3an izango da. Azkenik, 1.890 adingabek Bilbao Kirolaken “Gabonetan Primeran Kirola Eginez” programaz gozatu ahalko dute (54 plaza gehiago dibertsitate funtzionala duten adingabeentzat gorde dira). Kasu guztietan, udalak azaroan izena emateko epe luzeak ireki ditu.

  • GABONGUNE ETA GABONKIDE

Gabongune 3-8 urteko umeei zuzenduta dago eta Gabonkide 9-11 urtekoei. Bilboko Udalak jarduerak euskaraz eta gaztelaniaz proposatu ditu, hala, hezkuntza ez-formala lantzeko espazio bat sortzeko eta, aldi berean, umeek aisialdiaz eta denbora libreaz gozatzeko. Programa biekin, Bilboko Udalak lana eta familia kontziliatzea sustatzen du eta umeei aukera ematen die trebetasun eta jolas berriak lantzeko eta inguruko adingabeekin egoteko.

Programak 09:00etatik 14:00etara izango dira Deustuko, Castañoseko, Begoñako, San Frantziskoko, Abusuko, Esperantzako, Abandoko, Iralako eta Basurtuko udal-zentroetan. Sartzeko eta irteteko ordu erdiko malgutasuna egongo da, hau da, 09:30era arte eta 13:30etik aurrera. Abenduaren 24an eta 31n irteera 12:30etik 13:00etara izango da.

Aurten, emakume asmatzaileak landuko dira. Modu horretan, gai hori ezagutza eta kultura hurbiletik, jolasen bidez eta modu dibertigarrian landuko da eta, horretarako, jardueren eta irteeran bitartez, umeek gozatu egingo dute, betiere, bakoitzaren adin-tartera egokituta (3-5, 6-8 eta 9-11 urte). Gainera, zeharkako moduan, genero-berdintasuna, GJHak eta Bilbo hiribilduko balioen gutuna sustatuko dira.

Aurten, berritasun gisa, Esperantza espazioa ere udalaren Gabonetako eskaintzaren barne egongo da. Bertan, lehenengo astean, gainera, STEAM gaiari buruzko ikastaro bat eta bigarren astean gorputz-adierazpenari (dantza, yoga, mimoak..) buruzko beste bat antolatuko dira. Biak ere 9-11 urteko umeei zuzenduta egongo dira.

  •  HALA, BIRALA! KULTURA DIGITALARI BURUZKO CAMPUSA

Udalak eta Azkue Fundazioak “Hala, Birala!” kultura digitalari buruzko campusa antolatuko dute. 2012tik 2013ra jaiotakoei zuzenduta egongo da eta abenduaren 26tik 27ra eta urtarrilaren 2tik 3ra izango da Euskararen Etxean, 09:30etik 14:00etara.

Egunero, lau ordu eta erdian, hezitzaileekin eta adituekin gai hauek landuko dituzte: stop-motion, musika sortzea, kartelak, bideoak eta bideo-jokoak. Sare sozialen inguruko erabilera eta jokaera egokiak ere landuko dituzte.

  • BILBAO KIROLAKEN GABONETAN PRIMERAN KIROLA EGINEZ PROGRAMA

Kirol-jarduerak atsegin dituztenek “Gabonetan primeran kirola eginez” udal-programan parte hartu ahal izango dute. Abenduaren 23tik urtarrilaren 3ra izango da Txurdinagako, Deustuko eta San Ignazioko kiroldegietan 09:00etatik 14:00etara, eta sartzeko eta irteteko orduak malguak izango dira, 08:30etik 14:30era.

1.260 plaza eskaini dira 2011 eta 2018 urteen artean jaio zirenentzat eta 36 plaza gehiago dibertsitate funtzionala duten  eta 2008 eta 2018 urteen artean jaio ziren adingabeentzat.

  • GAZTEKLUBA GAZTEENTZAT

Bilboko Udalak, #GazteKluba GABONAK programaren edizio berria martxan jarriko du baita ere, gustu guztietarako pentsatutakoa. Hainbat tokitan antolatuko dituzte 12-17 urte arteko gazteei zuzendutako aisialdi osasungarriko 16 jarduera abenduaren 26tik urtarrilaren 4ra. Helburua elkarrekin egoteko, jolasteko eta ongi pasatzeko espazio bat eskaintzea da, non sormena, kirola, teknologia eta antzekoak landuko diren. Jarduera horien artean, Bilbotik kanpora txangoak egingo dituzte, Bilborocken K-Pop txapelketaren 5. edizioa antolatuko da eta kirol- eta arte-tailerrak ere egingo dira.

#GazteKluba GABONAKeko jarduera gehienak doakoak izango dira eta ordaindu beharrekoak 2 eta 5 euro artekoak izango dira. Jardueretan parte hartu nahi duten gazteek jarduera bakoitzerako izena eman beharko dute azaroaren 29tik abenduaren 8ra arte webgune honetan: https://bilbaogazte.bilbao.eus/es/gazteklubagabonak/.

SARE SOZIALAK:

​#BilbaoGabonak #MePidoBilbao

by

  • Lau egituren instalazioa hasi da Areatzako kaian eta Erripako kaian, Udalaren  #BilbaoGabonak Gabonetako proiektuaren baitan.

  • Patinajeko pista, izotz sintetikozko txirrista eta umeentzako Gabonetako Ametsen Faktoria karpa azaroaren 22an irekiko dira, iaz baino astebete lehenago. Beste alde batetik, Gabonetako Merkatua abenduaren 5ean inauguratuko da, 2023an baino 5 etxola gehiagorekin.

Bilboko Udala hasi da Gabonetako lau instalazio muntatzen, Udalaren #BilbaoGabonak proiektuaren barruan: patinajeko pista, izotz sintetikozko txirrista, Gabonetako Ametsen Faktoria umeentzako jardueren karpa eta Gabonetako Merkatua.

Aurten muntaia hau iaz baino astebete lehenago hasi da, herritarrek eta Bilbo bisitatzen duten pertsonek azaroaren 22tik aurrera txirrista, pista eta umeentzako karpaz gozatzeko aukera izan dezaten. Lau egiturak, aurten ere, Itsasadarraren bi aldeetan kokatuko dira, Areatzako kaian eta Erripako kaian.

Areatzako kaian kokatuko den izotz sintetikozko patinajeko instalazioari dagokionez, berriz ere 800 metro karratuko azalera izango du eta modalitate horretako Estatuko handienetakoa izango da.

Oraingo honetan azaleraren %60 estalita egongo da eta, beraz, askoz ere hobeto ikusiko da hiriko hainbat tokitatik. Jendearentzat azaroaren 22an,  16:30ean, irekiko da eta zabalik egongo den azken eguna 2025eko urtarrilaren 6a izango da. Eskola egunetan 11:00etatik 14:00etara eta 16:30etik 20:30era egongo da zabalik; asteburuetan, jaiegunetan eta Gabonetako eskola-oporretan ordutegia 11:00etatik 14:00etara eta 16:00etatik 21:00etara izango da. Salbuespen gisa, abenduaren 24an eta 31n 11:00etatik 14:00etara egongo da zabalik, eta abenduaren 25ean eta urtarrilaren 1ean 17:00etatik 21:00etara.

Irristatzeko sei errei dituen izotz sintetikozko txirristaren kasuan ere azaroaren 22an irekiko da, 16:30ean, eta 2025eko urtarrilaren 6ra bitartean egongo da zabalik, eta patinajeko pistaren ordutegi bera izango du.

Bilboko Udalak #BilbaoGabonak proiektuaren barruan antolatu duen programazioa doakoa da, patinajeko pista eta izotz-txirrista izan ezik.

Prezioei dagokienez, izotz-pistaren kasuan 4 euro izango dira patinajeko 30 minutuko, patinak barne, eta 3 euro patinajeko 30 minutuko familia ugarientzat. Jarduera hori publiko guztiei zuzenduta dago (3 urtetik gorakoak), baina 3 eta 7 urte bitarteko umeek pertsona heldu batek lagunduta egon beharko dute beti, eta pertsona horrek bere sarrera propioa erosi beharko du.

Izotz-txirristak 3 euroko prezioa izango du pertsonako, eta horren barruan lau jaitsiera sartzen dira. Kasu honetan 2 urtetik gorako pertsona guztientzat da eta doakoa izango da sarrera propioa edukiko duen heldu batek lagunduta sartuko diren 2 eta 3 urteko umeentzat.

Izotz-pistarako eta/edo txirristarako taldeen erreserbak (20 pertsona edo gehiago) helbide honetara mezu elektroniko bat bidaliz egingo dira:  reservasgabonak@proasur.com.

Bi jardueretarako, sarrerak instalazioetako leihatilan erosi ahal izango dira, irekitzen diren egunetik aurrera (leihatila zabalik egongo da instalazioak itxi baino ordu erdi lehenago arte) edo, bestela, online www.bilbaopistadehielo.com webgunean, aste honetan zehar jarriko dena martxan. Zalantza guztiak  670 347 556 telefonora deituta argitu ahal izango dira.

UMEENTZAKO JARDUEREN KARPA

Era berean itsasadarraren beste aldean, Erripako kaian, Gabonetako Ametsen Faktoria haurrentzako gunea muntatzen hasi dira. Faktoria hori 450 metro karratuko karpa da eta bertan 12 urtera arteko haurrentzako emanaldiak eta jarduerak egongo dira. Zabalik egongo da azaroaren 22tik urtarrilaren 5era, astelehenetik ostiralera 16:00etatik 20:30era, eta asteburu eta jaiegunetan 11:00etatik 14:00etara eta 16:30etik 20:30era. Abenduaren 24an eta 31n eta urtarrilaren 5ean goizez egongo da zabalik, 11:00etatik 14:00etara. Abenduaren 25ean eta urtarrilaren 1ean eta 6an gune hau itxita egongo da.

Umeen karpara sartzea guztiz doakoa da, baina beharrezkoa izango da online izena ematea egun eta ordutegi jakin baterako, edo karpan bertan izena ematea, jarduera bakoitzerako edukiera bete arte.  Izen-emateak esteka honetatik egin daitezke, aste honetan zehar jarriko dena martxan: https://www.eventbrite.es/o/bilboko-udala-ayuntamiento-de-bilbao-35384619543

Guneak adinaren arabera bereizitako bi gune ditu: alde batetik 3 eta 6 urte bitarteko haurrentzat. Esparru honek Baso Magikoa izeneko ludoteka-gunea, tailerrak, Olentzerori eta Errege Magoei gutunak bidaltzeko postontzia… edukiko ditu. Bestetik, kasu honetan 6 eta 12 urte bitarteko haurrentzat, Ganbara guneak bitxikeriez, ipuinez, altzarien labirintoaz, sorkuntza guneaz, ipuin kontalarien guneaz, argazki erakusketaz… gozatzeko aukera eskainiko du.

Gabonetako Ametsen Faktoria jarduera horrekin batera hasi da muntatzen, halaber, Gabonetako Merkatua. Aurtengo edizioan Merkatuak 26 etxola ditu guztira, 2023an baino 5 gehiago. Saltoki horiek guztiek Gabonetako produktu tipikoak saltzen dituzte. Abenduaren 5etik urtarrilaren 5era bitartean bisitatu ahal izango da Erripako kaian, 11:30etik 14:30era eta 16:30etik 21:00etara, itxita egongo den abenduaren 25ean eta urtarrilaren 1ean izan ezik.

SARE SOZIALAK:

#BilbaoGabonak

by

  • Bilboko Udalak eta Bizkaiko Foru Aldundiak diseinuaren astearen hamargarren edizioa aurkeztu dute, Bilbo UNESCOren Hiri Sortzaileen Sarean Diseinuaren Hiri izendatu zutenetik hamar urte betetzen direnean.

  • Azaroaren 14tik 22ra BBDW24k hogei bat jarduera eskainiko ditu sormen-industriak garapen ekonomikoaren eta nazioarteko proiekzioaren faktore gisa sustatzeko, diseinua bere alderdi guztietan herritarrei hurbilduz.

  • “Biotik Design: bizitzarako lurraldeak” izenburupean edizio berezi honek diseinua pertsonen benetako beharrekin lotuko du, jasangarritasunaren, berdintasunaren, aniztasunaren, berrikuntzaren, lankidetzaren eta komunitatearen ikuspegitik. Horretarako nazioarteko ospea duten hizlarien esku-hartzea egongo da eta Maider López euskal artistak proposatutako hiri-ekintza bat edo ikasleen eta enpresen arteko  ‘Diseñatón’ ekimena burutuko dira.

Bilboko Udalak eta Bizkaiko Foru Aldundiak “Bilbao Bizkaia Design Week 2024” (BBDW) aurkeztu dute gaur. Jarduera hau erreferentziazko ekitaldia da diseinuaren munduan eta aurten hamar urteko ibilbidea ospatzen du, Bilbo UNESCOren Hiri Sortzaileen Sarean Diseinuaren kategorian sartu zeneko hamargarren urteurrenarekin bat eginez.

BBDWk argi eta garbi islatzen du garapen ekonomiko eta soziala bultzatzeko bokazioarekin eta gaitasunarekin hiri-eraldaketaren ardatz egituratzaile gisa Bilbok eta Bizkaiak diseinuaren alde egindako apustua.

“Biotik Design: bizitzarako lurraldeak” izenburupean, hamargarren edizio honek prozesu sortzaileetan parte hartzera gonbidatzen ditu herritarrak, gero eta konplexuagoa den egungo testuinguruaren aurrean ikuspegi eraldatzailea hartzen lagunduz.

Azaroaren 14tik 22ra bitartean elkarrekin hausnartuko da nola diseinatu modu biotikoan, hau da, sorkuntzak begirada ekologiko, inklusibo, kolaboratibo, kode ireki eta esperimental batetik behatuz eta proposatuz. Diseinuko profesionalek, ikasleek, prestakuntza-zentroek, administrazio publikoek, erakundeek, elkarteek eta, oro har, herritarrek, proposatutako jarduera guztietan parte hartu eta izena eman ahal izango dute, edukiera bete arte: https://bilbaobizkaiadesignweek.eus/es/actividades

Kontxi Claverrek, Garapen Ekonomiko, Merkataritza, Turismo eta Enpleguko Zinegotziak, eta Ainara Basurkok, Ekonomia Sustatzeko Foru Diputatuak, ostegun honetan, azaroak 14, hasiko den edizio bereziaren xehetasunak aurkeztu dituzte.

Kontxi Claverrek azaldu duenez, “edizio oso berezia da, eta Bilbo epizentroa izatea nahi dugu, diseinua etorkizun jasangarriago, bidezkoago eta berritzaileago batera bideratzen duten praktika sortzaileei buruz hausnartzeko. Jakin dakigu diseinuak gizartearen benetako beharrei erantzun diezaiekeela, eta jarduera hauek horretarako balio izatea nahi dugu. Profesionalak herritarrekin konektatu nahi ditugu eta gure agente sortzaileen harremanei balioa eman nahi diegu, baita tokiko talentua sustatu ere”.

Beste alde batetik, Ainara Basurkok azpimarratu du “kultura- eta sormen-industriek funtsezko zeregina dute Bizkaiko ekonomian, bai jarduera ekonomikoan eta enpleguan duten eragin zuzenagatik, bai beste sektore ekonomiko batzuen berrikuntza eta eraldaketa bultzatzeko duten gaitasunagatik. Berrikuntza irekiaren paradigma eta eredu, eta hainbat eremu eta sektorerekiko lotura sinergikoak diren kultura- eta sormen-industriek bereizi egiten gaituzte, eta kohesio eta gizarte-ongizate handiagoaren katalizatzaileak dira. Edizio honetan diseinuak pertsonen benetako beharrei eskainitako erantzunean duen balio-ekarpenean sakonduko dugu, jasangarritasuna, berdintasuna, aniztasuna edo komunitatearen kontzeptuaren indartzea azpimarratuz”.

Elisa de los Reyesek, Pezestudio enpresaren bidez BBDW24 ekimeneko komisarioak  ere aurkezpenean parte hartu du eta hamargarren edizio honen garrantzia laburbildu du, honakoa azpimarratuz “Biotik Design, bizitza sustatzeko diseinatzea, kontzeptuari buruzko hausnarketa kolektiboa egitera gonbidatzen dugu, gaur egungo premia delako. Jarduerak gizartearen espektro zabala inplikatzeko pentsatuta daude, hala nola diseinuaren arloko eskolak eta profesionalak, eta baita erakundeak eta herritarrak ere. Aztarna ukigarria utzi nahi dugu, Biotik Design Dekalogoa bezalako ekimenetan gauzatzen dena, Bilbon eta Bizkaian diseinu-filosofia hori bultzatzeko printzipio-multzoa; Diseñatón-en bidez tokiko erakundeentzako proposamen zehatzak diseinuan; eta elkarlaneko esperientziak, hala nola hiri-ekintza.”

SEKTOREAREN GARRANTZIA ZENBAKITAN

Azpimarratzekoa da, Eustaten Jarduera Ekonomikoen Direktorioaren arabera, Bilbo-Bizkaian sormen-ekonomiak 21.228 pertsona enplegatzen dituzten 5.934 enpresa-establezimendu dituela 2023an, hain zuzen ere 2022. urtearekin alderatuta urtebetean establezimenduen kopurua % 0,9 eta horiei lotutako enplegua % 2,8 hazi ondoren.

Sormen-jardueretarako enpresa horiek enpresa-sare osoaren % 6,9 dira, eta sortutako enpleguak lurraldeko enplegu absolutuaren % 4,6 izan ziren 2023an.

Enpresen eta enpleguaren hazkundea nagusi da “Soinua grabatzeko eta musika editatzeko jardueretan” eta “Arte eszenikoetan”, “Diseinu espezializatuan” gertatu den bezalaxe.

20 JARDUERA BAINO GEHIAGO, 5 ARDATZETAN OINARRITUTA

Hamargarren edizio honen gaiari dagokionez “Biotik Design: bizitzarako lurraldeak”, bizitza sustatuko duen diseinuaren ideia azpimarratu nahi izan da, Zabalgune Eraikina,

Azkuna Zentroa-Bilboko Alondegia, BBK Kuna edo Perrera bezalako espazioetan egingo diren hogei ekintza baino gehiago proposatuz. Bost ardatz nagusi izango dira, diseinua eta herritarren beharrak lotuko dituztenak.

BBDW24k diseinuaren bidez, baliabideak optimizatuz, kanpo-efektuak minimizatuz eta ingurune naturalarekin harreman harmoniatsua sustatuz, etorkizun jasangarria, ekologikoa, arduratsua eta kontzientea sustatzea planteatzen du. Era berean  diseinuaren bidez berdintasuna eta aniztasuna eraiki nahi dira, berdintasuna balioetsi eta sustatuko duten ingurune inklusibo eta bidezkoak sortuz, paradigma tradizionalak desmuntatuz eta askotarikotasuna eta elkarrekikotasuna sustatuz.

Hamargarren edizio honetako hirugarren ardatza hiri- eta komunitate-diseinuan baterako sorkuntza sustatuko duten elkarlaneko komunitateak bultzatzea da, beharrak eta itxaropenak baloratuz eta adimen kolektiboa indartuz. Era berean sormen irekian oinarritutako jardueren aldeko apustua egiten da, sarbide librea, banaketa eta berrerabilera ziurtatuko duten kode irekiko diseinu-soluzioak garatuz. Azkenik, aurtengo Bilboko eta Bizkaiko diseinuaren asteko bosgarren ardatza berrikuntza esperimentala da, ikuspegi sortzaile eta espekulatiboen bitartez diseinuan ideia eta teknologia berriak aztertuz, jakin-mina, pentsamendu kritikoa eta eraldaketa soziala sustatuz.

Aldi berean edizio honek, berriz ere, sektoreko erakunde eta enpresa ugari biltzea lortu du hala nola EIDE (Euskal Diseinuaren Elkartea) eta BIAAF (Bilbao International Art and Fashion) elkarte sektorialak, eta baita beste erakunde garrantzitsu batzuk ere, hala nola eta besteak beste, Selected Inspiration, Espacio Open, Getxo Sormen Hub, Estudio Bokashi, Colaborabora, Duara Design, Media Attack, Azkuna Zentroa  edo Asociación Develop.

HIRI-EKINTZA

“Bilbao Bizkaia Design Week 2024” ekimenak, hamar urteko ibilbidea burutu ondoren,  lotura berezia ezarri nahi du herritarrekin. Horretarako, azaroaren 17an, 11:30ean, “Balkoiak” izeneko ekimena programatu da. Hiri-ekintza horretan Maider López euskal artistak Bilboko erdigunean hautatutako 4 balkoiko landareak Zabalgune eraikinera lekualdatzea proposatzen du, espazio horien jatorrizko konfigurazioa birsortuz.

Kaleko ekintza horrek, landareak oinez garraiatzeko prozesio parte-hartzailea barne hartzen duenak, hiria balkoiak apaintzen dituzten lorategi pertsonalen bidez berraurkitzera gonbidatzen ditu herritarrak. Ikuspegi parte-hartzailea eta interaktiboa da, Bilboko herritarren parte-hartze aktiboa eragingo duena.

‘DISEÑATON’: ENPRESAK ETA IKASLEAK

Aurtengo berrikuntzetako bat ‘Diseñatón’ deritzona da, Bizkaiko enpresak Euskadiko bost diseinu-zentro nagusietako ikasleekin konektatzen dituen BBDW24ren ekintzetako bat, bost erronkari erantzuteko. Ekimen hau Cooperativa Tipik koordinatzen du.

Bi egunez, IDARTE (Euskadiko Arte eta Goi-Mailako Diseinu Eskola), IED Kunsthal (moda,  barnealde eta produktuen diseinua eta diseinu grafikoa), TECNUN (Nafarroako Unibertsitateko Ingeniaritza Eskola), Deustuko Unibertsitatea (Industria Diseinuko Ingeniaritza Gradua) eta UPV/EHUko (Arte Ederren Fakultatea eta Donostiako Arkitekturako Goi Eskola Teknikoa) berrogeita hamar ikasle inguruk tokiko bost erakunderentzako konponbideak landuko dituzte, ekologiari, inklusioari, lankidetzari, ezagutza irekiari eta esperimentazioari lotutako edizio honetako bost narratibei dagokienez.

IHOBE, Eusko Jaurlaritzako Industria, Trantsizio Energetiko eta Jasangarritasun Sailari atxikita dagoen sozietate publikoa da eta planteatu duen erronka honakoa da: “Nola erraztu diezaiekete tokiko gobernuek kontsumitzaileei produktu konpongarriak eta konponduak hautatzea eta erostea?”.

GRUPO SSI kooperatibaren xedea gizarte-zaurgarritasuna eta mendekotasuna duten pertsonen gizarte-premiei erantzun integrala eta berritzailea ematea da. Kasu honetan jarduera erronka honi lotuta dago: “Nola azal daiteke, diseinuaren eta komunikazio- eta dibulgazio-estrategien bidez, SERPAC programa (parte-hartze komunitariorako zerbitzua), zerbitzuaren erabiltzaile izan daitezkeen pertsonen artean nahia eta konfiantza sortzeko?”.

IBILKARI autoaren erabilera arduratsua sustatzeko asmoz sortutako ekimena da eta honako galdera hau planteatuko du: “Nola eralda daiteke Ibilkari Bilbo zerbitzuaren erabiltzaileekiko harremana elkarlaneko antolaketa-eredu batean aurrera egiteko eta proiektuaren jasangarritasunari dagokionez komunitate aktibo eta konprometitua eraikitzeko?”

H-ENEA Living Lab etxeko sektorean berrikuntza irekia inplementatzen duen irabazi-asmorik gabeko erakundea da, eta planteamendu honi erantzutea proposatuko du: “Nola diseinatu sare sozial presentzial/digital bat nahi ez den bakardadea murrizten lagunduko duen interkonektatutako sukaldeen inguruan belaunaldien arteko konexioa sustatzeko ?

Azken erronka GOIENER, energia berriztagarria sortzeko eta kontsumitzeko kooperatibak planteatzen du, eta honakoa da:  “Nola bermatu zaurgarritasun-egoeran dauden pertsonen hitza eta parte-hartzea abian jartzeko prozesuetan, komunitate horiek gero inklusiboagoak eta pluralagoak izan daitezen?”.

‘5X5 BILBAO’ PROIEKTUA: LEHEN ALDIZ EUSKADIN

Diseinuaren alderdi guztiekin zerikusia duten pertsonak Bilbon egongo direla aprobetxatuz “5X5 Bilbao” proiektu berritzailea jarriko da abian. Ekintza bateratua da, Bilbao Ekintza udal-sozietatearen, Designregio Kortrijk erakunde flandestarraren eta EIDEren artean garatzen dena.

Euskadin lehen aldiz egiten den programa honen bidez diseinuaren arloko bost profesionalek, hiru Bilbokoak eta bi Kortrijkekoak (Belgika), bost euskal enpresari lagunduko diete urtebetez produktu edo zerbitzu bat garatzen edo birdiseinatzen. Lan horretan diseinuaren metodologiak erabiliko dituzte 2025eko udazkenean erakusketa batean aurkeztuko den prototipo bat garatzeko helburuarekin.

Datorren azaroaren 18an, BBDW24aren barruan, proiektuan parte hartuko duten bost pertsonen eta enpresa hautatuen aurkezpen ofiziala egingo da, baita taldeen lehen lan-jardunaldi bateratua ere.

‘KAIXO!’ ETA ‘PARTEKATU!’

Ostegun honetan, azaroaren 14an, 18:30etatik aurrera, BBDW24 ekitaldiaren irekiera ospatuko da Bilboko Zabalgune Eraikinean. “Kaixo!” izenpean nazioarteko hiru hizlarik diseinua bizitza sustatzeko zeharkako tresna gisa planteatzearen ideiari buruz hausnartuko dute: Gabriela Rendón, Nueva Yorken bizi den arkitektoa eta hiri-planifikatzailea, bere ikuspegi disruptiboengatik ezaguna dena, hiri-eremuko eraldaketarako imaginario eta praktika desafiatzaileei buruz arituko da; Pau Aleikumek, datuak emozio bihurtzen aditua den Domestic Streamers sormen-agentziaren sortzaileak, hitzaldi interaktiboa eskainiko du eraldaketa eko-sozialari buruz, ikuspegi esperimentalean  oinarrituta; eta Martí Guixék, Food Design Fiction-en aitzindariak, janariak nola duen aldaketa eta eraldaketarako eragile bihurtzeko gaitasuna planteatuko du.

Gainera bertaratzen direnek aukera izango dute modu interaktiboan  “Biotik Design” DEKALOGOA sortzen laguntzeko. Lan hau asteko gainerako egunetan ardatz eta gida izango diren eta BBDW24ren edizio berezi honen ondare eta legatu izango diren “Bizitzarako lurraldeak” sortzeko irizpide eta kontzeptu giltzarriak definituz egingo dute.

Azaroaren 22an, “PARTEKATU!” izango da BBDW24ri amaiera emango dion ekitaldiaren izena. “PARTEKATU!” Zabalgune Eraikinean egingo den topaketa- eta sormen-gunea da eta bertan Diseñaton-en lorpenak partekatuko dira eta tokiko talde sortzaile emergenteak bilduko dira, hala nola Herética(S)  eta DJ Puñales.

Itxiera-ekitaldiak tokiko diseinuari buruzko esplorazio-interpretazioa izango du, networking eta ospakizun giroa sortuz “Bilbao Bizkaia Design Week 2024” ekitaldiaren hamargarren edizioko hamar egunetan lortutako lorpenen inguruan.

‘BILBAO BIZKAIA DESIGN WEEK 2024’ ekitaldiari buruzko informazio guztia: https://bilbaobizkaiadesignweek.eus/eu

by

Loturiko dokumentuak

  • Egindako inbertsioari dagokionez, nazioarteko kirol-ekitaldiaren itzulkina (ROI) Eusko Jaurlaritzak, Bizkaiko Foru Aldundiak eta Bilboko Udalak aplikatutako aurrekontuaren halako 17koa izan da.

  • Ikertaldek egin duen eraginaren azterlanaren arabera, euskal herritarrak UWCLren finalean inplikatuta sentitu dira eta tokiko hazkunde ekonomikorako eta gizarte berdinzaleagoa sustatzeko aukera handitzat jo dute.

  •  San Mamesen jokatutako partidak kategoriako final batera bertaratutakoen errekorra lortu zuen, Bilboko estadioan 50.827 pertsona bildu zirelako, eta guztira 72.518 pertsona mobilizatu ziren.

San Mamesen joan den maiatzaren 25ean  jokatutako UEFA Women’s Champions League (UWCL) 2024 Finalak 23 milioi euroko inpaktua eragin du euskal ekonomian. Zenbateko horrek esan nahi du egindako inbertsioari dagokionez lortutako itzulkina (ROI) aipatu den kirol-ekitaldi hori egiteko hiru euskal erakundeen (Eusko Jaurlaritza, Bizkaiko Foru Aldundia eta Bilboko Udala) artean aplikatutako aurrekontuaren halako 17koa izan dela; aldi berean 13,18 milioi euroko ekarpena egin du Euskadiko BPGd-n eta zuzeneko itzulkin ekonomikoa administrazioan 4,37 milioi eurokoa izan da.

Diru-sarreren guztizkoaren banakapenari dagokionez, 2,9 milioi euro baino gehiago 87 euskal enpresaren zerbitzuak kontratatzetik datoz; beste ia 2,7 milioi euro egoiliarrak ez diren pertsonek antolaketa-arrazoiengatik Euskadin egindako egonaldiari eta gastuei dagozkie; 8,8 milioi euro partidara bertaratutako pertsonek egindako gastuari dagozkio (gaualdiak, ostalaritza, merkataritza, garraioa, turismo-jarduerak…), eta 1,1 milioi euro baino gehiago gehitu behar dira, kasu honetan girotzearekin bat egin zuten pertsonek egindako gastuan arlokoak. Azkenik, gainerako 7,4 milioi euroak sektore arteko balio-katean —euskal ekonomian eragindako inpaktuak— injekzio ekonomiko horiek eragindako tarteko ekoizpenei dagozkie.

Hala berresten du Ikertaldek antolaketa-batzordearentzat egindako 2024ko UWCLren Finalaren eraginari buruzko txostenak. Txosten horrek ekitaldiaren irismena neurtzen du ekonomiaren, gizartearen, ingurumenaren eta komunikabideen ikuspegitik. Txosten hori egiteko, ekitaldiaren antolatzaileek emandako datuak eta laguntzaileekin eta sustatzaileekin izandako elkarrizketak kontuan hartzeaz gain, aldi berean 1.301 inkesta egin dira partidara joan zirenen, girora hurbildu zirenen eta, oro har, euskal herritarren artean.

San Mamesen 50.827 ikusle bilduz Emakumezkoen Champions Ligako final batera bertaratutakoen errekorra erregistratzeagatik historiara pasatzeaz gain, txostenean egiten diren kalkuluen arabera partidara joateko sarrerarik eduki ez arren 21.691 pertsona izan ziren egun horretan hirian sortutako girodun aldeetan modu aktiboan parte hartu zutenak. Horrela, Europa mailako kirol-hitzorduak 72.518 pertsona mobilizatu zituen.

Mobilizatutako pertsona guztien %58 emakumeak izan ziren, baita San Mamesen Finala bertatik bertara gozatu zutenen %60 ere. Horien guztien jatorriari dagokionez, mobilizatutako pertsonen herena baino gehiago (25.000 pertsona) Euskadikoak ziren, eta pertsonen %28 katalanak izan ziren, bi talde finalistetako bat FC Barcelona izan baitzen. Datu horien arabera, parte-hartzaileen %65,4 ez ziren Euskaditik etorri, beste norako batzuetatik etorri ziren Bilbao-Bizkaia-Euskadira.

Ekitaldian izandako parte-hartzearen ezaugarri nagusiak kontuan hartuta batez ere gazteak izan ziren (%72, 45 urtetik beherakoak), senide- edo lagun-talde zabaletan mugitu ziren eta jai-giroa, familiakoa, segurua, kolaboratiboa eta atsegina nabarmentzen eta goraipatzen dute.

33.719 pertsonak igaro zuten gaua Euskadin, eta horietatik % 84k Bizkaian igaro zuen, batez ere Bilboko hotel eta apartamentu turistikoen sarean, eta batez besteko egonaldia 2 gauekoa izan zen. Derrigorrez azpimarratu behar da gaua eman zuten 10 pertsonetatik ia 8k Bilbo-Bizkaia-Euskadin turismoa egiteko aprobetxatu zutela eta kultura- eta aisialdi-eskaintza turistikoan parte hartu zutela. Beste alde batetik, nabarmendu behar da sortutako turismoaren %71k biziki gomendatuko duela Bilbo, eta mobilizatutako turisten %76k itzultzeko prestasuna erakutsi zutela, eta etorkizunean hori pizgarri turistikoa izango dela gurean.

KALITATEZKO ESPERIENTZIA

Oro har UWCL 2024 Finala esperientzia oso positiboa izan da estadiora bertaratu ziren pertsonentzat, batez beste 10etik 8,7 puntuko gogobetetze-mailarekin. Era berean sarrerarik gabe mobilizatutako pertsonek 10etik 8,4ko nota eman zioten esperientziari.

 

Ondoen baloratutako alderdien artean, puntuazio bikainarekin, San Mames estadioaren erosotasuna, funtzionaltasuna eta girotzea daude (9,2/10), eta horren atzetik datoz sarreraren prezioa (9/10), hiriaren segurtasuna (8,9/10), hiriko ostalaritza-eskaintza (8,8/10), herritarren berotasuna eta laguntza (8,7/10), eta Bilboko turismo-eskaintzaren kalitatea (8,7/10), eta baita ekitaldiaren antolaketa (seinaletika, informazioa eta erraztasunak) eta bi taldeetako zaleen elkarguneak ere (Fan Meeting Points), biak ere 8,6/10 puntuazioarekin baloratuak.

Kontsultatutako pertsonek aipatutako hobekuntza-aukeren artean, ostatuen eta ostalaritzaren prezioak garestiak direla nabarmentzen da.

ERAGIN SOZIALA ETA AUKERAK

Kontsultatutako euskal herritarren %75,8k uste du UWCL 2024 Finala egitea urrats bat gehiago izan dela kirolean genero-aukera berdintasunean eta uste dute ekarpen ona izan dela genero-berdintasunaren aldeko lanean. Halaber, galdetutako 10 pertsonatik 8k uste dute ekimenari esker futbola eta kirola erakargarriagoak izango direla Euskadiko neskentzat eta uste dute Bilbo-Bizkaia-Euskadik etorkizunean ekitaldi handiak antolatzeko duen gaitasuna hobetuko duela, familia- eta kooperazio-balio berriekin futbol-zaletasun kontingente berria erakartzea eta sendotzea lortuz.

Legatuari dagokionez kontsultatutako euskal herritarrak bat datoz erakundeen itxaropenekin: oro har %81 pozik agertu dira UWCL 2024 lehiaketaren finalarekin, eta uste dute tokiko hazkunde ekonomikorako eta euskal enpresen garapenerako aukera bat izan dela.

ERAGIN MEDIATIKOA

Urtarriletik ekainera bitartean UWCL 2024 Finalak 4.512 inpaktu izan ditu prentsan, irratian, telebistan eta sare sozialetan, eta inpaktu horien publizitate-balio baliokidea adieraziz balio ekonomiko metatua 39,1 milioi eurokoa izan da. Finalarekin lotutako aipamen gehienak hedabide digitaletan eta sare sozialetan egin dira (%72). Garrantzitsua da nabarmentzea aipamen guztien %43 nazioarteko estaldura duten komunikabideetan sortu direla.

Ekitaldi handiak erakartzeko estrategiaren esparruan, 2023ko uztailean Grand Départ Pays Basque ekitaldiak izandako arrakastaren ondoren eta aipatu diren 2024ko UEFA Women’s Champions Leagueko Finaleko zifra positiboekin, hurrengo kirol-hitzordu nagusia 2025eko maiatzaren 21ean izango da, egun horretan lehen aldiz Euskadin UEFA Europa Leagueko Finala jokatuko delako San Mamesen.

by

  • Lehendik iragarri genuen Scott Cohen, Alexandra Lioutikoff, Maria José Llergo edo Kase O izango zirela parte-hartzaile, eta orain izen gehiago baieztatzeko moduan gaude, hala nola Axel Voss (DE), diputatu europarra, Europako Parlamentuan adimen artifizialari buruzko batzordearen txostenaren arduraduna; Los Prieto Flores,  Está Pasando sormen-agentziaren sortzaileak; edo Darío Manrique, Spotify plataformako senior editor.

  • BIME Live barruan musikaz eta kulturaz gozatzeko aukera izango dugu aire zabaleko bi agertokitan, eta Fermin Muguruza euskal artista ikonikoari omenaldia egingo zaio kontzertu batekin, Verde Prato, HOFE x 4.40, eta Nakar taldeen eskutik.

Bilbo prest dago jada mundu osoko 4.500 parte-hartzaileri harrera egiteko musikaren industrian erreferentziakoa den BIME topaketaren hamabosgarren edizioan; gaur iragarriko da aurtengo programazio osoa, 300 profesional eta artista baino gehiagorekin.

Hamar eguneko egitaraua urriaren 24an hasiko da eta hiria Iberoamerikako musikaren eta kulturaren hiriburu bihurtuko da; izan ere, elkarrizketak, tailerrak eta masterclassak antolatu dira BIME Pro barruan urriaren 29tik 31ra, eta 100 jarduera baino gehiago egingo dira herritarrentzat BIME Live ekitaldietan, urriaren 24tik azaroaren 2ra bitarte.

BIME LIVE: MUSIKAREN ETA KULTURAREN OSPAKIZUNA HIRIAREN ERDIALDEAN

Zuzeneko musika izango da protagonista urriaren 29an, 30ean, 31n eta azaroaren 1ean. Urriaren 29tik 31ra bitarte, Kafe Antzokia, Bilborock by Santander S Music, BBK Sala, Stage Live, Crystal, La Ribera, Muelle, Cotton Club, Dock BBF, Crazy Horse eta Oker aretoetan 90 showcase, kontzertu eta dj set baino gehiago egingo dira, profesional akreditatuek eta herritarrek Iberoamerikako eta Europako proposamen abangoardistenak ezagutu ditzaten (edukiera mugatua. Profesional akreditatuek izango dute lehentasuna). Irailean iragarritako kartelari izen berriak gehitu behar zaizkio, hala nola Fillas de Cassandra (ES) galiziar musikaren promesak; La Paloma (ES) noise rock taldea; Lua de Santana (BR/ES) artistaren funk erritmo brasildarrak; Quinto Escalón lehian parte hartu zuenetik ezagun egin den Lucho SSJ (AR) rapero argentinarra; Suave (ES) artista bilbotar gaztea, edo Depol (ES) artista katalana, LOS40-ren eskutik, besteak beste.

Azaroaren 1ean, aire zabaleko musikaren txanda izango da bi agertokirekin; San Miguel eta San Miguel OnAir, Uribitarte pasealekuan egongo dira Bilboko udaletxearen aurrean, eta besteak beste, Depresión Sonora (ES); bere post-punk gordinarekin; El Columpio Asesino (ES), pop nazionalean eragin handiena duen taldeetako bat, edo trap, rap eta R&B Juicy Bae (ES) abeslaria, izango ditugu ikusgai eta entzungai. Emanaldi horien ondoren, itxiera festa bat izango da Crystal aretoan, Nítidoren kuradoretza duena, eta bertaratzen direnek Mark Luva (ES), Puñales (ES) eta Wost (VE) artisten Dj setez gozatu ahal izango dute.

BIME Live barruko kultur jardueren eskaintza osatze aldera, herritar orori zuzendutako emanaldi berezi bat prestatu dugu: Fermin Muguruzaren 40 urteko ibilbideari eskainitako omenaldi-kontzertua, urriaren 31n Kafe Antzokian.

Ekitaldi honetan, Izar & Star kolaborazioarekin, HOFE x 4.40, Nakar eta Verde Prato artistek, Fermín Muguruzaren pieza mitikoak berrinterpretatuko dituzte – Kortatutik gaur egunera arte, Negu Gorrietatik pasatuta –, Euskal Rock Erradikalaren ikono baten omenez. Ikono hori gure kulturan sartu da eta euskaldun garaikideen soinuan eragina izan du. Tokiko eszenaren eferbeszentzia irudikatzen duten hiru artistak omenaldia egingo diote kontzertu bakar eta errepikaezin batean.

Stereorocks Clubaren edizio berezi bat ere izango da, tokiko klub eszenari balioa eta ikusgaitasuna emateko asmoz; horretarako, Bendiak, Aitana Rodriguez eta J-3Ø3 DJen saioak antolatu dira, deialdi ireki baten bitartez hautatu ostean; Lotura irundarrak dira haien kuradore. Gainera, Enkarnazio elizan emanaldi berezi-berezi bat antolatu du Fever-ek: Candlelight: Ludovico Einaudi-ren tributua.

BIME Live emanaldien bitartez, programazioa topaketara datorren publiko profesionalarengana ez ezik, musikazaleengana ere hurbiltzea lortu nahi da, hiriaren erdigunean bertan kultura- eta musika-proposamen aberatsa eskainita herritar orori. Bestalde, Bilboko Udalaren babesa nabarmendu nahi dugu, baita erakunde hauen laguntza ere: Sormen Industrien Fundazioa, Fever, San Miguel/La Salve, Eusko Jaurlaritzaren Kultura Saila, INAEM, Filmin, Donostia Zinemaldia, Dock of The Bay, Basque Dock Festival, StereoRocks, BASQUE.MUSIC., Liburuak, Feria del Disco, Digital Fems, eta Izar & Star.

INDUSTRIAREN ETORKIZUNA DEFINITZEN LAGUNDUKO DUTEN FUNTSEZKO ERAGILEAK

BIME Pro ekimenean sektoreko eragile eta ahots garrantzitsuen ordezkaritza zabala izango dugu, hala nola, Scott Cohen, CEOa JKVX etxean, musika-industriaren bilakaeran aitzindaria; Andreas Katsambas, Chartmetric etxearen presidentea; Alexandra Lioutikoff, Universal Music Publishing etxean LATAM eta US Latin eremuetako presidentea; Blanca Salcedo (ES), Sony Music Spain etxearen zuzendari nagusia; eta George Drakoulias (US); artistei dagokienez,  Kase O (ES), Albert Pla (ES), Maria José Llergo (ES) eta Villano Antillano (DO) arituko dira, besteak beste.

Lehendik baieztatutako izen horiei beste hauek gehitu behar zaizkie: Axel Voss (DE), Europako Parlamentuan adimen artifizialari buruzko batzordearen txostenaz arduratu den diputatua; Alejandra Olea (US), Ameriketako zuzendari erregionala Believe etxean; Colomba Molina (CL), Latineo-ren sortzaileetako bat; Jan-Willem Van de Ven (NL), CEOa Amsterdam Dance Event ekitaldian; Jaime Villalobos (TX), Vibra Marketing SPA etxeko zuzendari exekutiboa eta bazkidea; Manuela Villa (ES), Espainiako Gobernuaren Presidentetzako kultura-gaietarako zuzendari nagusia; Miguel Arias (ES), K FUND proiektuko bazkide nagusia; Imarú Aledo (ES), Tomavistas jaialdiaren zuzendarikidea; edo Darío Manrique (ES), senior editor Spotify plataforman. Honako hauek ere nabarmendu behar ditugu: Sofía Conti (ES) komunikatzailea ; Aïda Camprubí (ES), BAM Jaialdiaren zuzendarikide artistikoa; Chiara Oliver (ES) artista; Vicent Argudo (ES), musika-zuzendaria Prisa Media etxean; María Eizaguirre (ES), komunikazio eta partaidetza zuzendaria RTVE etxean; David Jordan (ES), Chief Revenue Officer ELROW Family etxean; Dani Fletcher (ES), Chief Innovation Officer Primavera Sound jaialdian; Devin Landau (US), partner & agent TBA Agency etxean; Erica Romero Pender (ES), LIVE DMA sarearen koordinatzailea; Borja Prieto (ES) eta Natalia Flores (ES), Está Pasando sormen-agentziaren sortzaileak; edo La Furia (ES) artista.

Agenda osoa hemen aurki daiteke: https://bime.org/eu/pro/agenda/

MUSIKA-INDUSTRIAREN EZINBESTEKO HITZORDUA

Egitarau osoa bime.org webgunean ikus daiteke, eta topaketa online jarraitu ahal izango da plataformaren bitartez; plataforma aktibo dago jada webgunean eta aplikazioan.

BIME nazioartean erreferentziako gune bihurtu da, Europa eta Amerikaren arteko nazioartekotze-zubi sendoa. Profesionalen eta artisten elkarlanak sustatu eta bi kontinenteetarako sarbidea ahalbidetzea izanik xede, mundu osoko profesionalak ikusgai egiteko gune eta bozgorailu nagusietako bat bihurtu da. Elkarrizketa eta networkinga beti daude erabilgarri bime.org webgunearen eta online plataformaren bitartez, 365 egunetan aktibo egoten baita, eta munduko edozein tokitatik parte hartzeko aukera ematen du, networkinga ere noiznahi izanik eskura. Mundu osoko musikaren arloko profesionalekin harremanetan egoteko topagune birtuala, eta aurreko edizioetako eztabaida eta hitzaldi guztiak ikusgai dauden tokia.

SARE SOZIALAK:

by

  • Higiezinak, azpiegiturak eta aktiboak estandarizatzeko eta baloratzeko lanetan liderra den RICS erakunde profesionalak antolatutako foroa lehen aldiz egingo da hirian, eta sektoreko 300 profesional bilduko ditu. 

  • Azkuna Zentroa – Alhondiga Bilbao-n egingo da ekitaldia, non eraikitako ingurumen-sektoreko adituek ideiak partekatuko dituzten eta konponbide berritzaileak emango dizkieten hiriei eta eraikitako beste ingurune batzuei eragiten dieten premiazko erronkei.

  • Astelehen goiz honetan, Juan Mari Aburto Alkatea mundu-mailan erreferenteak diren eta Bilborekin lotura estua duten higiezinen sektoreko hiru sustatzailerekin bildu da: Adolfo Ramírez, Carlos Ruiz-Garma eta Javier Ochoa.

Bilboko alkateak, Juan Mari Aburtok, bihar, urriaren 15ean, inauguratuko du World Built Environment European Summit 2024 biltzarra. RICS (Royal Institute of Chartered Surveyors) erakundeak antolatu du, zeina munduko liderra baita lurzoruen, higiezinen eta azpiegituren balorazioa, kudeaketa eta garapena sustatzeko eta estandarizatzeko lanetan, eta Bilboko Udalaren laguntza ere jaso du Invest in Bilbao-ren bitartez.

Hiriak lehen aldiz hartuko du ekitaldi hau, jasangarritasunaren ikuspegitik hiri-inguruneak berroneratzeko esparruan erreferentziazko hitzordua izateko helburuarekin.

World Built Environment European Summit 2024 biltzarra Azkuna Zentroa – Alhondiga Bilbao-n egingo da eta hiri-garapenaren eta higiezinen industriaren sektoreko 300 profesional bilduko ditu, bai eta maila goreneko nazioarteko 30 hizlari baino gehiago ere.

Iaz Venezian egindako Europako lehen eskualde-edizioak izandako arrakastaren ondoren, RICS erakunde ospetsuak Bilboren aldeko apustua egin du, Europan urtero egiten den biltzar nagusiari jarraipena emateko. Helburua da gaur egun hiriek jasangarritasunaren ikuspegitik dituzten funtsezko erronken inguruko eztabaida sustatzea, eta inplikatutako eragileak kontzientziatzea, besteak beste, alderdi hauek duten garrantziaren inguruan: ESG irizpideak sozialki arduratsua den inbertsiorako (ingurumen-, gizarte- eta gobernu korporatiboko faktoreak), higiezinen sektorearen deskarbonizazioa, jasangarritasuna higiezinen inbertsio-estrategietan txertatzea, klima-aldaketarekiko erresilienteak diren hirien kontzeptua edo tradizioaren eta berrikuntzaren arteko batasuna higiezinen ikuspegian, euskal eredua adibidetzat hartuta, besteak beste. Hirian hasitako lanaren erakusgarri, Asier Abaunza Udaleko Obrak, Hiri-plangintza eta Proiektu Estrategikoetako Zinegotziak ere parte hartuko du biltzarrean.

Foroa astelehen arratsalde honetan hasiko da, Zorrotzaurre ezagutzeko bisita tekniko batekin, aukera handiko espazioa baita. Bertan, bertatik bertara ezagutu ahal izango dute eremu horren garapena, gaur egun hiri-berroneratzearen eta birmoldaketa ekonomikoaren adierazgarri baita, non jasangarritasunak berebiziko garrantzia baitu.

Aukera paregabea da Bilbok hiri-berroneratzearen eredu eta inbertsio jasangarriak egiteko hiri gisa duen konpromisoa in situ helarazteko.  Izan ere, higiezinen inbertsiorako helmuga onenaren saria (Best Real Estate Investment Destination) eman diote berriki Bilbori World Class District Awards 2024 sarietan, Zorrotzaurren hiria berroneratzeko lanaren inguruan aurkeztutako hautagaitzari esker.

ALDEZ AURREKO BILERA HIGIEZINEN SUSTATZAILEEKIN

World Built Environment European Summit 2024 biltzarra abiarazi baino lehen, Juan Mari Aburto Alkateak bilera bat izan du astelehen goizean nazioarteko real estate sektoreko hiru preskriptorerekin, Bilborekin lotura estua dutenak:

  • Adolfo Ramírez Escudero, CBRE Espainia multinazional estatubatuarraren presidentea da 2013tik eta CBRE Latinoamerikaren arduraduna iaztik. Finantzetan lizentziatu zen Deustuko Unibertsitatean.
  • Carlos Ruiz-Garma, Europa hegoalderako Cross Border higiezinen inbertsioen zuzendaria da Savills higiezinen aholkularitzan eta inbertsioen enbaxadorea eta RICS Kontseiluko kidea Espainian. Zuzenbidean lizentziatu zen Deustuko Unibertsitatean.
  • Javier Ochoa Bilbon jaio zen, eta gaur egun Luxury Commercial RE/MAX España nazioarteko higiezinen enpresa zuzentzen du. Espainia eta Latinoamerikarako RICS enbaxadorea da, baita European World Regional Board (EWRB) erakundeko kidea ere.

Hirigintzaren garapenari dagokionez Bilboren egoera lehen eskutik partekatzeaz gain, garapenerako aukerak eta hirigintza- eta higiezin-arloko etorkizuneko lan-ildoak identifikatzeko asmoz, Bilboko Alkate Juan Mari Aburto, Adolfo Ramírez, Carlos Ruiz-Garma eta Javier Ochoak, Udaleko Garapen Ekonomiko, Merkataritza, Turismo eta Enpleguko Zinegotzi Kontxi Claverrekin batera, hiri-inguruneetako joera berriak ere aipatu dituzte eraikuntzari, mugikortasunari, energia-eraginkortasunari eta jasangarritasunari dagokienez. Bileran, halaber, gogoeta egin dute Bilbok real estate sektorean dituen balioei eta markari buruz, bai eta inbertsioak erakartzeko eta lankidetza publiko-pribatua indartzeko aukerei buruz ere, hiribildua Europa mailan erreferente izan dadin.

SARE SOZIALAK:

by

  • Bizkaiko hiru BERC ikerketa zentrok antolatutako Be Zientziaren lehen edizio honetan, Bilboko ikastetxetako 150 ikasle bildu dira.

  • Kontxi Claver, Bilboko Udaleko Ekonomiaren Garapen, Merkataritza, Enplegu eta Turismo zinegotzia, eta Javier Garcinuño, Bilbao Ekintzako zuzendari nagusia, ekitaldian izan dira.

Gaur, urriaren 11n, ostirala, Bilboko Zabalguneko Eraikina Be Zientzia azokaren lehen edizioaren lekuko izan da. Zientzia zabaltzeko azokak hiriko bi ikastetxetako Lehen Hezkuntzako eta DBHko 150 ikasle baino gehiago bildu ditu, jarduera interaktiboz eta zientzia modu dibertigarri eta didaktikoan hurbiltzeko diseinatutako tailerrez betetako goiz batean.

Bizkaiako hiru BERC zentroek, Achucarro Neurozientziako Ikerketarako Euskal Zentroak, BC3 Klima Aldaketari buruzko Ikerketarako Euskal Zentroak eta BCAM Matematika Aplikatuko Euskal Zentroak antolatu dute, eta sorpresaz betetako jardunaldiari hasiera eman diote.

Be Zientziaren lehen edizio honetan ikasle eta irakasleek gogotsu parte hartu dute, eta askotariko jarduerez gozatu ahal izan dute: estatistika, kalkulu-jokoak, papiroflexia logikoa, banana baten DNAren esplorazioa eta ping pong-eko pilotekin egindako karbono-aztarnaren kalkulua.

Ikasleek askotariko gaiei buruz ikasi dute, hala nola klima-aldaketari buruz, garunak animalia-espezie ezberdinetan duen bilakaerari buruz eta matematikei buruz, hiru zentro antolatzaileetako ikertzaile garrantzitsuek emandako tailer praktikoen bidez.

Gainera, goizean zehar, Be Zientzia-k Kontxi Claver, Bilboko Udaleko Ekonomiaren Garapen, Merkataritza, Enplegu eta Turismo zinegotzia, eta Javier Garcinuño, Bilbao Ekintzako Zuzendari Nagusia hartu ditu. Ekitaldia ezagutzeko aukera izan dute, horrela Bilbok zientziarekin eta berrikuntzarekin duen konpromisoa indartuz.

“Eskerrak ematen dizkiegu parte hartu duten ikastetxeei, bai eta ikertzaile- eta antolatzaile-talde osoari ere, elkarrekin egindako lanari esker, laster errepikatuko delakoan baikaude”, adierazi dute Achucarro, BC3 eta BCAM erakundeek.