by

  • Programa erabat berritzailea da, Flandriako Designregio Kortrijk (DKR) erakundearen metodologian oinarritua, eta euskal enpresek planteatutako diseinu-beharrei erantzun nahi die. Deialdi honetan parte hartzeko epea uztailaren 29an amaituko da.

  • Diseinuaren arloko Bilboko profesionalei zuzenduta dago, eta ETEen erronkei erantzuten lagunduko dute urtebetez, produktu edo zerbitzu baten prototipo berritzaile bat garatuz. “5×5 Bilbao” programa 2025ean amaituko da, egindako prototipoen erakusketa batekin.

Udalak, Bilbao Ekintza udal-sozietatearen bitartez, diseinuaren arloko uriko hiru profesional hautatzeko deialdia egin du. Profesional horiek 3 euskal enpresak planteatutako erronkei erantzun beharko diete. “5X5 Bilbao” programaz ari gara. Proiektu erabat berritzailea da, Udalaren eta Flandriako Designregio Kortrijk (DKR) irabazi-asmorik gabeko erakundearen arteko lankidetza-hitzarmena sinatu ondoren Bilbon abian jarri dena. Metodologia horren bidez, diseinua eta diseinuaren arloko profesionalak ekoizpen-katean txertatu nahi dira. Esan beharra dago metodologia hori arrakastaz garatu dela azken bi hamarkada hauetan Kortrijkeko 80 enpresatan baino gehiagotan. Duela bi urte, lehen aldiz, Lituaniako Kaunas hirira zabaldu zen -emaitza positiboekin- eta orain Bilbora dator.

Bilbora egokitutako akordioan, Bilbao Ekintzak eta Designregio Kortrijk elkarteak, EIDEren (Euskal Diseinuaren Elkartea) lankidetzarekin, Bilboko hiru profesionalak aukeratuko dituzte, urtebetez hiru ETEri lagunduko dietenak diseinuaren arloko erronka bati erantzuteko. Programaren barruan Kortrijkeko diseinatzaile bi ere egongo dira, beste bi euskal enpresatan, produktu edo zerbitzu bat garatzen edo birdiseinatzen. Guztira 5 profesional eta 5 ETE, prototipo bat egiteko helburuarekin. Prototipo hori erakusketa batean aurkeztuko da, 2025eko udazkenean, programa amaitzen denean.

NORK HAR DEZAKE PARTE

Diseinuaren arloko edozein profesionalek (autonomoak, enpresa txiki edo ertainak) parte hartu ahal izango du, baldin eta egoitza soziala edo gutxienez lantoki bat Bilbon badu eta gutxienez 5 urteko esperientzia badu.

Eskabideak aurkezteko epea uztailaren 29an amaituko da, 11:00etan, eta hautagaitzak helbide elektroniko honetan aurkeztu beharko dira: sectores@bilbaoekintza.bilbao.eus

Parte hartzeko inprimakia, oinarriak eta deialdi honetako testu osoa Bilbao Ekintzaren webgunean daude eskuragarri: https://www.bilbaoekintza.eus/proyectos.

Besteak beste, hautatutako pertsonak enpresa eta/edo sektore berriekin harremanetan jarri ahal izango dira, eta 12 hilabetez lankidetzan jardun ahal izango dute ETE batekin, premia berriak bilatzeko eta diseinuaren bidez irtenbide berritzaileak ikertzeko; gaitasunak indartu ahal izango dituzte, eta ikusgarritasuna eta hedapena izan; eta, azkenik, 10.000 euroko (BEZa barne) kontraprestazio ekonomikoa jasoko dute.

EUSKADIKO ETEen ERRONKAK BILBOKO HIRU PROFESIONALENTZAT

Programa hau abian jartzeko, Bilbao Ekintza udal-sozietateak, kluster elkarte batzuekin eta, bereziki, EIDErekin (Euskal Diseinuaren Elkartea) lankidetzan, diseinuaren metodologiak erabiliz produktu/zerbitzu berri bat edo funtsezko berrikuntza bat garatzeko interesa izan dezaketen enpresak bilatu eta hautatu ditu.

Premia horietan oinarrituta, enpresa horiek erronka espezifikoak planteatu dituzte, eta Bilboko hiru profesionalek horiei erantzun beharko diete. Hauek dira:

  1. 1.- Ingurumen-bioteknologiaren sektoreko produktu eko-berritzaile bat berriz diseinatzea. Helburuak: hobekuntza estetikoa lortzea hiri-ingurunean integratzeko eta jasangarritasuna hobetzea material berriak aukeratuz eta material horiek mantenduz erabiltzaile-esperientzia erraztea.
  2. 2.- Garbiketa profesionaleko produktu-lerro berri bat diseinatzea. Helburua: jasangarritasunaren eremuan, posizionamendua hobetzea, enbalaje mota berri bat (packaging) eta merkaturatzeko estrategia egokia erabiliz.
  3. 3.- Mugikortasun pertsonalari lotutako laguntza-produktu bat berriro diseinatzea. Helburua: eraginkortasun ekologikoa eta ekonomikoa hobetzea, osagaiak, materialak eta prozesuak optimizatuz tokiko ekoizpena bultzatzeko.

DISEINUA ENPRESETARA ERAMATEA

Bilboko Udalaren eta Designregio Kortrijk DKR erakundearen arteko lankidetzaren lehentasunezko xedea honako helburu hauek lortzea da: enpresei diseinuaren arloko profesionalekin modu egituratuan eta sistematizatuan lan egiteko aukera emango dieten metodologiak ematea; diseinuaren eta enpresaren arteko harremana nabarmentzen duten ageriko emaitzak eskaintzea; diseinuaren kultura eta diseinu-prozesua sustatzea, enpresa-ehunean balio erantsi gisa; eta diseinuaren arloan berritzaileak diren beste hiri batzuekin, kasu honetan Kortrijkekin, harremanak estutzea eta sinergiak sortzea.

BILBO, DISEINUAREN HIRIA, UNESCOK AITORTUA

UNESCOk 2004an sortu zuen Hiri Sortzaileen Sarea, sormena garapen ekonomiko jasangarrirako funtsezko faktoretzat jotzen duten hirien arteko nazioarteko lankidetza sustatzeko helburuarekin.  Sare horretako hiriek elkarrekin lan egiten dute sormena eta industria kulturala izan daitezen tokiko garapen-planen lehentasunezko ardatz.

2014an, UNESCOk “Hiri sortzailea” izendatu zuen Bilbo, “Diseinuaren hiria” kategorian.   Talde horretan, besteak beste, Berlin, Buenos Aires, Pekín, Montreal, Singapur eta Helsinki ere badaude. Kortrijk ere UNESCOren Hiri Sortzaileen Sareko kide da 2017tik.

Designregio Kortrijk (DKR) irabazi-asmorik gabeko erakunde bat da, Belgikako Flandriako Kortrijk eskualdekoa. Sormena, berrikuntza eta ekintzailetza sustatzeko proiektuak kudeatzen ditu, eta enpresen, diseinatzaileen, hezkuntzaren eta espazio publikoaren arloko erakundeen sare bat osatzen du.  2005ean sortu zen, udal arteko lankidetza bati esker, Leiedalen, Voka West-Flanders-eko Merkataritza Ganberaren, Kortrijkeko Udalaren, Howest Unibertsitatearen eta Kortrijk Xpo-ren artekoa, hain zuzen ere.

SARE SOZIALAK:

by

  • Bilboko Udalak, Bilbao Ekintza udal sozietatearen bitartez, lankidetza-hitzarmen bat sinatu du Designregio Kortrijk (DKR) erakundearekin, UNESCOren Hiri Sortzaileen Sarearen barruan.

  • 5X5 Bilbao proiektua udazkenean jarriko da martxan, eta euskal enpresek produktu edo zerbitzu baten prototipo berritzaile bat garatzea ahalbidetuko du, diseinuko profesionalen laguntzarekin.

  • Bilboko diseinatzaileen hautagaitzak jasotzeko deialdia laster irekiko da. “Diseinua enpresen berrikuntza eta lehiakortasunerako zeharkako faktore estrategiko gisa balioetsi nahi dugu“, esan du Xabier Ochandianok.

Bilboko Udalak, Bilbao Ekintza udal sozietatearen bitartez, eta Designregio Kortrijk (DKR) irabazi-asmorik gabeko erakunde flandestarrak lankidetza-hitzarmen bat sinatu dute 5X5 Bilbao programa abian jartzeko.

Hitzarmen hori UNESCOren Hiri Sortzaileen Sarearen barruan kokatzen da, Bilbo eta Belgikako Kortrijk hiria barne hartzen dituena, diseinuaren kategorian. Horrela, Flandriako eskualdean ia bi hamarkada martxan daramatzan programa Hiribilduan ezarriko da lehen aldiz, duela bi urte Lituaniako Kaunas hirian arrakastaz indarrean jarri ondoren.

“Diseinua enpresen berrikuntza eta lehiakortasunerako zeharkako faktore estrategiko gisa balioetsi nahi dugu. Diseinuko profesionalen eta enpresen arteko lankidetza ez da ohikoa, eta uste dugu programa berritzaile honek ekarpen handia egin ahal diola gure hiriari”, azaldu du Xabier Ochandiano Bilboko Udaleko Ekonomiaren Garapen, Merkataritza, Turismo eta Enplegu Zinegotziak. “Honelako ekimenen bidez, Hiribilduko diseinuaren sektorea eta garapen ekonomiko iraunkorra babesten ditugu, metodologia aitzindaria ezarriz eta Bilbori balio handia ematen dioten sinergiak sortuz”.

Udazkenetik aurrera eta urtebetez, diseinuaren arloko 5 profesionalek, Bilboko 3 diseinatzailek eta Kortrijk-eko 2k, produktu edo zerbitzu bat garatzeko edo birdiseinatzeko hautatutako 5 euskal enpresari lagunduko diete, 5X5 diseinuaren metodologiak erabiliz, 5 prototipo garatzeko helburuarekin; prototipo horiek 2025eko udazkenean aurkeztuko dira erakusketa batean. Bilboko 3 diseinatzaileen hautagaitzak jasotzeko deialdia uztailaren erdialdean irekiko da www.bilbaoekintza.eus web orrian.

Diseinatzaileek 12 hilabetez garatu ditzaketen erronkak planteatuko dituzte 5 euskal enpresek, beren esparruko metodologien bidez, eta aurreikusi gabeko premia berriak ikertzeko eta bilatzeko aukera emango dute. Bilbao Ekintza eta Designregio Kortrijk arduratuko dira programaren koordinazioaz eta ondoriozko gastuez, eta EIDE ere, Euskadiko Diseinugileen Elkartea, proiektuaren parte aktiboa izango da.

Bilboko Udalaren eta DKRren arteko lankidetzaren helburua honako hauek lortzea izango da: enpresei diseinuaren profesionalekin modu egituratu eta sistematizatuan lan egiteko aukera emango dieten metodologiak eskaintzea; diseinuaren eta enpresaren arteko harremana nabarmenduko duten emaitza ukigarriak eskaintzea; diseinuaren kultura eta diseinu-prozesua enpresa-ehunean balio erantsi gisa sustatzea; eta diseinuaren arloan berritzaileak diren beste hiri batzuekin harremanak estutzea eta sinergiak sortzea, hala nola, Kortrijk-ekin.

DISEINUAREN HIRIA

Hiri Sortzaileen Sarea 2004an sortu zuen UNESCOk, sormena garapen ekonomiko iraunkorrerako funtsezko faktore gisa identifikatzen duten hirien arteko nazioarteko lankidetza sustatzeko helburuarekin. Hiriek elkarrekin lan egiten dute sormena eta kultura-industriak tokiko garapen-planen lehentasunezko ardatz gisa kokatzeko.

2014an, UNESCOk Bilbo “Hiri Sortzaile” izendatu zuen, “Diseinuaren Hiria” kategorian. Integrazio honek Berlin, Buenos Aires, Pekin, Montreal, Singapur eta Helsinki, besteak beste, biltzen dituen talde hautatu batean parte hartzeko aukera ematen dio. 2017tik UNESCOren Hiri Sortzaileen Sareko kide ere bada Kortrijk.

Designregio Kortrijk (DKR) irabazi-asmorik gabeko erakundea da, Flandriako Kortrijk eskualdekoa (Belgika). Sormena, berrikuntza eta ekintzailetza sustatzeko proiektuak kudeatzen ditu, eta enpresen, diseinatzaileen, hezkuntzaren eta espazio publikoaren sare konektatua osatzen du. 2005ean sortu zen Leiedal, Voka West-Flanderseko Merkataritza Ganberaren, Kortrijkeko Udalaren, Howesteko Unibertsitatearen eta Kortrijk Xpo arteko lankidetza gisa.

SARE SOZIALAK:

by

  • Bilboko Alkateak Mentoring Bilbao programaren XV. edizioaren aintzatespen-ekitaldia gidatu du; bertan, ibilbide profesional garrantzitsua duten 20 mentore omendu dituzte hiriko enpresen eta saltokien alde egindako lanarengatik.

  • “Miresgarria da Bilboren ekonomia-hazkundearen alde eta eskuzabaltasunez beren ezagutza eta esperientzia eskaintzen dituzten mentoreak egotea”, eskertu du Juan Mari Aburtok.

  • 2023/2024 urteetako edizio honetan, 2008an proiektua martxan jarri zenetik mentorizatu direnen eskaera gehien jaso dira, eta 16 mentorek esperientzia errepikatu dute.

Bilboko Udalak gaur egin du Mentoring Bilbao. programaren XV. edizioaren omenaldi-ekitaldia. Bilboko Alkateak, Juan Mari Aburtok, hogei mentoreren ekarpen eskuzabala eskertu du, zeintzuek zortzi hilabetetan zehar beren esperientziak eta egiteko moduak hiribilduko beste enpresa, saltoki eta startup-en eskura jarri dituzten.

Ekitaldi horrekin bukatu da urrian hasi zen 2023/2024 urteetako edizioa; ekitaldia Bilboko Udaletxeko Arabiar Aretoan egin dute, eta profesionalei hausnarketa estrategikoak egiten ari diren hiriko enpresen eta saltokien alde eman duten ezagutza aitortu zaie.

Mentoring Bilbao programak harremanetan jartzen ditu ibilbide profesional garrantzitsua duten profesionalak (mentoreak) eta enpresa-jarduerak Bilbon garatzen ari diren enpresak eta pertsonak (mentorizatuak). “Bilbao Ekintza udal-sozietatearen bitartez, ezagutzen transferentzia eta sinergia programa honen helburua gure hiriko enpresen eta saltokien etorkizunari laguntzea da”, esan du Bilboko Alkateak. “Miresgarria da Bilboren ekonomia-hazkundearen alde eta eskuzabaltasunez beren ezagutzak eta balioak eskaintzen dituzten pertsonak egotea”.

Hamabosgarren edizio honetan orain arteko mentorizatuen eskaera gehien jaso dira, zehazki, 70 eskaera, eta azkenean, mentoreek eta mentorizatuek osatutako hogei bikote sortu dira.

Gainera, 2023/2024 urteetako edizioan parte hartu duten hogei mentoreetatik hamaseik esperientzia errepikatu dute, eta lau berriak izan dira: “Mentore batzuek zortzi edizio daramatzate jarraian laguntzen, eta hori ez da ohikoa bestelako mentoring programetan, eta bereziki eskerrak eman nahi dizkiegu. Gure ustez, proiektuaren egoera osasuntsuaren emaitza da eta, gainera, ibilbide profesional arrakastatsu eta zabala duten mentore berriak ere gehitu dira”.

Juan Mari Aburtok zuzenean aitortu du hogei mentoreen konpromisoa, eta bakoitzari lanpara oso berezi bat oparitu die. Lanpararen oinarria kautxuz egina dago eta teknologia magnetikoari esker, bonbilla igotzen da eta oinarriaren gainean lebitatzen du. “Jakin badakigu zuen laguntzarekin Bilboko enpresa-proiektu askok aurrera egin dutela eta orain hobeak direla. Argi dugu zuek bezalako pertsonek Bilbo argitzen duzuela, eta hausnarketa estrategikoak egiten ari diren negozio askoren itsasargia zarete”.

Mentoring Bilbao programa 2008an jarri zuen martxan Bilboko Udalak, apustu argia eginez mentoring tresnak nazioartean zuen eraginaren alde, eta ordutik aurrera egin diren hamabost edizioetan guztira 215 saltokik eta enpresek beren lehiakortasuna hobetu dute 100 mentore parte-hartzaileren laguntzarekin.

ESPERIENTZIAN OINARRITUTAKO IKASKUNTZA

Urritik aurrera eta zortzi hilabeteetan zehar mentoreak eta mentorizatuak elkarrekin bildu izan dira aurrez aurre eta online, esperientziak, gomendioak eta informazioa partekatzeko. Entzute aktiboan oinarritutako topaketa horien helburua parte-hartzaileen profesionalizazioa hobetzea izan da eta, horretarako, esperientzian oinarritutako ikaskuntza aplikatu da, etengabe ideia berriak gehitzen joan dira eta negozioak hedatzen lagunduko dieten kontaktu-sareak sortu dituzte.

Mentorizatu gisa parte hartu duten enpresa guztiek gutxienez hiru urteko ibilbidea dute eta beharrezkoa da hausnarketa estrategikoko aldian murgilduta egotea. Gainera, askotariko sektoreetan lan egiten dute, besteak beste, diseinu grafikoa, moda, teknologia, arkitektura, barne-diseinua, osasuna, arreta sozio-sanitarioa, aholkularitza eta ingeniaritza eta merkataritza.

Nazioartean oso hedatuta dagoen metodoa da mentoring delakoa; formula eraginkorra da enpresa-proiektu berriak promozionatzeko eta askotariko sektoreetako profesionalek garapen-mailarik handiena lortzeko. Hala, esperientzia handia duten profesionalak beren trebetasun profesionalak hobetu nahi dituztenekin harremanetan jartzen dira.

BILBAO MENTORING CONFERENCE-N VII. EDIZIOA

Bilbao Mentoring Conference-n VII. edizioa urriaren 25ean izango da Euskalduna Jauregian. Bilboko Udalak urtean behin antolatzen duen kongresua da eta, bertan, Mentoring Bilbao programarekin batera, mentoring-ari balioa ematen zaio Bilboko eta inguruko saltokien eta enpresen lehiakortasuna hobetzen laguntzeko eta, modu horretan, hiriaren ekonomia-garapena sustatzeko tresna gisa.

Mentoring Bilbao programari buruzko informazio gehiago, hemen: https://www.bilbaoekintza.eus/empresa/programa-mentoring-bilbao

SARE SOZIALAK:

by

Bilbao Ekintzak, Bilboko Udalaren udal-sozietateak, gonbidatzen zaitu uztailaren 5ean (ostirala) egingo den aurkezpen-jardunaldira, jakin dezazun zure enpresa lehiakorragoa izan dadin nola automatizatu ditzakezun negozio-prozesuak eta nola txertatu dezakezun adimen artifiziala (AA).

Teknologia honen ezaugarriak ezagutu ditzazun nahi dugu, honako eragiketa hauetarako erabili baitaiteke: fakturak prozesatzeko, dokumentuak kudeatzeko, izapide elektronikoak egiteko, edukiak sortzeko, kostuak murrizteko, eta baliorik ez duten eta denbora hartzen duten zeregin errepikakorrak kentzeko.

Lehentasuna emango zaie honako sektore hauetako Bilboko enpresei: ingeniaritza, arkitektura, enpresa-aholkularitza, aholkularitza, gestoria eta osasun-sektoreko enpresei.

Hauxe da jardunaldiaren edukia:

  • Programa osoaren sarrera.
  • Hitzaldia Arrate Jaureguibeitiarekin, BAIC-eko (Euskadiko Adimen Artifizialaren Zentroa) estrategia arduraduna, gorabidean den aipatutako teknologiari, jardunbide egokiei eta hura ezartzeko moduei buruz.
  • Parte hartzen duten enpresei zuzendutako erakusketa, prozesuak automatizatzeari, dakartzan onurei eta erabilera-kasuei buruz, Gorka García Barrero teknologiako aholkulariaren eskutik.
  • Elkarrizketa La Galería eta Ascofi Berria enpresekin, zeinek proiektu berean parte hartu baitzuten 2023. urtean.

Zure negozioan automatizatu daitezkeen prozesuak identifikatu nahi badituzu, animatu eta izena eman.
📆 Data: 2024ko uztailaren 5a
⌚ Ordutegia: 09:00etatik 11:00etara
💻 Tokia: Zabalgune Eraikineko erakustaretoa (Zabalgune plaza 11, Bilbo, 48009).

Izena emateko azken eguna: uztailaren 4an, 12:30ean.

by

Bilbao Ekintzak, Bilboko Udalaren udal-sozietateak, Bizkaiko Foru Ogasunaren lankidetzarekin, Batuz-TicketBai estrategia fiskalaren inguruko eta nahitaez ezartzeko egutegi berriaren inguruko azken berritasunak ezagutzeko enpresa-jardunaldira gonbidatu nahi zaitu ekainaren 4an, asteartea.

Batez ere, estrategia fiskal berri hau aplikatzeko aldiak eta abantailak ezagutu nahi dituzten merkatariei zuzenduta dago.

Jardunaldiak, BATUZ proiektuaren azken berritasunak, ezartzeko egutegia eta pizgarriak aztertu nahi ditu, baita beste gai batzuk azaldu ere, hala nola: fakturak egitea, TicketBai software bermatzailea, sinadura ziurtagiriak, erregistro liburuak eramatea eta zerga aitorpenak aurkeztea.

Jarduera nagusia merkataritza dutenek estrategia hori nahitaez aplikatu behar izango dute 2025. urtetik aurrera. Hala ere, borondatezko aldian sartzeagatik izango dituzun zerga-abantailak jakinarazi nahi dizkizuegu. Aprobetxa ezazu jardunaldi hau nobedade guztien berri izateko! 

JARDUNALDIAREN EGITARAUA 

14:00. Bilbao Ekintzaren aurkezpena.

14:10 – 15:40. Bizkaiko Foru Ogasuneko eta Izenpeko arduradunak: BATUZ/TicketBAI aurkeztea

  • Antonio Pérez Delgado, Bizkaiko Foru Ogasuneko Ikuskaritzako zuzendariordea.
  • Iñigo Egia Ossorio, Bizkaiko Foru Aldundiko Arriskuak Analizatzeko eta Zerga Iruzurraren aurkako Borroka Koordinatzeko zerbitzuburua.
  • Raquel Garay, Proiektu Arloko arduraduna Izenpen (EAEko administrazioen identifikazio elektronikorako plataforman).

15:40. Galderak egiteko txanda

Jardunaldiaren edukia:

  • Ezartzeko egutegi berriaren eta proiektuaren gaur egungo egoera. Aplikatu beharreko araudia.
  • TicketBAI: Fakturak eta eragiketen gainerako justifikazio-dokumentuak igortzea, zenbait betekizun tekniko bete behar dituen fakturazioko software berme-emaile bat erabiliz.
  • BFAk (Egin Zure Faktura) eta Izenpek (Ef4ktur) TicketBAI fakturak igortzeko garatutako doako softwareak.
  • Sinatzeko ziurtagiriak: baldintzatzaileak, aukerak eta egoki aukeratzeko aintzat hartu beharreko alderdiak.
  • Zerga-pizgarriak, sistemara atxikitzeko unearen arabera.
  • Ekonomia-eragiketen erregistro-liburuak egitea (EEEL: 140 eta 240 eredu berriak) Bizkaiko Foru Aldundiaren egoitza elektronikoan.
  • Zerga-aitorpenak aurkeztea zirriborroetatik abiatuta.
  • Zehapen-erregimena, nahitaezko ezarpenetik aurrera aplikatu beharrekoa. 

Jardunaldiari buruzko informazioa:

📆 Eguna: 2024ko ekainak 4

⌚  Ordutegia: 14:00etatik 16:30etara.

💻 Lekua: Bizkaiko Foru Agiritegia (Maria Diaz Haroko kalea 11)

Izena emateko azken eguna: ekainak 3, 13:00k arte, edo leku guztiak bete arte

by

Bilbao Ekintzak, Bilboko Udalaren udal-sozietateak, Bizkaiko Foru Ogasunaren lankidetzarekin, Batuz-TicketBai estrategia fiskalaren inguruko eta nahitaez ezartzeko egutegi berriaren inguruko azken berritasunak ezagutzeko enpresa-jardunaldira gonbidatu nahi zaitu maiatzaren 15ean, asteazkena.

Abokatutzan, psikologian, odontologian, albaitaritzan, fisioterapian edo finken administrazioan diharduten enpresa eta profesionalei dago zuzenduta. Helburua da BATUZ proiektuaren azken berritasunak eta horiek ezartzeko egutegia eta pizgarriak aztertzea, bai eta fakturak igortzeari, TicketBai software berme-emaileari, sinatzeko ziurtagiriei, erregistro-liburuak egiteari eta zerga-aitorpenak aurkezteari buruzko azalpenak ematea ere.

JARDUNALDIAREN EGITARAUA
09:00. Bilbao Ekintzaren aurkezpena.

09:10 – 10:40. Bizkaiko Foru Ogasuneko eta Izenpeko arduradunak: BATUZ/TicketBAI aurkeztea

·       Antonio Pérez Delgado, Bizkaiko Foru Ogasuneko Ikuskaritzako zuzendariordea.

·       Iñigo Egia Ossorio, Bizkaiko Foru Aldundiko Arriskuak Analizatzeko eta Zerga Iruzurraren aurkako Borroka Koordinatzeko zerbitzuburua.

·       Raquel Garay, Proiektu Arloko arduraduna Izenpen (EAEko administrazioen identifikazio elektronikorako plataforman).

10:40. Galderak egiteko txanda

Hauxe da jardunaldiaren edukia:

  • Ezartzeko egutegi berriaren eta proiektuaren gaur egungo egoera. Aplikatu beharreko araudia.
  • TicketBAI: Fakturak eta eragiketen gainerako justifikazio-dokumentuak igortzea, zenbait betekizun tekniko bete behar dituen fakturazioko software berme-emaile bat erabiliz.
  • BFAk (Egin Zure Faktura) eta Izenpek (Ef4ktur) TicketBAI fakturak igortzeko garatutako doako softwareak.
  • Sinatzeko ziurtagiriak: baldintzatzaileak, aukerak eta egoki aukeratzeko aintzat hartu beharreko alderdiak.
  • Ekonomia-eragiketen erregistro-liburuak egitea (EEEL: 140 eta 240 eredu berriak) Bizkaiko Foru Aldundiaren egoitza elektronikoan.
  • Zerga-pizgarriak, sistemara atxikitzeko unearen arabera.
  • Zerga-aitorpenak aurkeztea zirriborroetatik abiatuta.
  • Zehapen-erregimena, nahitaezko ezarpenetik aurrera aplikatu beharrekoa.

Jardunaldiari buruzko informazioa:

📆Eguna: 2024ko maiatzaren 15a, azteazkena.

⌚Ordutegia: 09:00etatik 11:30era.

💻Lekua: Bizkaiko Foru Agiritegia (Maria Diaz Haroko kalea 11)
Izena emateko azken eguna: maiatzaren 14a, 13:30era arte, edo leku guztiak bete arte

by

Bilbao Ekintzak, Bilboko Udalaren udal sozietateak, Saltokientzako eta enpresa txiki eta ertainentzako aholkularitza-zerbitzua ezagutzeko jardunaldira gonbidatzen zaitu.

Egungo enpresa-testuinguruan, hazkunderako eta oparotasunerako gakoa erabaki informatuak eta estrategikoak hartzean datza. Horretarako, funtsezkoa da negozioari balio bereizgarria emango dion gida-zerbitzu bat izatea, horri esker, negozioaren garapen ekonomikoa bultzatuko baita.

Saltokientzat eta enpresa txiki eta ertainentzat enpresa-hazkundea sustatzen duten profesional adituak izateak dakartzan onuren berri emango dugu. Horretarako, Bilboko Udalak % 100ean diruz lagundutako programa honetan parte hartu duten negozioen lekukotzak emango dira.

  • Aso Kabinetea. (Neuropsikologian oinarritutako terapien bidez ikasteko zailtasunetan espezializatutako kabinete pedagogikoa) – Marketin- eta komunikazio-aholkularitza.
  • Hand Bilbao. (goiko gorputz-adarreko lesioen errehabilitazioan espezializatutako zentroa, batez ere eskukoak eta eskumuturrekoak) – Finantza- eta ekonomia-aholkularitza. 
  • Gregorio Martín janari-denda. (Bakailaoaren eta kalitatezko beste produktu batzuen salmentan espezializatutako Alde Zaharreko saltokia, ehun urte beteak dituena) – Aholkularitza teknologikoa. 

Ondoren, kafe-networking bat egongo da, zerbitzuko Teknikariekin eta aholkulariekin.

 

JARDUNALDIARI BURUZKO INFORMAZIOA
  • Data: 2024ko martxoaren 13a, asteazkena
  • Ordutegia: 09:00etatik 11:00etara.
  • Lekua: Zabalgune eraikina, Zabalgune plaza 11, Bilbo.

 

IZENA EMATEA DOAKOA DA. LEKU-KOPURU MUGATUA.

by

  • Aurreko edizioan kategoria honetako Top 10ean sartu ondoren, Bilbok sei posizio igo ditu eta laugarren postuan dago ranking ospetsu honetan. Ranking honek Europako 370 hiri baloratzen ditu, atzerriko inbertsio zuzena erakartzeko, atxikitzeko eta handitzeko duten gaitasunaren arabera.

  • Bilboko Udalak arlo honetan egindako lanaren aintzatespen garrantzitsua da eta hiribilduak jauzi nabarmena egin du tamaina handiko hirien artean lehiatzera igaro eta urtebetera.

  • fDi Intelligence Financial Times argitalpenaren atal bat da, atzerriko inbertsioaren nazioarteko joerak zehatz-mehatz aztertzen espezializatua, eta erakundeei eta enpresei datu eta aholkularitza espezializatuak eskaintzen dizkie lehiakortasuna eta posizionamendua hobetzeko.

Bilbo tamaina handiko laugarren hiri europar moduan aintzatetsia izan da atzerriko inbertsio zuzena erakartzeari dagokionez, Financial Times argitalpen britainiarreko fDi Intelligence aldizkariaren European Cities and Regions of the Future 2024 rankingaren arabera.

Rankingak Europako 370 hiri baloratzen ditu atzerriko inbertsio zuzena erakartzeko, atxikitzeko eta handitzeko gaitasunaren arabera, eta tokiko gobernuek kanpoko inbertsioa sustatzeko egiten duten lan integrala ebaluatzen du, hiri bakoitzak arlo horretan duen potentziala ezarriz.

Rankinga egiteko, fDi Intelligencek 80 adierazle baino gehiago erabiltzen ditu, bost kategoriatan banatuta: potentzial ekonomikoa, giza kapitala eta bizimodua, errentagarritasuna, konektibitatea eta negozioak egiteko erraztasuna.

Xabier Ochandiano Bilboko Udaleko Garapen Ekonomiko, Merkataritza, Turismo eta Enplegu Zinegotziak aintzatetsi duenez, “oso pozgarria da hain argitalpen entzutetsuek Bilbo nazioarteko garapen ekonomikoaren erreferente gisa kokatzea eta talentua erakarri eta fidelizatzearen aldeko apustua egiten duen hiri moduan hain era positiboan balioestea. Hainbat eragilerentzat etorkizun moderno eta erakargarria duen Bilboren alde lanean jarraitzen dugu”.

Bilbok sei postu egin ditu gora, joan den urtean sailkapen horretako Top 10ean sartu ondoren; izan ere, iaz sartu zen lehen aldiz “tamaina handiko hiriak” kategorian. Sailkapen horretan 500.000 biztanletik gorako herriak sartzen dira, baita milioi bat biztanletik gorako metropoli-eremua dutenak ere.

Sailkapenean izan duen hobekuntza Bilboko Udalak ekonomia-sustapenaren arloan egindako lanaren aintzatespena  da eta, bereziki, hiriko aukera-eremu nagusia den Zorrotzaurreko Berrikuntzako Hiri Barrutiaren (ZBHB) garapenean aurrera egiteko burutu duen lana. Ildo horretatik mugarri gisa nabarmentzen dira Bizkaiko Parke Teknologikoaren etorkizuneko hiri-campusaren obren hasiera, uhartearen 2. faseko Hitzarmen Batzordearen eraketa edo Hiri-Garapen Jasangarri Integratuko Estrategia gauzatzearen bidez jasangarritasunaren alde egindako apustua.

Aipatutako ranking-ari dagokion sari-banaketa martxoaren 12an egingo da, MIPIM – The Global Urban Festival higiezinen azokaren barruan. Azoka hori Cannesen izango da, hilaren 12tik 15era bitartean.

FINANCIAL TIMES EGUNKARIAK 2016AN NABARMENDU ZUEN BILBO LEHEN ALDIZ

Financial Times taldeak Bilbori egindako aitorpenen historia 2016an hasi zen. Orduan bi aldiz saritu zuen hiribildua fDi Strategy Awards sarietan, Smart City eta Education Cluster kategorietan, hiri adimendunaren eredu baterantz aurrera egiteko eta ezagutzan oinarritutako garapena sustatzeko Bilbok egindako apustuagatik.

Argitalpena Atzerriko Inbertsio Zuzenaren arloan mundu mailako fluxuak eta joerak aztertzen dituen nazioarteko aldizkaririk garrantzitsuena da. Financial Times nazioarteko liderra da informazio ekonomikoan eta bere aintzatespenak benetako kalitate-zigilua dira aipamen hori jasotzen duten hirientzat.

SARE SOZIALAK:

by

  • Udalak, Bilbao Ekintza erakundearen bitartez, eta BCAM – Matematika Aplikatuko Euskal Zentroak, elkarrekin lan egingo dute BILBOMATH proiektuan, nazioartekotze-jarduerak, barreiadura eta berrikuntza sustatzeko.

  • Hitzarmen berri honekin, bi erakundeek beste urrats bat eman dute beren arteko harremanean, eta loturak sendotu dituzte ekintza berriak garatzeko, dibulgatzeko eta talentua erakartzen jarraitzeko.

Bilboko Udalak eta BCAM – Matematika Aplikatuaren Euskal Zentroak, Eusko Jaurlaritzako Hezkuntza Sailari atxikita, lankidetza indartu dute, nazioartekotze, barreiatze eta berrikuntza jardueren sustapenean jarritako fokuarekin hitzarmen bat sinatuz.

Bilboko Udalak eta BCAM-ek – Matematika Aplikatuaren Euskal Zentroak, lankidetza indartu dute, nazioartekotze, barreiatze eta berrikuntza jardueren sustapenean jarritako fokuarekin hitzarmen bat sinatuz.

BCAMek – Matematika Aplikatuko Euskal Zentroak, eta Bilboko Udalak, Bilbao Ekintzaren bitartez – Bilborako aberastasun ekonomiko eta soziala sortzea sustatzen duen udal erakundea –, BILBOMATH proiektuan elkarrekin lan egingo dute. Proiektu horrek sei helburu ditu:

  • BCAM-ek Innolab berrikuntza irekiko plataforman eta beste berrikuntza-ekimen batzuetan parte hartzea.
  • Matematika gizartera eta gazteriara hurbiltzeko programak garatzen eta matematika irakasten laguntzea.
  • Nazioarteko ekitaldietan elkarlanean aritzea.
  • BCAM-ek dibulgazio-programetan parte hartzea.
  • BCAM-ek matematikako nazioarteko biltzarrak eta ekitaldiak antolatzea.
  • Sinergiak bilatzea, diziplina anitzeko eta nazioarteko ikerketa-espazioak indartzeko.

Bilboko Udalak eta BCAMek ibilbide luzea dute lankidetzan, dibulgaziotik  hasita eta Europako esparruan ikerketa-proiektuak batera proposatzeraino.  Horren adibidea da, BCAM-ek BilbaoTIKekin egiten duen lana  datuen analisian, BCAM-eko Ezagutza Transferitzeko Unitatetik,  Bilboko tranbiaren erabiltzaileak profilatzeko.  Matematikako zentroak Innolab Bilbaoko bazkidea da, Bilboko Udalak sustatutako berrikuntzarako plataforma.

Orain, joan den abenduan sinatutako hitzarmen berri honekin, bi erakundeek beste urrats bat eman dute, ekintza eta proiektu berriak garatzeko loturak sendotuz, berritzen jarraitzeko eta talentua hirira erakartzeko, aurrerapen eta berrikuntzarako motor gisa.

BCAM – MATEMATIKA APLIKATUAREN EUSKAL ZENTROARI BURUZ

BCAM Bilbon egoitza duen diziplinarteko ikerketa-zentroa da, Eusko Jaurlaritzako Hezkuntza Sailak sustatua, eta BERC (Basque Excellence Research Centers) sarearen parte da.

2008an sortu zuen Eusko Jaurlaritzak, Ikerbasque-ren bidez, eta bere helburu nagusietako bat da, ezagutzaren transferentziaren bidez, matematika gizartearen zerbitzura jartzea, ikerketaren emaitzak biozientziak, osasuna, energia edo fabrikazio aurreratua bezalako sektoreetara hedatuz, eta tokiko eta nazioarteko erakunde eta enpresekin batera lan eginez.

Zentroak, gaur egun, 34 naziotako 186 ikertzaile ditu, eta hirutan jaso du Severo Ochoa saria (2013an, 2018an eta 2021ean), Estatuko Ikerketa Agentziak emandakoa, BCAM Europako erakunde garrantzitsuenetako bat dela finkatzen duena.

BCAMeko bazkideak, Bilboko Udalaz gain, Ikerbasque, Innobasque, Univesidad del País Vaco/Euskal Herriko Unibertsitatea (UPV/EHU), Bizkaiko Foru Aldundia eta Petronor Innovación S.L. dira.

by

  • Egoitza berriaren helburua da Bilbo-Bizkaia AAren esparruan teknologia digital aurreratuen hub gisa indartzeko laguntzen jarraitzea, talentuaren hazkundea erakarri eta bultzatzea, Euskadiren eta bere enpresen gaitasun zientifiko-teknologikoa indartzeko eta berrikuntzaren bidez enpresa-ehunaren trantsizio digitalean eta jasangarritasunean laguntzea.

  • Juan Mari Aburto Bilboko alkateak, Estíbaliz Hernáez Eusko Jaurlaritzako Teknologia, Berrikuntza eta Eraldaketa Digitaleko sailburuordeak eta Udaleko eta Bizkaiko Foru Aldundiko ordezkariek, besteak beste, bulegoak bisitatu dituzte, eta instalazio berrietan garatzen ari diren hainbat sektoreri aplikatutako adimen artifizialeko proiektu ezberdinak ezagutu dituzte.

Vicomtech Zentro Teknologikoak, Visual Computing & Interaction, Adimen Artifizialeko teknologia digitalen ikerketan, aplikazioan eta transferentzian espezializatuak, Zorrotzaurreko egoitza inauguratu du. Ikerketan aritzen diren 250 profesional baino gehiagorekin eta Donostiako Parke Zientifiko eta Teknologikoan 20 urte baino gehiagoko ibilbide eta hazkundea izanda, Bilboko Zabalgunean bi urte eman ondoren, Vicomtech Zentroak atal berri bat ireki du Zorrotzaurreko Erribera 2 Eraikineko instalazioetan, Bilboko Udalaren eskutik.

Lankidetza horrekin, hedatzen jarraitzeaz gain, abangoardiako instalazioak eskaintzen ditu, laster erronka teknologiko berriei aurre egiteko, Bilboko Vicomtechen lan egiten duten pertsonekin eta datozen hilabeteetarako aurreikusitako langile berriekin batera. Horrela, epe luzeko apustu estrategiko batean aurrera egingo da, lurraldeko enpresa gehiagori teknologia horiek baliatzen jarraitzeko aukera emango diena, Euskadiko hiriko lehen zentro teknologikoaren bidez.

Horrela, zentroak helburu estrategikoak lortzen laguntzen du, Bilbo-Bizkaia AAren esparruan teknologia digital aurreratuak sortzeko eta transferitzeko hub gisa indartzeko, talentua erakartzeko eta hazteko, Euskadiren eta bere enpresen gaitasun zientifiko-teknologikoa indartzeko, eta enpresa-sarearen trantsizio digital-jasangarri bikoitzari laguntzeko, berrikuntzaren bidez, adimen artifiziala bezalako teknologia erabakigarriari esker.

Zentro teknologiko horren Zorrotzaurreko egoitzaren inaugurazioa dela eta, Juan Mari Aburto Bilboko alkateak ekitaldiari hasiera eman dio gaur, eta itxiera instituzionala Estíbaliz Hernáez-ek Eusko Jaurlaritzako Teknologia, Berrikuntza eta Eraldaketa Digitaleko sailburuordeak eman dio. Jarraian, instalazio berriak bisitatu dituzte eta iritziak trukatu dituzte Jon Ander De Las Fuentes presidentearekin, Julián Flórez zuzendari nagusiarekin eta Agustín Zubillaga Bilboko egoitzako zuzendariarekin, baita gainerako lantaldekoekin ere. Alkateak pozik agertu da Vicomtech Zentroak “Zorrotzaurre aukeratu duelako egoitza Bilbon jartzeko, eta amets bilbotar honetan sinisteagatik: Hiribilduko eremu hau Talentuaren, Ezagutzaren eta Aukeren uharte bihurtzea da, non gazteek eta profesionalek prestakuntza jaso eta beren enpresa-ekimenei aurre egin ahal izango dieten edo beren karrera profesionalak garatu ahal izango dituzten”.

Bestalde, Vicomtech-eko presidenteak adierazi duenez, enpresei teknologia transferitzeko eta ikertzaile espezializatuak prestatzeko duen misioari jarraiki, eta Euskadiko ekoizpen- eta enpresa-ehunetik hurbil dagoela berretsiz, Vicomtech-en egoitza berria beste urrats bat izango da norabide horretan. Horretarako, lankidetza estuan jarraituko du beste ezagutza-eragile batzuekin, enpresa-lankidetzako eragileekin eta administrazioekin, inguruko garapen teknologikoan laguntzeko.

ZENTRO BERRIRAKO KONTRATAZIOA

Zentroak, azaldu dutenez, ikerketa industrial aplikatuari lotutako STEAM profilak dituzten pertsonak kontratatzea eta haien bulegoetan pixkanaka sartzea aurreikusten du, lantaldeak indartzeko eta handitzeko eta enpresei konponbideak ematen jarraitzeko, hurbiltasunez eta eraginkortasunez.

Alkatearen bisitan, hirian ezartzeko estrategia ere aurkeztu dute, baita zentroak garatzen dituen eta orain Zorrotzaurreko egoitza berritik indartuko diren ikerketa-ildoak ere.

VICOMTECH-I BURUZ

Vicomtech irabazi asmorik gabeko fundazio pribatua da, eta Zientzia, Teknologia eta Berrikuntzaren Euskal Sarean dago, Adimen Artifizialean, Visual Computing & Interactionen espezializatutako Ikerketa Aplikatuko Zentro Teknologiko gisa. Vicomtech 2001ean sortu zen, eta gaur egun ikerketan lan egiten duten 250 profesionalek baino gehiagok osatzen dute. Vicomtech-en teknologia digitalak ikertu eta garatzen dira, betiere merkatuaren eskariari erantzunez eta enpresei beren prozesuak eta lehiakortasuna hobetzen laguntzen duten irtenbide berritzaileak emanez.

Vicomtech BRTA (BASQUE RESEARCH & TECHNOLOGY ALLIANCE) erakundeko kidea da, eta kudeaketa integraleko metodologia propioa eta erreferentea du, kontrastatutako ereduetan oinarritua, prozesuak optimizatzea eta enpresei teknologia gardentasunez transferitzea bermatzen duena. Vicomtech Zentroak hainbat ziurtagiri eta aintzatespen ditu, hala nola HR Excellence in Research, ISO22301, ISO 27001, ISO 14001, ISO 9001 eta UNE 166002.

SARE SOZIALAK: