by

  • Bilbo estatuko lehen hiria da beste behin Global Destination Sustainability (GDS) nazioarteko sailkapenean; zerrenda horrek gizarte-, ekonomia- eta ingurumen-jasangarritasunerako baterako estrategiak sortzeko konpromisorik handiena duten 100 hiriak sailkatzen ditu.

  • Iaz 24. postua lortu ondoren, hiriak sekulako jauzia eman du eta 14. postuan sailkatu da; hala, Paris, Berlin eta Dublin hiriburuak aurreratu ditu, besteak beste, eta Europa erdialdeko eta hegoaldeko hirugarren hiria da Bordele eta Zurichen atzetik.

  • Kontxi Claver, Bilboko Udaleko Garapen Ekonomiko, Merkataritza, Enplegu eta Turismo Zinegotzia: “Albiste bikaina da gure hiriarentzat bilerak, hitzaldiak eta kongresuak egiteko helmuga iraunkor gisa“.

Bilbok hamalaugarren postua lortu du 2024ko Global Destination Sustainability (GDS) nazioarteko sailkapenean; horiek horrela, azken urtean hamar postu egin du gora, 2023ko urrian 24. postuan geratu ostean. Aste honetan Brujasen egin duten 2024ko GDS Foroan ezagutzera emandako emaitza horri esker, Bilbo Estatuko lehenengo hiri gisa sailkatu da beste behin sailkapen honetan, non gizarte-, ekonomia- eta ingurumen-jasangarritasunerako baterako estrategiak sortzeko konpromisoa hartu duten mundu osoko ehun hirik baino gehiagok parte hartzen duten.

“Aparteko lorpen honen bidez, Bilbok Paris, Berlin eta Dublin hiriburuak aurreratu ditu besteak beste, baita Bartzelona hiria ere”, baloratu du Bilboko Udaleko Garapen Ekonomiko, Merkataritza, Enplegu eta Turismo Zinegotzi Kontxi Claverrek. Sailkapena eskualdeka banatuz gero, Bilbok Europa erdialdeko eta hegoaldeko hirugarren postua eskuratu du, eta Bordele eta Zurich baino ez ditu aurretik.

Sailkapeneko puntuazioak emateko kontuan hartu da hiriek zenbait alderditan egindako ahaleginak, hala nola mugikortasun jasangarrian, emisioen murrizketan, uraren kudeaketan edo gizarte-ongizatean eta inklusioan egindakoak, bai eta turismo-sektoreko ekimen espezifikoak ere, esaterako, hotel-establezimenduei eta jatetxeei zuzendutako hondakinak gaika biltzeko programa berria.

Helsinki, Göteborg, Kopenhage, Bergen, Aarhus, Bordele, Singapur, Oslo, Belfast, Sydney, Aalborg, Glasgow eta Zurichek lortu dituzte lehen hamahiru postuak 2024ko sailkapenean, zeinak aipatutako alderdiei lotutako 75 itemen bidez hiriak ebaluatu dituen. Aurtengo emaitzak jauzi handia dakarkio Bilbori 2021ean lortutako 42. postuarekiko, urte horretan Global Destination Sustainabilityrekin bat egin baitzuen.

Indize horretan parte hartzeak, Bilboko Udalaren bidez eta Bilbao Convention Bureauren (BiCB) eskutik, helburu du garapen jasangarria hobetzeko dinamika bat ezartzea eta tokiko eragileek jasangarritasunaren arloan egiten duten lana aintzatestea.

GDS ETA GJH

Global Destination Sustainability indizeak, hain zuzen ere bilerak, pizgarri-bidaiak, hitzaldiak eta erakustaldiak (MICE) egiteko helmuga jasangarrien nazioarteko sailkapena egiten duenak, funtsezkotzat jotzen du 2030 Agendaren Garapen Jasangarrirako Helburuekin (GJH) bat egitea, 71 itemen bidez.

Bilbao Convention Bureau Garapen Jasangarriaren Helburuen (GJH) alde ari da lanean 2021etik, Bilbao Arima Berdea lan-batzordea abian jarri zenetik. Batzorde hori gizarte-eragileek, enpresek, unibertsitateek eta erakundeek osatzen dute, eta Bilboko ingurumen-, ekonomia- eta gizarte-jasangarritasunaren alde batera lan egitea dute xede. Era berean, BiCBk ziurtapen-programa bat du abian elkartekideentzat, Biosphere-ren bidez. Turismoaren sektoreko nazioarteko erreferentea da, eta GJHen aldeko ekintzekin enpresa, erakunde edo helmugek duten konpromisoa ikuskatzen du. Entitateak berak maiatzean lortu zuen ziurtagiria, eta Bilboko MICE sektorearen eragin positiboa optimizatuko duen legatu-proiektu bat garatzen ari da.

GDS indizea, Nazioarteko Kongresu eta Konbentzioen Elkarteak (ICCA), IMEX Groupek, European Cities Marketingek (ECM) eta MCI Groupek elkarlanean prestatutakoa, helmuga jasangarrien mugimenduan biltzen da, zeinak sektoreko profesionalak elkarrekin lotzen dituen gizartearekiko, ekonomiarekiko eta ingurumenarekiko leku jasangarriagoak izan daitezen lortzeko estrategiak sortzeko.

SARE SOZIALAK:

by

  • Bilbao Bizkaia Turismo Estrategia 2030-en esparruan, “Bilbao Bizkaia-Match Asia” ekimena gaur hasi eta larunbata bitartean egingo da, nazioarteko turoperadoreek Bilbao Bizkaiaren erakargarritasun turistikoak bisitatu eta lan- eta networking-jardunaldiak partekatu ditzaten.

  • Proiektu horren bidez, Bilbao Bizkaiak sendotu egin du aukera handiko merkatuetan sustapena sakontzeko eta liderra izateko asmoa, besteak beste, Japonian, Hego Korean, Taiwanen, Malaysian, Singapurren, Thailandian, Filipinetan eta Indonesian.

  • Lehen aldia da Asiako nazioarteko eragileak Bilbao Bizkaian biltzen direla, alderantzizko turismo-sustapeneko jardunaldi batzuetan, nazioarteko posizionamendua sendotzeko eta helmugaren irudia indartzeko.

Bilbao Bizkaia Turismo Estrategia 2030-en esparruan antolatutako “Bilbao Bizkaia-Match Asia” proiektuari esker, merkatu asiarreko nazioarteko 42 eragileri zuzendutako jardunaldi batzuk egingo dira gaurtik larunbatera arte, Bilbao Bizkaiak nazioarteko helmuga turistiko gisa duen posizioa indartzeko. Ekimen berritzailea da, eta horri esker Asiako merkatuarekin lankidetzan aritzeko eta elkarrekin lan egiteko bideak aztertuko dira, baita aukera-merkatu horien inguruko erronkak eta beharrizanak partekatu ere.

Alderantzizko turismo-sustapeneko jardunaldi horiek bost egun iraungo dute. Egun horietan, bisita teknikoak egingo dira Bilbon eta Bizkaian, baita topaketa profesionalak eta networking-a ere. Proiektuan parte hartzen duten 42 pertsona horiek Bilbao Bizkaiarentzat interesgarriak eta estrategikoak direlakoan hautatutako merkatuetako profesionalak dira.

Hori dela eta, eta 2022an Europako, AEBetako eta Indiako 54 turoperadorerekin alderantzizko turismo-sustapeneko lehen jardunaldiak egin ondoren, aurten, Bilbao Bizkaiak Japoniako (10 eragile), Hego Koreako (8 eragile), Taiwango (6 eragile), Malaysiako (2 eragile), Singapurreko (6 eragile), Thailandiako (3 eragile), Filipinetako (4 eragile) eta Indonesiako (3 eragile) turismo-sektoreko profesionalak hartuko ditu lehen aldiz.

Bilbao Bizkaian turismoaren nazioartekotzea eta desestazionalizazioa bilatzeko erronkarekin, Asiako merkatuek dute batez besteko egonaldi eta gastu handiena helmugan. Turespañak egindako merkatu-azterketetatik ateratako zenbait daturen arabera, Japonia bigarren merkatua da bisitari-gastuaren munduko rankingean Estatuan (3.371 euro). Bestalde, Hego Korea hirugarren merkatua da bisitari-gastuaren munduko rankingean Estatuan (2.898 euro), eta hazkunde-potentzial handia du Euskadin.

BISITAK, ERAKUSTALDIAK ETA WORKSHOP-A 

42 bidaia-antolatzaileen egonaldia gaur bertan, asteartea, hasiko da, eta San Mames futbol estadiora bisita gidatu bat egiteaz gain, Athletic Club-en museora bisita profesional bat ere egingo dute.

Bihar, asteazkena, urriak 16, goizean, hiru taldetan banatuta, Bilboko leku esanguratsuenetako batzuk bisitatuko dituzte: Abandoibarra, Alde Zaharra, Artxanda eta Moyua, besteak beste. Arratsaldean, Getxoko Portu Zaharrean eta Portugaleteko Bizkaia Zubian izango dira.

Urriaren 17an, osteguna, taldeetako batek Urdaibaiko inguruneaz gozatuko du (Omako Basoa, Santimamiñe, Gernika, Gaztelugatxe); bigarren taldeak Loizaga Dorrera eta Balmasedara egingo du bisita, eta hirugarren taldeak Lekeition hasiko du eguna eta, euskal herri-kirolen erakustaldi batez gozatu ondoren, arratsaldean Urkiolara joango dira.

Bilboko eta Bizkaiko erakargarritasun turistikoak ezagutu ondoren, urriaren 18an, ostirala, Euskalduna Jauregiak workshop bat hartuko du, eta, amaitzeko, networking topaketa bat egingo da Bilboko eta Bizkaiko sektoreko eragile nagusiekin.

“Bilbao Bizkaia-Match Asia” programari esker, negozio-harreman berriak sortuko dira Bilbao Bizkaiko turismo-sektoreko enpresen (ostatuak, hartzaile-agentziak eta turismo-zerbitzuen enpresak) eta Asiako bitartekarien artean. Horrela, helmuga aktibatuko da eta tokiko turismo-eskaintza dinamizatuko da.

SARE SOZIALAK:

by

  • Polonia bisitariak erakartzeko aukera handiko merkatu europarra dugu; izan ere, astean bitan zuzeneko konexioa dago Bilboko eta Varsovia hiriburuko aireportuen artean.

  • Bilbao Bizkaia helmuga aurkezteaz gain, hiriko eta lurraldeko 20 enpresatako ordezkariek workshop bat egin dute, eta harreman komertzialak ezarri dituzte 94 agente eta turismo-operadore poloniarrekin.

  • 2024ko azken lauhilekoko ekintza-planaren esparruan Bilbao Bizkaiako ordezkaritzak aurreikusita zituen bisitetan lehena izan da; planak toki estrategikoetan turismoa sustatzea du helburu.

Varsoviak Bilbao Bizkaia helmugaren aurkezpena hartu du. Horrez gain, workshop bat ere antolatu da hiriko eta lurraldeko 20 enpresarekin, besteak beste, harrera-agentziekin eta ostatuekin, non harreman komertzialak ezarri diren 94 agente eta turismo-operadore poloniarrekin. Horrez gain,
Turespañako bulegoaren lankidetzarekin antolatutako ekitaldian, herrialde anfitrioiko 29 kazetari izan dira aurkezpenean, eta bertatik bertara ezagutu dituzte Hiribilduko eta lurraldeko erakargarritasun nagusiak.

Polonia bisitariak erakartzeko aukera handiko merkatu europarra da; izan ere, astean bitan zuzeneko konexioa dago Bilboko eta Poloniako hiriburuko aireportuen artean martxoa eta urria bitartean. Bilbao Bizkaia helmuga, gainera, bat dator turista poloniarraren profilarekin eta motibazioekin, interesa baitute kultura- eta hiri-turismoan, turismo gastronomikoan, zikloturismoan edo mendi-ibilietan, hain zuzen ere Bilbao Bizkaia helmugak eskaintzen dituenak eta Poloniako merkatuan interes handia sortzen dutenak.

Bilbao Bizkaia 2030 Turismo Estrategiaren esparruan, 2024ko azken lauhilekorako ezarritako lan-planaren lehen geldialdia dugu Varsoviakoa. Estrategia horren helburu nagusiak jasangarritasuna, digitalizazioa eta berrikuntza dira, horiek baitira bisitariak erakartzeko eta lehiakorragoa eta ingurunearekiko errespetutsuagoa izango den sektore bat garatzeko funtsezko elementuak, guztion ongizatean eragina izango dutenak.

HURRENGO HITZORDUAK

Urriaren 1etik 4ra bitartean, Bilbao Bizkaiaren ordezkaritza bat izango da Aronan (Tenerife) egingo den Turespañako III. Konbentzioan; urriaren 8tik 10era bitartean, Herbehereetara eta Belgikara joango da ordezkaritza, eta urriaren amaieran, Basquetourrek Mexikon antolatutako workshop-ean parte hartuko du. Bilbo turismo-helmuga jasangarri eta kalitatezko gisa zaintzeko eta garatzeko estrategikoenak diren helburuen artean Bilbao Bizkaia sustatzea xede duen ibilbide horretan, hurrengo tokietara ere joango da: Londresko World Travel Market, Valladolideko B2C eta Intur Negocios azoka, Turespañak Italian antolatutako roadshow bat, Stockholmeko Travelnews Market eta Cannes hiriko ILTM azoka.

SARE SOZIALAK:

by

  • Taldea Estatuko ordezkaria izango da Spliten (Kroazia) egingo den European Blues Challenge 2025 jaialdian.

  • Musika lehiaketa handi hau Bilboko Udalak bultzatutako Bilbao Blues Festival-aren hirugarren edizioaren barruan kokatzen da.

Tòfol Martínez Blues Band izango da datorren urtean Spliten (Kroazia) egingo den European Blues Challenge-ko Estatuko ordezkaria. Beste hiru finalistei (Del Toro Blues Band, Sirjo Cocchi & Balta Bordoy-The Blues Way eta The Lazy Tones) gailendu zaie Volotea Blues Challenge jaialdiaren hirugarren edizioko lehiaketan eta atzo egin zen lehen aldiz Bilbon.

Talde irabazlearen liderra, Tòfol Martínez, ahots hautsi aratz eta magnetikoa duen abeslari eta gitarrista bat da, Gerard Nietorekin batera agertokia partekatzen duena organoan eta ahotsetan, Cobre baxuan eta Agustí Borrell baterian. Tòfol, ibilbide zabaleko benetako bluesmanak, zuzeneko kementsu eta biziak eskaintzen ditu, atzo Challengean ikusleek gozatu ahal izan zutena bezalakoak.

Bilbao Blues Festival-ek, Bilboko Udalak bultzatuta, Ibai Garcia Blues Project (19:00), Texas Blues Guitar Summit feat, Anson Funderbourgh, Mike Morgan eta Shawn Pittman (20:45) eta Southern Avenue (22:30) taldeen kontzertuekin jarraituko du gaur.

Areatza izango da musika-ekitaldi handi honen erdigunea uztailaren 28ra arte, igandea, eta lehen mailako emanaldiak eskainiko dituen doako programazioa izango du: The Fabulous Thunderbirds, D.K. Harrell, Ana Popovic, Martha High & The Soul Cookers, Annika Chambers, Terrie Odabi, Chino Swingslide Trío, Ivan Singh eta Kid Carlos Band.

PROGRAMA

Ostirala 26

Areatzako agertokia
19:00 | Ibai Garcia Blues Project
20:45 | Texas Blues Guitar Summit feat. Anson Funderbourgh, Mike Morgan eta Shawn Pittman
22:30 | Southern Avenue

Larunbata 27

Oro agertokia
12:30 | Chino Swingslide Trío
14:00 | Shawn Pittman
Areatzako agertokia
19:00 | Martha High & The Soul Cookers
20:45 | D.K. Harrell
22:30 | The Fabulous Thunderbirds

Igandea 28

Oro agertokia
11:00 | Clases de baile Boogie Woogie
12:30 | Kid Carlos Band
14:00 | D.K. Harrell

Areatzako agertokia
19:00 | Ivan Singh
20:45 | Rockin’ Soul Sistas featuring Terrie Odabi & Annika Chambers Paul DesLauriers-ekin
22:30 | Ana Popovic

by

  • Massive Attack, The Prodigy, Grace Jones, Underworld, Arcade Fire, Jungle, Air, Los Planetas, Khruangbin, Meute, Parcels, Floating Points, Kiasmos, Slowdive eta El Columpio Asesino taldeak tartean, 100dik gora artista arituko dira zuzenean, beste urte batez Bilbo nazioarteko kulturaren erdigunean jarriko duen jaialdian.

  • Bereziak ekimenean guztiontzako moduko artistak arituko dira, doan: Martin Urrutia, La Habitación Roja, Barry B, Nudozurdo eta beste talde asko igoko dira hiriaren erdialdean kokatuko diren 4 agertokietara.

  •  Ordutegiei, garraioari eta eskumuturrekoak jasotzeari buruzko Informazio guztia kontsulta daiteke jada jaialdiaren webgunean eta aplikazioan.

  • Lehen aldiz, jaialdiaren aurkezpena espazio berean egin da, Kobetasen, Xabier Ochandiano Bilboko Udaleko Ekonomiaren Garapen, Merkataritza, Turismo eta Enplegu zinegotziaren eta Alfonso Santiago Last Tourreko zuzendariaren eskutik.

Dena prest dago Bilbao BBK Live jaialdiaren 2024ko edizio honi hasiera emateko; uztailaren 11n, 12an eta 13an izango da, eta 100 artista baino ikusteko aukera izango dugu hirian eta mendialdean kokatutako agertokietan. Goi-mailako izenak, hala nola Massive Attack, The Prodigy, Grace Jones, Underworld, Arcade Fire, Jungle, Air, Los Planetas, Khruangbin, Meute, Parcels, Floating Points, Kiasmos, Slowdive eta El Columpio Asesino bildu ditugu musika zuzenean jotzeko Kobetamendiko natura-ingurunean.

Bilbao BBK Live nazioarteko ekitalditzat har dezakegu jada, eta esperientzia sinestezina bizitzea bermatzeko osagai guzti-guztiak biltzen ditu hiru egunetan: musika ona, askotariko publikoa eta dibertsioa naturagune paregabe batean; hori guztia munduko gastronomia onenarekin onduta.

BILBAO BBK LIVE KOBETAMENDIN

Bilbao BBK Live jaialdiaren hasierako egunean musikaren legenda handiak arituko dira, hala nola Massive Attack, The Prodigy, Air –Moon Safari album klasikoa jotzen– edo Los Planetas taldea, Super 8 lanaren 30. urteurrena ospatzen. Horietaz gain, izen interesgarri bezain askotarikoak ekarriko ditugu: Folamour (A/V), Cymande, Death from Above 1979, Sen Senra, Shygirl presents Club Shy, Orbit, Mezerg edo NewDad. Estatuko lineupari dagokionez, stivijoes promesa gaztea, Dharmacidemadrildar shoegazearen itxaropena, edo pop leloetan adituak diren El Buen Hijo aipatuko ditugu. Eguna osatzeko, Nunatak, Martín de Marte, Nexo Malito –ALTA sortzailearekin batera– eta CRRDR proiektuak izango ditugu ikusgai.

Bigarren eguneko artista nagusia Grace Jones artista ikonikoa izango da. Jamaikan sortu eta New Yorken hazia, Grace underground xelebreenaren adierazgarri da, Studio 54 mitikoan ohikoa, eta zinemaren, modaren eta musikaren munduak etengabe uztartzen dabilena. Harekin batera, Underworld, Khruangbin, Parcels, Jordan Rakei, Daniela Pes, Ezra Collective edo MEUTE ere bigarren egunean arituko dira. Halaber, Albert Pla polifazetikoa, Standstill, Aiko El Grupo, Karavana, María José Llergoren ultraedertasuna, Ralphie Chooren pop esperimentala eta Samantha Hudson celebrity, abeslari eta performera, Oro Jondo eta Parkineos izango ditugu gure artean. Eusko labeldun artistak jaialdiaren DNAren parte dira; Kobetamendin arituko dira Iruñeko Melenas, energiaz beteriko EZEZEZ taldea, Silitia lekeitiarrak edo S T R paregabeak.

Larunbaterako espero ditugu Arcade Fire, Jungle, Alvvays, Floating Points, Noname edo El Columpio Asesino taldeak, azken hori agur-biran. Guztion gozagarri arituko dira, era berean, Lewis OfMan frantziarra bere pop elektroniko dotorearekin, Slowdive ezinbestekoak, techno eta punk estiloen DIY nahasketa baten sortzaile diren CHALK,  Kiasmos islandiarren ambient eta elektropop estiloen artean oreka perfektua, eta Good Neighbours biralak. Estatuko artisten zerrendan daude mundu guztiaren ahotan dagoen rock alternatiboko Alcalá Norte taldea eta Alba Morenaren pop delikatua, Mujeres taldearen garage doinuak, Boye bartzelonarra eta Oki Moki euskaldunak. Gainera, ezin aipatu gabe utzi Bitxeando, Bilboko arratsalde-giroko indie arrakastatsuena,  Ines Hernand buru duela Daniless DJ taldearen sortzailearekin batera, eta David Van Bylenen nahasketa ezinezkoak lagun.

BASOA. BASO ELEKTRONIKOA

Elektronikaren magia Basoaren bihotzera eramango dugu, espazioa antolatzeko modu berezi bati esker; izan ere, biribilean jarriko baita jendea, soinuak inguratuta. Aurtengo berrikuntza DJ kabina izango da: biribilaren erdian kokatuko dugu, 360º-ko esperientzia bizi ahal izateko. Basoan proposamen sendoa izango dugu, nazioarteko club munduko erreferente interesgarrienekin. Ostegunean, DJ Tennis, Cormac eta Ketiov, baita Sofía Kourtesis eta Neska ere. Ostiralean, Marcel Dettmann, Djrum, Ogazón, Jennifer Cardini, eta DJ Gostoso b2b Senda Fatal bikoa. Larunbatean, bukatzeko, Nicola Cruz, Niki Lauda, Budino eta Gabrielle Kwarteng. John Talabot funtsezko figura izan da jaialdiaren amaierako ekitaldietan; aurten, bosgarren eta azken aldiz itzuliko da Talabot Basoa gunera, Europako dantza-pista bereziena eta inguratzaileena bihurtzeko asmoz.

LASAI. DANTZA GELDOAK BILBORA BEGIRA

Lasai gunearen hasierako premisa minutuko 100 beatak ez gainditzea zen; horrela, bada, erritmoa baretu eta tempo  mantso baina intentsitate bizien maisuekin gozatu nahi dutenen agertoki eta bilgune nagusi bihurtu da. Lehen egunerako, Rinse FM irratiak prestatu du programazioa, eta abangoardiako soinuak ekarriko ditu Aletha, Yaw Evans, Facta & K-Lone, FYI Robyn, Ben Hauke eta Thrintian artisten eskutik. Ostiralean, honako hauen txanda izango da: Xamana Jones enigmatikoa, zeinak magia egingo duen segidako hirugarren aldiz (aurreko set horietan izan zirenek badakite zertaz ari garen); Fiesta x Fiesta ekimenaren sortzaile Baldman, Lucient kitzikagarria, Toni Bass dj eta produktore mitikoa, edo Miguel Agnes podcaster eta selector eszentrikoa. Larunbatean, Berlinen bizi den  JASSS artista asturiarra arduratuko da Bilboko begiraleku bereziena hosteatzeaz, Lydo, Nathan Micay eta Nazarekin batera.

AKELARRE. MUSIKA KANPINERA ERE IRITSIKO DA

Bihar, asteazkena, Akelarrea hasiko da Bilbao BBK Live jaialdiko kanpinean, hedonismo, natura, basoa eta club doinuak ospatzeko jaia antolatuko baitugu Dinamarca, Alai eta Gelarekin. Gainerako egunetan, Akelarrearen programazioa gitarrei eta melodiei erreparatzen hasiko da eta, gero, eremu elektronikoetarantz bideratuko da, arratsalde eta gau partean etorriko denaren aurrekari, honako hauei esker: Parquesvr DJ Set, Clock Poets, Lamia Mari, Alex Curreya, Beltranz, Derek V. Bulcke, Bea Fernandes, Elena Barker eta Drummie.

BEREZIAK, BILBAO BBK LIVE HIRIAN

2011. urteaz geroztik, Bereziak ekimenaren barruan doako kontzertuak antolatu dira Bilbo erdialdeko hainbat tokitan, musika-esperientzia Kobetamenditik haratago irits dadin. Industrias Creativas fundazioak Bilbao BBK Live jaialdiarekin batera sustatzen duen proiektu honen bitartez, musika, kultura eta aniztasuna indartu nahi dira, aldaketa sozialaren nahiz partaidetza komunitarioaren katalizatzaile bihurtze aldera. Bereziak programazioa ostegunean hasiko da: uztailaren 11n Martin Urrutia BBK Salaren kanpoaldean arituko da, eta ostirala 12an eta larunbata 13an, berriz, Vueling Isozaki dorreak, St. Petroni Albiako lorategiak eta San Miguel Areatza izango dira jardueren kokaleku, bingo musikatu batekin.

Ostirala 12 egun eklektikoa izango da: Chancha vía Circuito-ren elektronika latinoamerikarra, Kyne eta Oddliquor-en R&Ba, eta La Habitación Roja, Parquesvr eta Repion-en indie-musika. Larunbata 13an, aldiz, Nudozurdo-ren itzulera izango dugu, Morreo-ren pop elektronikoa , Lisasinson riot girlak , Samuraï-ren pop-punka, eta Barry B eta Teo Lucadamo-ren errimak. Bereziak ekimenari esker, Bilbo erdialdea gune musikal zirraragarri bihurtuko da guztiontzat, tokiko komunitatearen aberasgarri.

Aurten ere, Bilbao BBK Live jaialdiaren eskumuturrekoak abantailak eta deskontuak eskaintzen dizkizu Bilboko kultur etxe, museo eta saltokietan, Bilbao BBK Live Experience! ekimenaren bitartez. Jaialdira datozen pertsona guztiek jaialdiko eskumuturrekoa erakutsi eta abantailak baliatu ahal izango dituzten puntu guztiak biltzen dira ekimen honetan. Informazio guztia aurkituko duzu jaialdiaren webgunean.

ORDUTEGIAK, GARRAIOA ETA ESKUMUTURREKOAK

Badakigu, jada, artisten ordutegiak zeintzuk izango diren eta agertokietan nola banatuko diren; jaialdiaren webgunean kontsulta daiteke informazio guztia. Astelehenean eta asteartean (uztailak 8 eta 9) sarreraren ordez eskumuturrekoak jasotzeko aukera izango da, BBK Salan 11:00etatik 20:00etara bitarte. Bai San Mamesen, bai BEC! aretoan, ordutegia honako hau izango da:  asteazkena, uztailaren 10etik hasi eta larunbata, uztailaren 13ra bitarte, goizeko 10:00etatik goizaldeko 02:00etara.

Jaialdiaren eremuan EZIN IZANGO DA sarreraren ordez eskumuturrekoa eskuratu, eta jaialdiko autobusetan EZIN IZANGO DA sartu eskumuturrekorik gabe.

Jendea modu ordenatuan igo dadin eta garaiz planifikatu ahal izateko, hirugarren urtez, autobus-zerbitzua antolatu dugu aurten ere, aurrez erreserba eginda. Jaialdiaren egun bakoitzean, Felipe Serrate kaletik abiatuko da autobusa, San Mames ondoan, 16:00etatik 22:00etara arte, 10 minututik behin. Bidaiaren prezioa 3,5 € izango da, soilik igotzeko izango da eta aldez aurretik egin beharko da erreserba, jaialdiaren webgunean. Pertsona bakoitzak gehienez ere 10 txartel erosi ahal izango ditu.

Autobusen anezka-zerbitzua ere eskainiko dugu, doan, esparrura joan eta handik itzultzeko. Betiko lez, autobusak Barakaldoko BEC!-etik abiatuko dira, Ansioko metro-geltokiaren ondoan –aparkatzeko 3.500 toki izango dira prest–, baita San Mames ingurutik ere, Basurtuko Kaputxinoen kalearen amaieran, BAMI eraikinaren (Ogasuna-ETB) atzeko aldean. Autobusak etenik gabe arituko dira lanean uztailaren 10eko (asteazkena) 12:00etatik uztailaren 14ko (igandea) 15:00ak arte; zerbitzuaren maiztasuna aldakorra izango da, eskaeraren eta aurreikusitako beharren arabera. Jaialdiko egun guztietan, gutxi gorabehera 16:00etatik aurrera, Beyena fabrika zenaren inguruan geratuko dira autobusak eta, handik, oinezko egin beharko ditu jendeak jaialdiaren eremura dauden 800 metroak.

Era berean, programatutako kontzertuak bukatutakoan anezka-zerbitzuko autobusak hartu ahal izango dira bueltarako. Beyena pareko geltokitik, hesitutako guneetan egon beharko da zain Basurtu-San Mamesera edo BECera doazen autobusak hartzeko.

Halaber, kanpistek ere autobusak izango dituzte kanpinera joateko, asteazkena uztailaren 10etik hasita, eta jaialdiak irauten duen hiru egunetan, 24 orduz, bi kontzertu-eremuta joateko, bai kanpinera itzultzeko.

BILBAO BBK LIVE JASANGARRIA

Bilbao BBK Live erreferente da jasangarritasunaren arloan, eta, edizioz edizio, ekitaldiak ingurumenean duen eragina murriztea eta gizartean, kulturan eta ekonomian duen eragin positiboa areagotzea ditu xede. Bilbao BBK Live jaialdian garapen jasangarria dugu hizpide, jasangarri izatea ez baita berez helburutzat hartu behar, baizik eta etengabeko lan iraunkortzat, aldea markatzeko eta benetako aldaketa lortzeko munduan jaialdia osatzen duten pertsona guztien bitartez (partnerak, publikoa, bezeroak, artistak, hornitzaileak, GKEak, gizarte zibila, ikastetxeak, sektore pribatua…). Zentzu horretan, honako neurri hauek abiarazi ditugu berrikuntzaren, sormenaren, horizontaltasunaren, baterako sorkuntzaren, gizarteratzearen eta parekidetasunaren ikuspegitik:

PLASTIKOA DESAGERRARAZTEA

Nagusia agertokia landare biziekin estaliko da, eta gero birlandatu egingo dira. San Miguel agertokia egurrezko konposizio batekin apainduko da, plastikoa desagerrarazita. Txiki agertokiaren aurrealdea Karrantzako ardiaren artilearekin egingo da; horrek esan nahi du 0 Km-ko material naturalak erabiliko direla, eta duela gutxira arte hondakin gisa tratatzen zen material horren garapenari laguntzen zaiola. Artile horrekin, jaialdia amaitutakoan, askotariko jantziak egingo dira.

BALORE ESPAZIOA

Aurten, Bilbao BBK Live jaialdian leku berezi bat izango dugu: hazi moduko espazio, puntu, gune jasangarri, seguru, sozial eta xedez beteriko bat, ekitaldiak irauten duen bitartean martxan egongo dena, jaialdiak ingurumenarekin eta gizartearekin lotura duten kausekiko hartua duen konpromiso irmoari balioa emateko eta horri buruzko informazioa lortzeko. BALORE espazioan hainbat informazio-puntu bilduko dira:

  • Puntu MOREA, jazarpen-egoerak eta indarkeria sexista salatzeko eta prebenitzeko.
  • ORTZADAR puntua, Bilbao BBK Live jaialdiak LGTBIQ+ mugimenduarekin duen konpromisoari buruz.
  • Puntu BERDEA, jaialdiak hartzen dituen ingurumen-neurriei buruz.
  • Puntu SOZIALA, Last Tour enpresaren BCorp ziurtapenari buruz, eta jaialdiak Ihobe-Eusko Jaurlaritzaren Erronka ziurtapena lortzeko egiten duen lanari buruz.

JAIALDI SEGURU ETA PAREKIDEA, ERASO SEXISTARIK GABE

2017az geroztik, Bilbao BBK Live jaialdiko antolatzaileek eta Bilboko Udalak bat egiten dute eraso sexisten aurkako borrokan, eta prebentzioko eta sentsibilizazioko kanpainak egiten dituzte. 2024. urte honetako mezua ‘NO ES NO… EZ BETI DA EZ’ da, eta aurten ere berriro kaleratuko da mezu bera, hirian izaten den ekitaldi handi honetan eraso sexistarik izan ez dadin.

Bilboko Udalak gogorarazi nahi du eraso sexista bat jasanez gero salaketa jar daitekeela eta, era berean, herritar guztiei inplikazioa eskatzen die, emakumeen eta gizonen arteko harremanak berdintasunezkoak eta indarkeriarik gabekoak izatearen aldeko konpromiso aktiboari euts diezaioten.

by

    • Jaialdiaren esparrura ahalik eta lasterren joatea gomendatzen da – batez ere, kanpinzaleei dagokienez–, apurka-apurkako bertaratzea errazteko eta itxaronaldiak laburtzeko, bai eta poltsak eta motxilak arakatzeko ere, hala behar izanez gero.

    • Bilboko Udalak laguntzeko eskatzen die bertaratutakoei, eta galdatzen die une oro segurtasuneko langileen, udaltzainen eta ertzainen jarraibideei jaramon egiteko, horiek guztiek operatibo bateratua prestatu baitute jendearen segurtasuna bermatzeko helburuz.

    • Erreserbako autobus-zerbitzua eskuragarri dago dagoeneko. Iaz bezala, Felipe Serrate kaletik aterako da, eta jaialdiaren webgunean bertan egin daiteke erreserba. Doako autobus-anezkak ere egongo dira BEC! eta Basurtuko Kaputxinoetatik, bai jaialdiaren esparrura joateko, bai handik itzultzeko. Nahitaezkoa da eskumuturrekoa jantzita eroatea autobusean bidaiatzeko. 

    • Ia 50 laguneko taldea arduratuko da Kobetamendi esparruko hondakinak garbitzeaz eta biltzeaz, eta zerbitzua indartuko da urian eragindako beste gune batzuetan, hala nola San Mameseko zabalgunean, antolatzaileek jarritako autobusak handik aterako baitira.

Uztailaren 11n, 12an eta 13an izango den Bilbao BBK Live jaialdia hartzeko prestatzen ari da aurten ere Bilboko uria. 100 artistak baino gehiagok hartuko dute parte ekitaldian, eta aurten ere, hamazazpigarren edizioan, jendetza bilduko da.

Horretarako, Udalak hainbat arloren artean koordinatutako udal operatiboa planifikatu du, Kobetamendiko esparruaren segurtasuna, garraio publikoa, osasun-kontrola eta garbiketa bermatzeko.

SEGURTASUNA

Ibilgailu pribatuetarako lehen zirkulazio-murrizketak uztailaren 10ean, 10:30ean, ezarriko dira, eta uztailaren 14ko 15:00ak arte iraungo dute, gutxi gorabehera.

Segurtasun-arrazoiak direla eta, Udaltzaingoak ordutegi horiek aldatzea izango du, jaialdira doan jendeketaren arabera.  Era berean, ekitaldiaren antolakuntzak baimendutako ibilgailuei, garraio publikoari eta behar bezala onetsitako bizilagunei baino ez die igarotzen utziko.

Gogorarazi behar da guztiz debekatuta dagoela kontzertu-guneetara zein kanpalekura ibilgailu pribatua erabiliz sartzea; hortaz, jaialdira doazenak oinez edo antolatzaileek jaialdiaren kariaz jarritako anezka-autobusak erabiliz (“Kobetamendi anezka” zerbitzua) joan beharko dira.

Edizio honetan, jaialdiaren segurtasuna berriro indartuko da, Ertzaintzaren, Udaltzaingoaren eta Bilbao BBK Liveko segurtasun-langileen artean koordinatutako operatibo berezi bati esker, bertaratzen direnen ongizatea bermatzeko xedez, bai jai-esparruaren barruan, bai inguruetan.

Udaltzaingoak esparrurako sarbideak eta sarrera zaindu eta kontrolatuko ditu, delituzko gertaerak eta istiluak saihesteko, eta arreta bereziz jardungo du, hala berean, iruzurrezko salmentaren aurka eta bertaratzen diren pertsonen bide-segurtasuna zaintzen.

Salaketak jartzea eta argiketak egitea errazteko, polizia-arretako zerbitzua egokituko da Udaltzaingoaren bulegoetan, Basurtu/Errekaldeko Auzo Ikuskaritzan, Tellagorri kaleko 3. zenbakian, 22:30etik 07:30era.

Era berean, bi polizia-unitate mugikor egongo dira, ebasketa-delitu arinengatiko eta/edo kalteengatiko salaketak jasotzeko beharrezkoak diren bitarteko eta baliabideez horniturik, edo, garrantzi handiko delituak ez izan arren, hala nola ibilgailuan indarra erabiliz egindako lapurretak, izapidetze soila dakarten beste delitu batzuengatiko salaketak jasotzeko. Halakoetan, agenteek lekuan bertan jardungo dute, salaketa-akta bertatik bertara egiteko.

Bilboko Udalak jaialdiaren esparrura ahalik eta lasterren joatea gomendatzen du –batez ere, kanpinzaleei dagokienez–, apurka-apurkako bertaratzea errazteko eta itxaronaldiak laburtzeko, bai eta poltsak eta motxilak arakatzeko ere, joandakoei hala eskatzen bazaie.

Era berean, Bilboko Udalak ahalik eta gehien laguntzeko eskatu nahi dio jendeari, bai eta, une oro, ekitaldiko segurtasun-langileen, udaltzainen eta ertzainen jarraibideei jaramon egiteko ere.

KOORDINAZIO-ZENTROA, GUNE MEDIKOA ETA ANBULANTZIAK

Erantzun egokia ematen jarraitzeko, jaialdiaren barruan zein jaialdiaren ingurutik gertu, Jaialdiaren Segurtasuna Koordinatzeko Zentroa antolatu da. Bertan, segurtasuneko langileak, udaltzainak, ertzainak, suhiltzaileak eta osasun-langileak egongo dira. Autokarabanen aparkalekutik gertu jarriko da, eta kontzertu-esparruaren barruan bi gunetan banatutako gune mediko bat jarriko da: laguntza medikoko gela eta eboluzio-gela.

Kontzertuek irauten duten artean, anbulantziak egongo dira esparruaren hainbat gunetan: agertoki nagusietan, aisialdiko gunearen inguruan eta gune medikoan, horietako bat zerbitzuan egongo da eguneko 24 orduetan. Suhiltzaileen kamioi bat ere, lantalde tekniko eta giza baliabidez horniturik, prest izango da edozein larrialditarako.

Kanpatzeko gunean ere segurtasuneko eta osasun-laguntzako langileak egongo dira 24 orduz.

GARBIKETA

Jaialdiak irauten duen artean, uztailaren 11tik 14ra, garbitzeko eta hondakinak biltzeko lan zorrotza egingo da esparru osoan, batez ere, 7:00etatik 14:00etara. Zeregin horietan, 47 langilek parte hartuko dute batez beste egunero, eta 21 ibilgailuk –kamioiak erratz-makinak aintzat hartuta– lagunduko dute guztira.

Gainera, esparrua garbi-garbi edukitzeko helburuz, 470 edukiontzi jarriko dira guztira, 1.100 litroko edukiontziak, kuboak eta igluak eta 6 metro kubikoko 3 erretilu.

Operatibo horrek garbiketa eta hondakinen bilketa egingo du kanpatzeko gunean goizean, eta azaleko garbitze-lan sistematikoak egingo dira sarrera nagusian eta inguruetan, kanpalekuaren inguruko eremu komunetan eta autobus-geltokietan, bai kontzertu-gunean, bai anezka-autobusak abiatzen diren tokietan.

“Basoa” eta “Lasai” esparruetan, garbiketa-lanak eskuz egingo dira oso-osorik, zuhaitzen trinkotasuna dela eta.

Gainera, kontzertu-egunetan, garbiketa-dispositibo berezia egokituko da Altamira auzo osoan, jai-eremura oinez igotzen eta jaisten diren bertaratuen “aztarna” saihesteko. Jaialdia amaitutakoan, garbiketa sakona egingo da Kobetamendi parkean, herritarrek erabili eta goza dezaten.

Lantalde bat ingurua garbi edukitzeaz eta Kobetamendi parkea zaintzeaz arduratuko da, jaialdiko ikusleek eta Bilboko herritarrek parkeaz gozatzen jarrai dezaten.

Era berean, kontzertuen eremuko dispositiboa alde batera utzita, Garbiketa Zerbitzua berrantolatu egingo da urian arreta behar duten guneetako beharrizanei erantzuteko, hala nola jendea jaialdira eramateko autobus-geltokietako beharrizanei, adibidez, San Mameseko zabalgunean.

SARRERAK ALDATU ETA ESKUMUTURREKOAK ESKURATU IGO BAINO LEHEN

Sarreren truke, jaialdiko eskumuturrekoak eskuratu beharko dira, esparrura igo aurretik. Uztailaren 8an, astelehenarekin, eta 9an, asteartearekin, BBK Aretoan aldatu ahalko dira sarrerok, 11:00etatik 20:00etara. Uztailaren 10etik, asteazkenetik, uztailaren 13ra, larunbatera, San Mameseko zein BECeko ordutegia hauxe izango da: goizeko 10etatik goizaldeko 2etara.

EZIN izango dira sarreren truke eskumuturrekoak eskuratu jaialdiaren esparruan, eta EZIN izango dira jaialdiko autobusetara igo eskumuturreko barik.

OINEZKOENTZAKO SARBIDEA-KOBETAMENDIRAINO OINEZ JOATEA 

Kobetamendi Irteera dugu BBKren eta Bilbao BBK Liveren ekimena, jaialdira hurreratzen direnen karbono aztarna murrizten laguntzeko, esparruraino oinez joanda. Horretarako, San Mameseko zabalgunetik jaialdiaren sarreraraino dagoen 2,5 kilometroko distantzia ibiliz egin behar dute. Jaialdiaren egunetan, lau irteera programatuko dira, 17:00etatik 20:00etara, orduko bat.

Ibilbidea diseinatu da txikienek zein zaharrenek ibilbidea erraz egiteko modua izan dezaten. Parte hartzaileek irteera paregabeaz gozatu ahalko dute, eta zenbat eta garaiago, orduan eta gehiago gozatuko dute Bilboko bista zoragarriez.

ZELAN JOAN KOBETAMENDIRA

Zirkulazio-etete eta -aldaketa nagusiek jaialdiaren inguruari eragingo diote, hots, Kobetamendi inguruari. Zehazki, Kobetabidea itxita egongo da Basurtu-Kastrexana errepidearekiko bidegurutzetik, eta Mintegitxuetako bidea, Masustegitik eta Altamiratik doan sarbidetik.

Ibilgailu pribatuentzako lehen zirkulazio-murrizketak uztailaren 10eko 10:30ean ezarriko dira, eta 14ra arte, igandera arte, iraungo dute, gutxi gorabehera, 15:00ak arte.

Segurtasun-arrazoiak direla eta, Udaltzaingoak ordutegi horiek aldatzea izango du, jaialdira doan jendeketaren arabera.  Era berean, ekitaldiaren antolakuntzak baimendutako ibilgailuei, garraio publikoari eta behar bezala onetsitako bizilagunei baino ez die igarotzen utziko.

Gogorarazi behar da guztiz debekatuta dagoela kontzertu-guneetara zein kanpalekura ibilgailu pribatua erabiliz sartzea; hortaz, jaialdira doazenak oinez edo antolatzaileek jaialdiaren kariaz jarritako anezka-autobusak erabiliz (“Kobetamendi anezka” zerbitzua) joan beharko dira.

AUTOBUSETAKO ERRESERBA

Igoera antolatzeko eta denboraz planifikatu ahal izateko, hirugarren urtez jarraian, erreserbako autobus-zerbitzua dago erabilgarri. Zerbitzu hori Felipe Serrate kaletik aterako da, San Mames ondoan, jaialdiko egun guztietan, 16:00etatik 22:00etara, 10 minuturo.

Bidaiaren kostua 3,5 eurokoa da, igoerarako bakarrik egongo da eskuragarri eta aldez aurretik erreserbatu beharko da jaialdiaren webgunean. Pertsona bakoitzak, gehienez ere, 10 txartel erosi ahalko ditu.

DOAKO AUTOBUSAK

Gainera, bertaratzen direnek doako anezka-autobusak izango dituzte, esparrura joateko zein handik itzultzeko. Ohi bezala, joanekoan busak BECetik abiatuko dira (Barakaldo) Ansioko metro-geltokiaren ondoan –ibilgailuak aparkatzeko 3.500 leku egokituko dira– eta San Mames ingurutik –Basurtuko Kaputxinoen kalearen atzealdean, BAMI eraikinaren (Ogasuna-EiTB) atzealdean.

Autobusek etenik gabe emango dute zerbitzua, uztailaren 10eko 12:00etatik igandeko 15:00etara, eta zerbitzuaren maiztasuna aldatu egingo da, eskariaren eta begiz jotzen diren beharren arabera.

Jaialdiaren egun guztietan, 16:00etatik aurrera, Beyenako fabrika zaharraren inguruan geldituko dira, eta bertatik, ikusleek 800 bat metroko ibilbidea egin beharko dute jaialdiaren esparrura iristeko.

Era berean, programatutako kontzertuak amaitutakoan, anezka-autobusak erabili ahalko dira itzulerako bidaia egiteko.  Beyena parean egokitutako geralekutik, jaialdira bertaratzen direnek hesitutako eremuetan itxaron ahalko diete ibilgailuei eta, bertatik, Basurtu-San Mamesera edo BECera jaitsiko dira.

Era berean, kanpinzaleek autobusak izango dituzte kanpinera joateko uztailaren 10etik, asteazkenetik, eta jaialdiak irauten duen hiru egunetan, 24 orduz, bai kontzertu-esparrura joateko, bai kanpinera itzultzeko.

Kontzertuetan, jaialdiaren esparrua (hegoaldean) eta kanpalekuaren eremua lotzen duen anezka-zerbitzua egongo da.

TAXIA

08:00etatik 16:00etara, gutxi gorabehera, taxiek bidaiariak utzi ahalko izango dituzte esparruaren sarreratik gertu.

Ordu horretatik aurrera, jaialdiaren esparrura joaten diren taxiek Beyenako fabrika zaharraren inguruan prestatutako geraleku batean utzi beharko dituzte bidaiariak.

MUGIKORTASUN URRIKO PERTSONAK

Antolatzaileek mugikortasun urriko pertsonentzako anezka-zerbitzua eskainiko dute San Mamesetik jaialdiko sarreraraino, zeinahi unetan, 17:00etatik 07:00etara, jaialdiaren egun guztietan.

Esparruaren barruan, mugikortasun urriko pertsonentzako eremuak egongo dira, eta MUPentzat soilik erreserbatutako espazio esklusiboa ere bai, arreta espezializatuko langilez horniturik.

KANPALEKUA ETA AGERTOKIAK ‘CASHLESS’ JAIALDI BATEAN

Jaialdiaren esparrutik 3 kilometrora, Bilboko atsedenlekurik handienetako batean, Bilbao BBK Live kanpatzeko gunea berdegune zoragarria da, oinarrizko zerbitzu guztiez zuzkitutakoa, hala nola ura, dutxak, ispiludun komunak eta entxufeak, armairuak eta jatetxeen gunea. Kanpatzeko gunea asteazkenean, hilaren 10ean, irekiko da, 12:00etan, eta igandean, hilaren 14an, 15:00etan, itxiko da.

Bilboko Udalak gogorarazi nahi du egokitutako gune horretan soilik kanpatu ahalko dela, eta kontzertu-gunetik kanpinera oinez joaten ez diren kanpinlariek 24 orduko doako autobus-zerbitzua erabil dezatela eskatu du, batez ere, gauean. Era berean, gogoan izan segurtasun-arrazoiengatik ezin dela surik egin.

Jaialdiaren esparruaren ateak 17:00etan irekiko dira egunero, eta Bilbao BBK Live 2024 jaialdiaren musika zazpi agertokitan eskainiko da Kobetamendin.

Bilbao BBK Live jaialdia erabat “cashless” izango da, hau da, eskudirurik gabeko jaialdia.  Jaialdira hurreratzen direnek jaialdiko ordainketa guztiak (merchandisinga, janaria eta edaria) eskumuturraren bira sinple batez egin ahalko dituzte, eskumuturreko adimendunetan integratutako teknologiari esker. Kontzertuzale guztiek jasoko dute teknologia hori sarrera baliozkotzean, eta eremura sartzeko modua emateaz gain, ordainketa-sistema segurua bermatzen du.

Eskumuturrekoa online kargatu daiteke, webgunearen bidez edo modu fisikoan, eskudirutan edo txartela erabiliz, Kobetamendiko esparruan jarritako karga-guneetan. Saldoa jaialdiaren edozein karga-gunetan edo kobratzeko gailutan kontsultatu ahal izango da.

Soberako zenbatekoaren itzulketa automatikoa izango da, transferentzia bidez, kosturik eta gutxieneko zenbatekorik ordaindu behar izateke, online kargatu duten pertsonentzat.  Jaialdiko postuetan kargaren bat egin dutenek uztailaren 16tik aurrera eskatu ahalko dute itzulketa, jaialdiaren webgunean dagoen atariaren bidez, transferentzia bakoitzeko kosturik eta gutxieneko zenbatekorik gabe.

AUTOKARABANEN BEHIN-BEHINEKO APARKALEKUA BECen

Bilbao BBK Liveko kontzertuak martxan jartzeko beharrezkoak diren ibilgailuak eta gainerako tresnak hartzeko asmoz, Kobetamendiko autokarabanentzako harrera gunea itxita egongo da.

Bilboko Udalak doako aparkaleku-zerbitzua jarri du martxan egun horietan BECeko (Bilbao Exhibition Centre) biltegien kanpoko aparkalekuan autokarabanentzat, autokarabanazaleen aparkatzeko eskaerari erantzuteko. Aldi baterako aparkalekua doakoa izango da, eta uztailaren 17ko 13:00ak arte egongo da zabalik; 24 orduko zaintza, ur-lotunea, eguneroko garbiketa, hondakinen bilketa eta hustubidea ditu.

Garraio publikoa erabiliz, Bilboko erdigunearekin komunikatuta dago autobusez (Bizkaibusen 3136 linea: Bilbo-Gurutzeta Barakaldo) eta metroz (Ansioko geltokitik abiatuta).

METROAREN ZERBITZU BEREZIAK

Uztailaren 11tik 13ra, ostegunean, ostiralean eta larunbatean, Metro Bilbaok gau osoan emango du zerbitzua.  Maiztasunak Metro Bilbaoren webgunean kontsulta daitezke, “Hurrengo trenak” atalean.

OSASUN-KONTROLA

Jaialdiaren azpiegitura muntatu aurretik, Osasun eta Kontsumo Sailak egiten duen ebaluazioa eginda hasten da osasun-kontrola, Osasun-memoriak berrikusita, eta, beharrezkoa balitz, zuzenketak proposatuta. Era berean, erabilgarri dauden komunen kopurua eta txorrotako ura eskuratzeko lotuneak ebaluatzen dira, aurreikusitako edukieraren arabera, bai eta horien mantentze-lan egokia ere.

Hala, inaugurazioaren aurreko egunean, azpiegitura guztia muntatuta zegoela, Osasun eta Kontsumo Saileko teknikariek osaturiko hiru ikuskapen-taldek aurreneko ikuskapena egingo dute. Ikuskapen horretan, funtsean, egiaztatu egiten da elikagaiak eta edariak saltzen dituzten establezimendu guztiek ur-lotuneak, material egokiak, edukiera nahikoko hozkailuak, manipulazio-eremuak eta abar dituztela, eta komunen kopurua nahiz aldizkako garbiketa-protokoloa egokiak direla. Ikuskapen horiek jendeari saltzeko establezimenduetan nahiz VIP guneetako saltokietan egiten dira, bai eta langile eta artistentzat prestatutako jantokietan ere.

Inaugurazioaren egunean bertan, goizean, beste ikuskapen bat egiten da, eta bertan, jaialdiak iraun artean eskainiko diren elikagai eta edari guztiak egiaztatzen dira: jatorria, iraungitze-datak, freskotasuna, kontserbazioa… Geroago, gutxienez, beste ikuskapen bat egin ohi da.

Gainera, nabarmendu behar da kanpatzeko eremua ere ikuskatu eta kontrolatuko dela.

Jaialdiaren antolakuntzak higiene- eta osasun-arloko profesionalen taldea izango du lanean, elikadura-segurtasunari lotutako eragiketak egokiak direla zaintzeko.

SARE SOZIALAK:

by

  • Hainbat hilabetetan zehar egin da lan Euskadiko turismo-gidarien eta hartzaileen elkarteekin batera, eta sortu den dokumentuak Bilboko herritarren eguneroko bizitzaren eta bisitarien arteko oreka sustatzea du helburu.

  • Bilboko Udalak turismo jasangarriarekin duen konpromisoaren markoan, eskuliburuak xede du ere bai hiribilduko espazio publikoa eta baliabide turistikoak babestea.

  • “Eskuliburu honekin batera doan konpromisoa izenpetzea aurrerapauso nabarmena da Bilbo kalitatezko helmuga turistiko gisa garatzeko eta babesteko”, Garapen Ekonomiko, Merkataritza, Turismo eta Enplegu Saileko Zinegotzi Xabier Ochandianok azaldu duenez.

Bilboko Udalak ‘Bilboko Bide Publikoan Bisita Gidatuak Egiteko Jardunbide Egokien Eskuliburua’ aurkeztu du. Dokumentuak jaso egiten du azken hilabeteotan zehar Euskadiko gidari turistikoen eta hartzaileen elkarteekin batera egin den lana, eta eskuragarri dago lau hizkuntzatan: euskaraz, gaztelaniaz, ingelesez eta frantsesez.

ASOARTE (Euskadiko Turismo Hartzaileen Agentzien Elkartea), ATRAE (Euskadiko Turismo Agentzia Hartzaileak), AEAVE Euskadi (Euskadiko Bidaia Agentzien Enpresa Elkartea) eta Apit Euskadi (Euskal Autonomia Erkidegoko Turismo Gidarien Elkartea) erakundeen izenean, Carmen Romok, Chelo Escabiasek, Enrique Hernáezek eta Aitor Delgadok, hurrenez hurren, Bilboko Udaleko Garapen Ekonomiko, Merkataritza, Turismo eta Enpleguko Zinegotzi Xabier Ochandianorekin batera sinatu dute jardunbide egokien eskuliburura atxikitzeko konpromisoa; Eskuliburuan ezarritako ildoekin bat egiten duten eragile guztiei prestigioa eta legitimazioa ematea du xede.

Gidak jasotzen dituen ekintzak, funtsean, honako hauetara daude bideratuta: Bilboko herritarren eguneroko bizitzaren eta bisitarien arteko orekari eustera; hiriko turismo-baliabideak eta espazio publikoa zaintzera; hiriko mugikortasunaren efizientziaren, segurtasunaren eta irisgarritasunaren bermeak izatera eta gidari profesionalen profesionaltasunari balioa ematera. Xabier Ochandianok esan duenez, “jardunbide egokien eskuliburu hau lehenengo urrats garrantzitsua da Bilbo gehiago zaintzeko eta gure hiria kalitatezko turismo-helmuga bateratu eta orekatu gisa tratatzeko“.

30 LAGUN BAINO GUTXIAGOKO TALDEAK ETA IRRATI-GIDAK

Dokumentuak hamabi puntu eta konpromiso jasotzen ditu, horien artean hauek:

Jende pilaketak saihestea, taldeko parte-hartzaileen kopurua gehienez 30 pertsonara mugatuz, bisitatzen den espazioaren arabera tamaina egokituz, eta gidatutako zerbitzuaren kalitatea hobetuz; Bilboko zarataren eta bibrazioen ondoriozko kutsadura akustikoa murriztea, soinua anplifikatzeko gailuen erabilera saihestuz eta, ahal dela, irrati-gida sistemak erabiliz; taldeei azalpenak emateko geldialdiak eragozpenak minimizatzen dituzten espazioetan egitea; bisita gidatuen hasierako, amaierako eta geralekuetako puntuak behar bezala aukeratzea, eraikinetarako eta merkataritza-lokaletarako sarrerak blokeatzea saihestuz; zirkulazio-arauak ezagutzea, arreta berezia eskainiz bidaiarien bilketa eta jaitsiera puntuei.

Bilboko Udalak autobusez iristen diren bisitariak biltzeko eta jaisteko guneak sortzeko ardura zainduko du, turismo-fluxuen kontzentrazioak saihesteko. Halaber, turismo gidarien kolektiboak Udalaren eta bisita gidatuetako profesionalen artean ezar daitezkeen bisiten komunikazio- eta erregistro-sistemen erabilera sustatuko du.

Irrati-gidak erabiltzeko, Xabier Ochandianok aurreratu du Bilboko Udalaren aldetik laguntza-plan bat egongo dela datorren udazkenetik aktibatuta, eta gastuak gain hartuko dituela 2024ko urtarriletik.

Bilbon guztiz borondatezkoa da eskuliburu horri atxikitzea; izan ere, Zinegotziak azaldu duenez, hiriak gaur egun erregistratzen duen turismoaren bolumena orekaren parametroen barnean dago. “Turismoaren bolumena ez da arazotsua Bilbon; gure xedea da kalitatezkoa izatea, jasangarria eta orekatua; urteotan zehar landu izan ditugun gakoak dira, sektorearekin berarekin adostutako eta landutako Bilbao/Bizkaia Turismo Estrategian dihardugulako”.

Eskuliburu berria beste urrats bat da tokiko profesional eta enpresen kolektiboari prestigioa eman eta legitimatzeko, Helmuga Turistiko Adimenduna ziurtagiriarekin bat egiten baitu. Ziurtagiri horren helburua da helmugen lehiakortasuna eta egoiliarren bizi-kalitatea hobetzen laguntzea, bost jarduera-eremutan eraginez: gobernantza, berrikuntza, teknologia, iraunkortasuna eta irisgarritasuna.

Helmuga Turistiko Adimenduna ziurtagiria lortu eta Global Destination Sustainability indizearen esparruan mundu mailako batez besteko zazpigarren hiri onena bihurtu ondoren, “Bilboko Udalak aurrera egiten jarraitzen du turismo jasangarria, kalitatezkoa, turismo orekatua eta zaindua lortzeko gure hirian. Adostasunez landutako eskuliburu honek bilbotarren eta bisitatzen gaituzten turisten arteko elkarbizitza indartu nahi du“, amaitu du Xabier Ochandianok.

‘Bilboko Bide Publikoan Bisita Gidatuak Egiteko Jardunbide Egokien Eskuliburua’ deskargatzeko esteka: https://www.bilbaoturismo.net/

SARE SOZIALAK:

by

    • Jaialdiaren irekiera-ekitaldia Azkuna Zentroan egingo da, 19:00etan, Nerea Quincoces buru duen Kuttune folk-bandaren kontzertuarekin.

    • Akatz eta Arratians taldeek Basque FEST Rock City atala estreinatuko dute Kafe Antzokian, 22:00etan.

Hemen da Bilbao Basque Fest. Euskal kulturaren hitzordu nagusia gaur abiatuko da 200 jarduera ingururekin; era eta adin guztietako jendearentzako jarduerak izango dira, gehienak doakoak. Dastaketak eta gastronomia-tailerrak, Herri Kiroletako probak, kontzertuak, euskal zinerik onena, antzerkia, dantza eta umorea izango dira, besteak beste, martxoaren 31ra bitartean, uriko hogeita hamar espaziotan.

Bilbao Basque FEST jaialdiaren irekiera-ekitaldia gaur izango da, 19:00etan, Azkuna Zentroan, Kuttune taldearen kontzertuarekin. Aurtengo edizioa emakumezkoak protagonismoa dituen folkeko musika-zikloak irekiko du. Nerea Quincoces buru dela, taldeak bere azken lana aurkeztuko du, Zer ote da, euskal erritmoak Kubako eta Afrikako musikarekin eta jazz-ukituekin nahasten dituena. Abestien hitzetan melodia berriak eta herri-kantutegikoak konbinatzen dira.

Rock estiloan, Akatz eta Arratians taldeek Basque FEST Rock City zikloa estreinatuko dute 22:00etan, Kafe Antzokian. Bilboko areto horretan eta ordu berean, gauero, bertako talde onenen zuzeneko emanaldiak egongo dira.

Bilbao Basque Fest jaialdiari buruzko informazio guztia eta programa osoa hemen dago: basquefest.bilbao.eus/.

SARE SOZIALAK

#BilbaoBasqueFEST

by

      • Bilboko Udalak antolatuta, martxoaren 27tik 31ra garatuko dira jaialdiaren proposamenak, ohiko sei gaietan bilduta: Gourmet, Kultura, Musika, Market, Zinema eta Sport.

      • Hainbat sari jaso dituen “20.000 especies de abejas” filma eta “To bird or not to bird” film laburra Zinema atalaren protagonista izango dira.

      • Areatzako Txoko Gourmetean dastaketa espresak eta sukaldaritza-tailer laburrak egongo dira; guztira, 1.376 plaza. Dastaketetan eta tailerretan parte hartzeko, 2 euroko prezio sinbolikoa ordaindu beharko da. Diru hori Norai Elkartearen Etorkizuna Musikatan proiektura bideratuko da, zeinak helburu baitu haurren eta nerabeen bizitzak musikaren bidez eraldatzea. Herri-kirolen erakustaldiek eta tailerrek, emakumezkoen eta gizonezkoen Bizkaiko Orga Txapelketa Ofizialaz gain, jaialdiko kirol-eskaintza osatzen dute.

      • Bilbao basque FESTen musika-programazio zabalean sartzen dira, besteak beste, protagonismo femeninoa daukaten folk kontzertuak eta Basque Fest Rock City eta Taberna Live Music zikloak.

      • Umeek Gargantua pertsonaia ospetsuaren bisita jasoko dute, eta Casilda Iturrizar parkean eta Zabalgune eraikinean antzezlanak, zirku-tailerrak eta magia-ikuskizunak izango dituzte.

  • Bilbao basque Fest, euskal kulturaren hitzordu nagusia, martxoaren 27an, eguaztena, hasiko da 200 jarduera ingururekin, gehienak doakoak. Jarduera horiek martxoaren 31ra arte (domeka) luzatuko dira.Aste Santu honetan uribildua bisitatzen dutenek, baita jaiak urian igarotzea erabakitzen duten bilbotarrek ere, jaialdiko ohiko sei gaietan biltzen diren esperientziez gozatuko dute: Gourmet, Kultura, Musika, Market, Zinema eta Sport.Herri-kiroletako probak eta erakustaldiak, 0 kilometroko gastronomia-produkturik onenak, dantza tradizionala eta gaur egungoa, kontzertuak, euskal zinema sariduna, familia-jarduerak, kalejira alaiak, berbenak eta erromeriak… Bilbo basque FESTek proposamen kultural eta aisialdikoa eskainiko die euskal nortasuna duten publiko guztiei.Jaialdiaren irekiera Azkuna Zentroan egingo da eguaztenean, 19:00etan, Kuttune konpainiaren eskutik, emakumezko ahotsen protagonismoa duen folk ziklo baten barruan. Sarrabetek (29an, barikua) eta Amaterrak (30ean, zapatua) kartela osatzen dute Bilboko Txistularien Udal Bandaren ondoan (28an, eguena).

    20 KONTZERTU BAINO GEHIAGO BILBOKO KALE ETA ARETOETAN

    Musika da, Bilbao basque FESTen edizio guztietan, jaialdiaren elementu garrantzitsuenetako bat. Aurtengo kartelak estilo erakargarriak biltzen ditu: rocka, popa, folka eta jazza, besteak beste.

    Proposamen originalenetako bat martxoaren 28an (eguena) iritsiko da, 12:00etan, Bilboko Artelan Berreginen Museoan. Han “Hezurrak” kontzertu poetikoa egingo da, Puy Barral eta Manu Gaigneren eskutik. Kontzertuan, perkusioa eta ahotsa erritmoz aldatzen dira, ikus-entzuleak hitz-jolasekin harritzeko.

    Areatzako Kioskoak bere programazioa zabalduko du Eider Sáez Nogeneko lider ohiaren bakarkako lehen lanaren estreinaldiarekin (martxoaren 29an, barikua, 20:30ean).Hurrengo egunean, ordu berean, gure herri-kulturako klasikoetako batez gozatu ahal izango da: berbenaz.Kresala, Euskadin gaur egun dagoen erromeria-talde garrantzitsuenetako bat, dantzatzeko musika euskaldunaren errepertorio alaia partekatuko du, energia handiz eta giro onean.

    Gauean Bilbao basque FESTek bere proposamena zabalduko du Azkena eta Rocket aretoetan kontzertuak emanez “Taberna Live Music” atalarekin. Bertan, Triple Zero, Norman Bates, Iñigo Puertas eta Chulería, Joder! artistek zuzeneko musika eskainiko dute. Rockaren atalean, Bilbao basque Fest Kafe Antzokira itzuli da aurten ere Euskadiko banda onenekin, “Bilbao Basque Fest Rock City” zikloan (Akatz, Los Retumbes eta Munlet plays Devo, besteak beste). Era berean, zenbait DJk zuzeneko musika jarriko dute aperitiboaren orduan eta arratsaldeetan, Martzana kaian eta kalean, “Kaia on set” atalean.

    Gainera, kalejirarik alaienak Bilboko erdialdetik ibiliko dira eta Ziortza eta Leire, Izalde, Jira Musika eta Samasiku taldeek energiaz beteko dituzte Poza Lizentziatua, Villarías, Ledesma eta García Rivero kaleak, martxoaren 28tik (eguena) martxoaren 30era arte (zapatua) 13:30ean hasita. Bilbotxeros Bandek Diputazio kalearen ingurua alaituko du, zapatuan, hilak 30, 13:30etik 15:00etara.

    Gainera, martxoaren 28an (eguena), 29an (barikua) eta 30ean (zapatua) 19:00etatik aurrera erromeriak izango dira Gas plazan Ortzadar, Jira Musika eta Ziortza eta Leireren eskutik. Areatzako kaian, martxoaren 31n (domeka) 13:00etan, Dantza Plazan saioa egingo da lehen aldiz. Bertan, irakasleek parte-hartzaileei dantzarako pausoak erakutsiko dizkiete. Artxandan ere –festarako txoko klasiko bat– euskal dantzen tailerra egingo da domekan, 12:00etan hasita, eta ondoren erromeria alai bat egingo da Gaztediren eskutik.

    “20.000 ESPECIES DE ABEJAS” ZINEMA ATALEAN

    Bilbao Basque FESTek euskal zinemarik onena sustatzen du Zinema atalean. Aurtengo film nagusia Estíbaliz Urresolaren “20.000 especies de abejas” film saritua izango da, eta BBK aretoan erakutsiko da egunero – egunean, barikuan eta zapatuan –. Filmak hiru Goya lortu ditu (zuzendaritza berririk onena, taldeko aktorerik onena eta jatorrizko gidoirik onena) eta aurten bere kategorian Goia saria eskuratu duen animazioko film laburraren (“To bird or not to bird”) ondoren proiektatuko da, 18:00etan.

    FAMILIA-PROGRAMAZIO ZABALA

    Familiek proposamen sorta zabala aurkituko dute Bilbao basque FESTen. Casilda Iturrizar parkean zirku-tailerrak egingo dira malabarak eta akrobaziak egiten ikasteko, bai eta antzerki-saioak ere arratsaldean. Aurten, gainera, bere kategorian 2023ko Sari Nazionala lortu zuen “Oliver & Liuba: los inventores” magia-ikuskizuna ikusteko aukera izango da Zabalgune eraikinean.

    • “La Glo”, zirku-tailerrak (4 urtetik aurrera), martxoaren 28an (eguena), 29an (barikua) 30ean (zapatua), 12:30ean.
    • “Historias de un baúl”, familia-antzerkia, martxoaren 28an (eguena), 18:00etan.
    • “Mute”, familia-antzerkia, martxoaren 29an (barikua), 18:00etan.
    • “Bualá”, familia-antzerkia, martxoaren 30ean (zapatua), 18:00etan.
    • “Oliver & Liuba: los inventores”, magia, martxoaren 28an (eguena), 29an (barikua) 30ean (zapatua), 19:00etan.

    Gargantua, pertsonaia maiteenetakoa, Bilbao basque FESTera itzuliko da txikienek barruko txirristan goza dezaten. Guggenheim Bilbao Museoaren zabalgunean egongo da martxoaren 28tik (eguena) 30era (zapatua), 11:00etatik 14:00etara eta 16:00etatik 19:00etara. Gainera, 12:00etatik 13:30era Txistularien Udal Bandaren zuzeneko musika izango du lagun; arratsaldeetan, 17:00etatik 18:30era, Jira Musika (28an, eguena), Ziortza eta Leire (29an, barikua) eta Izaldi (30ean, zapatua) arituko dira.

    DANTZA, UMOREA ETA KALEKO ANTZERKIA

    Kultura da Bilbao basque Fest elkartearen funtsezko elementua. Jaialdiak euskal sustraietan sakontzen du bere adierazpide bereizgarrienei lekua egiteko dantza tradizionalen, antzerkiaren, umorearen eta historiaren bidez.

    Bizikidetasun plazan euskal dantzen estilo-aniztasuna islatzen duten ikuskizun bi egongo dira. Aro garaikidekoa, Aukeran taldeak “Aiurri” aurkeztuko du, gizakiak mugitzeko daukan beharrari buruz.Salbatzaile talde historikoak, bestalde, herri-kulturan oso errotuta dauden koreografiak erakutsiko ditu.

    “Euskal zigilua” duen antzerkiak eta komikotasunak jaialdiaren arratsaldeak poztuko ditu Bilborocken eta Erripa kaian. Horrela, “Humor and Basque” zikloa martxoaren 28an (eguena) itzuliko da Bilborockera, Jon Plazaola umorista ospetsuaren “Tu Tum Platz” obrarekin, zeina bere ibilbide arrakastatsuaren jatorrira itzultzen baita. Martxoaren 29an (barikua) Bocabeats Comediaren txanda iritsiko da. Iván Pérezek eta Aitor Vidaurretak osatzen dute taldea eta “Tirando del carro” inprobisazio-lana antzeztuko dute. Azkenik, martxoaren 30ean (zapatua) Aroa Berrozpe ospetsuak “Mejor será reírnos” aurkeztuko digu. Hiru emanaldiak 20:00etan izango dira, edukiera osatu arte.

    Umorezko eskaintza martxoak 28an (eguena) osatuko da 18:00etan, Goitibera konpainiaren kale-antzerki barregarriarekin eta “Yijaaa!!!” lanarekin, Arístides Smith eta haren laguntzaile Giovanni Cannoli-ren abenturen inguruan. Hurrengo egunean, hilak 29an (barikua), ordu berean, Bea Larrañagak “Soy la bomba” lana antzeztuko du, gozogintzaren inguruko iraultza berezi bat planeatuz. Hilaren 30ean (zapatua), niMu txanda iritsiko da, eta “Jacuzzi” lanean burbuilei buruzko hausnarketa egingo du.

    GURE LURRALDEKO GASTRONOMIA ETA KIROL TRADIZIONALAK AREATZAN

    Areatzak Gourmet eta Sport sekzioak hartuko ditu.Txoko Gourmet karparen 1.500 m2 horiek Euskadiko turismo-eskualdeetako zero kilometroko produkturik onenak dastatzera eta erostera gonbidatuko ditu: Urdaibai, Arabako Errioxa, Gorbeialdea, Goierri, Uribe, Iparraldea eta Tolosaldea. Besteak beste, Idiazabalgo gazta, Ezpeletako piperrak, Urigoitiko txorizoa, txakolina, izozkiak, txokolatea, eztia, ogia, euskal pastela, euskal bermuta eta Samaniegoko ardoa dastatu ahal izango dira dastaketa espresetan. Gure lurraldeko jan-edan zoragarri horiek dastatzeko lehen txanda 12:00etan hasiko da, eta azkena 18:00etan (martxoaren 28an, eguenean, 18:10ean, eta martxoaren 31n, domekan, 13:30ean). Dastaketetan 900 pertsonak parte ahal izango dute guztira.

    Txoko Gourmeteko beste jarduera izarretako bat tailer gastronomiko laburrak izango dira. 45 minutuko tailer horietan, 476 lagunek zenbait plater prestatzen ikasiko dute, adibidez: Bilboko pintxo tipikoak, Eusko Label txahaleko tartarra, baserriko nigiria eta bakailao-zebitxea. Ikastarotxo horiek martxoaren 28tik (eguena) martxoaren 30era (zapatua) egingo dira, 12:15ean, 13:15ean, 17:15ean eta 18:15ean (domekan 12:15ean eta 13:15ean baino ez).

    Tailerretan nahiz dastaketa espresetan parte hartu nahi dutenek Gourmet Txokoan bertan eman beharko dute izena. Saio horiek 2 euroko prezio sinbolikoa izango dute, eta eskudirutan ordaindu beharko da. Diru hori Norai Elkartearen Etorkizuna Musikatan proiektura bideratuko da, zeinak helburu baitu haur eta nerabeen bizitzak musikaren bidez eraldatzea.

    Gainera, martxoaren 31n (domeka), Areatzako karpan hainbat jarduera izango dira 11:00etatik 14:00etara familia osoarentzat, hala nola Bizkaiko eta Arabako bolo-jokoak, igel-toka, belaunaldien arteko egur-tailerrak, euskal folkloreko jantzien erakusketa eta musika-animazioa Musikako Udal Eskolako txistu-bandarekin.

    Areatzako kaian ere egongo dira herri-kirolak. Ingudea eta harria altxatzea, sokatira, txinga-eroatea, trontza, harri-zulatzaileak, aizkolariak eta abar dira espazio honetan ikusgai jarriko diren proba batzuk. Proba horiek martxoaren 28an (eguena) hasiko dira, 12:30ean, emakumezkoen eta gizonezkoen Orgako (Orga jokoa) Bizkaiko Txapelketa Ofizialarekin.Era berean, zortzi urtetik gorakoentzako tailerrak egingo dira, martxoaren 28ko (eguena) 12:30ean eta 17:30ean (zapatua).

    IBILBIDEAK BILBO HISTORIKOTIK ETA PASEALDIAK ITSASADARREAN ZEHAR

    Bilboko Anfitrioiei esker, Bilboko historia umore apur batekin ezagutu daiteke, Zazpi Kaleetatik eta Areatzatik, 12:00etatik aurrera egunero antzerki-formako ibilbideak programatu baitituzte. Jaialdiaren beste proposamen original bat Mirentxu eta Begotxurekin itsasontzian ibilbideak egitea da. Oraingoan, Bilbon datorren maiatzean egingo den Women’s Champions League UEFAren finalari buruzko hausnarketa bereziak partekatuko dituzte.

    BILBAO BASQUE FEST ZENBAKIETAN

    Bilbao basque Fest euskal kulturaren jaialdia bost egunetan luzatuko da, sei gairekin –Gourmet, Kultura, Musika, Market, Zinema eta Sport–, uriko 30 espaziotan. 308 jatetxe, taberna, denda eta denda espezializatuk hartuko dute parte edizio honetan; 200 jarduera inguru egingo dira, 156 artistarekin, eta 125 pertsona enplegatuko dira jaialdia produzitzeko eta gauzatzeko.

    Jendeak, beste hainbat planen artean, musikako, dantzako eta antzerkiko 58 ikuskizun, euskal kiroleko 34 jarduera, zero kilometroko produktuen dastaketa espresak eta gastronomia-tailer txikiak izango ditu.

    Aste Santua Bilbon gozatzeko Bilbao basque Festen programa osoa eta informazio gehigarria dago hemen: https://www.bilbao.eus/basquefest/. 15.000 txapa banatuko dira, QR kode bat izango dutenak webgune ofizialera lotzeko. Gune horretan jarduerei, ordutegiei eta jaialdiari buruzko xehetasun guztiak daude jasota, baita bestelako informazio garrantzitsua ere.

    SARE SOZIALAK

     

by

    • 1.500 m2 baino gehiagoko Txoko Gourmet karpak Euskadiko eskualde turistikoak bilduko ditu, 0 kilometroko produktu eta erakargarri turistiko onenak ezagutzera emateko.

    • Karpa horretan, dastaketa espresak eta sukaldaritza-tailer laburrak egongo dira; guztira, 1.376 plaza. Dastaketetan eta tailerretan parte hartzeko, 2 euroko prezio sinbolikoa ordaindu beharko da. Diru hori Norai Elkartearen Etorkizuna Musikatan proiektura bideratuko da, zeinak helburu baitu haurren eta nerabeen bizitzak musikaren bidez eraldatzea.

    • Euskal kirol tradizionalen erakustaldiak eta probak ere izango dira Areatzan, bai eta Bizkaiko Orga Txapelketa Ofizial mistoa ere, martxoaren 28an (eguena), 12:30ean.

    • Bilboko Udalak antolatzen du Bilbao Basque Fest jaialdia, eta musikarekin, zinemarekin, dantzarekin eta antzerkiarekin lotutako 200 bat jarduera eskainiko ditu uriko 30 espaziotan.

Areatza izango da, Bilbao Basque Fest jaialdiaren edizio guztietan legez, euskal gastronomia onenaren gune nagusia. Bertan, jendeak dastaketa espresak eta sukaldaritza-tailerrak disfrutatu ahalko ditu egunero, eta herri-kirolen proben zirrara bizi ahal izango du.

Txoko Gourmet karpa (1.500 m2) aho-sabairako, ikusmenerako eta usaimenerako paradisu bat izango da. Uriaren bihotzean kokatutako gune horretan, Euskadiko eskualde turistikoetako zero kilometroko produkturik onenak dastatu eta erosi ahal izango dira; hain zuzen ere, Urdaibaikoak, Arabako Errioxakoak, Gorbeialdekoak, Goierrikoak, Uribekoak, Iparraldekoak eta Tolosaldekoak. Besteak beste, Idiazabalgo gazta, Ezpeletako piperrak, Urigoitiko txorizoa, txakolina, izozkiak, txokolatea, eztia, ogia, euskal pastela, euskal bermuta eta Samaniegoko ardoa dastatu ahal izango dira dastaketa espresetan. Gure lurraldeko jan-edan zoragarri horiek dastatzeko lehen txanda 12:00etan hasiko da, eta azkena, 18:00etan (martxoaren 28an, eguenean, 18:10ean, eta martxoaren 31n, domekan, 13:30ean). Dastaketetan 900 pertsonak parte ahal izango dute guztira.

Txoko Gourmeteko beste jarduera izarretako bat tailer gastronomikoak izango dira. 45 minutuko tailer horietan, 476 lagunek zenbait plater prestatzen ikasiko dute, adibidez: Bilboko pintxo tipikoak, Eusko Label txahaleko tartarra, baserriko nigiria eta bakailao-zebitxea. Ikastarotxo horiek martxoaren 28tik (eguena) martxoaren 30era (zapatua) egingo dira, 12:15ean, 13:15ean, 17:15ean eta 18:15ean.

Tailerretan nahiz dastaketa espresetan parte hartu nahi dutenek Gourmet Txokoan bertan eman beharko dute izena. Saio horiek 2 €-ko prezio sinbolikoa izango dute, eta eskudirutan ordaindu beharko da. Diru hori Norai Elkartearen Etorkizuna Musikatan proiektura bideratuko da, zeinak helburu baitu haur eta nerabeen bizitzak musikaren bidez eraldatzea.

DASTAKETA ESPRESAK

Martxoaren 28an (eguena)

  • 12:00etan (1. aretoa) Urdaibaiko esentziak. Txakolina eta kontserbak
  • 12:10ean (2. aretoa) Samaniegoko ardoak (Arabako Errioxa)
  • 13:00etan (1. aretoa) Ezpeletako piperra
  • 13:10ean (2. aretoa) Iza okindegia 
  • 4:00etan (1. aretoa)  Idiazabalen lurraldeko sagardoak
  • 14:00etan (2. aretoa) Bizkaiko jatorri-deiturako txakolina eta bermuta
  • 17:00etan (1. aretoa) Idiazabalen lurraldeko gaztak
  • 17:10ean (2. aretoa) Samaniegoko ardoak (Arabako Errioxa)
  • 18:00etan (1. aretoa) Uribeko txakolinaren 3 kolore
  • 18:10ean (2. aretoa) Bizkaiko jatorri-deiturako txakolina eta bermuta

​Martxoaren 29an (barikua)

  • 12:00etan (1. aretoa) Urdaibaiko esentziak. Txakolina eta kontserbak
  • 12:10ean (2. aretoa) Lezamako gildak
  • 13:00etan (1. aretoa) Tolosaldeko loraldi desberdinetako eztiak
  • 13:10ean (2. aretoa) Lapuebla de Labarcako ardoa (Arabako Errioxa)
  • 14:00etan (1. aretoa) Tolosaldeko loraldi desberdinetako eztiak
  • 14:10ean (2. aretoa) Urigoitiko txorizoak
  • 17:00etan (1. aretoa) Ardi-gazta
  • 17:10ean (2. aretoa) Bizkaiko jatorri-deiturako txakolina eta bermuta
  • 18:00etan (1. aretoa) Urigoitiko txorizoak

​Martxoaren 30ean (zapatua)

  • 12:00etan (1. aretoa) Eskuernagako ardoak (Arabako Errioxa) 
  • 12:10ean (2. aretoa) Euskal pastizak – Euskal pastela – Macaronsak
  • 13:00etan (1. aretoa) Maruri-Jatabeko artisau-izozkien dastaketa itsu-itsuan
  • 13:10ean (2. aretoa) Bizkaiko jatorri-deiturako txakolina eta bermuta
  • 14:00etan (1. aretoa) Maruri-Jatabeko artisau-izozkien dastaketa itsu-itsuan
  • 17:00etan (1. aretoa) Tolosaldeko txokolateak
  • 17:10ean (2. aretoa) Eskuernagako ardoak (Arabako Errioxa)
  • 18:00etan (1. aretoa) Tolosaldeko txokolateak

​Martxoaren 31n (domeka)

  • 12:00etan (1. aretoa) Euskal bermutak
  • 12:30ean (2. aretoa) Alkoholik gabeko cocktailak 1
  • 13:00etan (1. aretoa) Euskal bermutak
  • 13:30ean (2. aretoa) Alkoholik gabeko cocktailak

​SUKALDARITZA-TAILERRAK

Martxoaren 28an (eguena)

  • 12:15-13:00: Oso maki (sushi): arroza, atuna eta piparra-ozpina
  • 13:15-14:00: Oso maki (sushi): arroza, atuna eta piparra-ozpina
  • 17:15-18:00: Bilboko pintxo tipikoak: grilloak, gildak eta bilbainitoak
  • 18:15-19:00: Bilboko pintxo tipikoak: grilloak, gildak eta bilbainitoak

Martxoaren 29an (barikua)

  • 12:15-13:00: Pintxo beganoak: nigiri gunkana eta baserriko nigiria
  • 13:15-14:00: Pintxo beganoak: nigiri gunkana eta baserriko nigiria
  • 17:15-18:00: Atun-tartarra
  • 18:15-19:00: Atun-tartarra

Martxoaren 30ean (zapatua)

  • 12:15-13:00: Bakailao-zebitxea
  • 13:15-14:00: Bakailao-zebitxea
  • 17:15-18:00: Eusko Label txahaleko tartarra
  • 18:15-19:00: Eusko Label txahaleko tartarra

Martxoaren 31n (domeka)

  • 12:15-13:00: Bilboko pintxo tipikoak: grilloak, gildak eta bilbainitoak
  • 13:15-14:00: Bilboko pintxo tipikoak: grilloak, gildak eta bilbainitoak

HERRI KIROLETAKO PROBA IKUSGARRIAK

 

Karpa gastronomikoaren ondoan, Bilbao Basque Festeko jarduera txalotuenetako bat izango da; herri kirolak alegia. Probak eta erakustaldiak martxoaren 28an (eguena) hasiko dira, 12:30ean, Bizkaiko Orga Txapelketa Ofizialarekin. Lehiaketa horren ondoren, Areatzara hurbiltzen direnek maila goreneko harri jasotzaileen eta ingude-altxaketako desafio mistoak ikusi ahal izango dituzte.

 

Horiez gain, honako hauek izango dira herri-kirolen programaren barruan:

 

  • Martxoaren 28an (eguena), 17:30ean:
    • Aizkora-desafioa, 5 metroko altuerako mozketarekin.
    • Harri-zulatzaileen desafioa, taldeka.
  • Martxoaren 29an (barikua), 12:30ean:
    • Lehen mailako aizkolarien desafioa: Mozketa-mota ugari izango dira: lan luzea, mozketa bertikala, kolpekako mozketa eta abiadurak.
    • Iparraldeko jokoen desafioa: fardel-altxaketa, fardel-jaurtiketa eta ingude-altxaketa.
  • Martxoaren 29an (barikua), 17:30ean:
    • Trontza desafio mistoa.
    • Goma gaineko sokatira erakustaldia, munduko txapeldunen eskutik.
    • Sokatira desafioa.
  • Martxoaren 30ean (zapatua), 12:30ean:
    • Crossfit eta herri-kiroletako desafioa: talde mistoen arteko erloju kontrako proba bat izango da, non parte hartzaileek crossfiteko eta herri-kiroletako diziplinak egingo dituzten.
  • Martxoaren 30ean (zapatua), 17:30ean:
    • Pentatloi-desafioa: bost diziplina konbinatzen dituen erlojupeko proba bat da: harri-jasotzea, giza proba, aizkora, txinga eramatea eta lasterketa.
  • Martxoaren 31n (domeka), 11:00etan:
    • Bizkaiko eta Arabako bola-jokoak
    • Igela
    • Euskal pilotaren tailerra

Era berean, trontza, sokatira, artaburu-bilketa eta gurpil-arrastea ezagutzera emateko zenbait tailer egingo dira martxoaren 28tik (eguena) martxoaren 30era (zapatua), 11:30 eta 16:30 bitartean. Tailerretan zortzi urtetik gorakoek parte hartu ahal izango dute.

BILBAO BASQUE FEST ZENBAKIETAN

Bilbao Basque Fest euskal kulturaren jaialdia bost egunetan luzatuko da, sei gairekin –Gourmet, Kultura, Musika, Market, Zinema eta Sport–, uriko 30 espaziotan. 308 jatetxe, taberna, denda eta denda espezializatuk hartuko dute parte edizio honetan; 200 jarduera inguru egingo dira, 156 artistarekin, eta 125 pertsona enplegatuko dira jaialdia produzitzeko eta gauzatzeko.

Jendeak, beste hainbat planen artean, musikako, dantzako eta antzerkiko 58 ikuskizun, euskal kiroleko 34 jarduera, zero kilometroko produktuen dastaketa espresak eta gastronomia-tailer txikiak izango ditu.

Aste Santua Bilbon gozatzeko Bilbao Basque Festen programa osoa eta informazio gehigarria dago hemen: https://www.bilbao.eus/basquefest/. 15.000 txapa banatuko dira, QR kode bat izango dutenak webgune ofizialera lotzeko. Gune horretan jarduerei, ordutegiei eta jaialdiari buruzko xehetasun guztiak daude jasota, baita bestelako informazio garrantzitsua ere.

SARE SOZIALAK:

#BilbaoBasqueFEST