by

  • Casilda Iturrizar parkean eta Zabalgune eraikinean umeentzako jarduerak egingo dira: zirku-tailerrak malabareak eta akrobaziak egiten ikasteko, antzerki-saioak eta magia-ikuskizun sarituak.

  • Pertsonaia ospetsuenetako bat, Gargantua, Bilboko Guggenheim Museoaren zabalgunean egongo da txikien zain, txirristan irristatuz dibertitu daitezen.

  • Zazpi Kaleetan eta Areatzan antzerki-forman egingo diren ibilbideek eta Mirentxurekin eta Begotxurekin itsasadarrean itsasontziz egingo diren ibilbideek uria modu desberdinean ezagutzeko aukera emango dute, umorezko ukitu batekin.

  • Bilbao basque FESTek 200 jarduera inguru programatu ditu, gehienak doakoak, uribilduko hogeita hamar bat espaziotan banatuta, besteak beste gastronomiarekin, herri-kirolekin eta musikarekin zerikusia dutenak.

Bilbao basque FESTek, Udalak Aste Santuan antolatutako programak, adin guztietako pertsonentzako jarduerak eskainiko ditu: uribilduaren historia umorez ezagutzeko antzerki-ibilbideak eta txikienentzako planak.

Martxoaren 28tik 30era, Casilda Iturrizar parkea familien elkargune nagusietako bat izango da.    ilboko erdiguneko berdegune horretan zirku-tailerrak egingo dira malabarak eta akrobaziak egiten ikasteko, bai eta antzerki-saioak ere. Casilda Iturrizar parkeko umeen programazioa honela banatuko da:

  • “La Glo”, zirku-tailerrak (4 urtetik aurrera), martxoaren 28an (eguena), 29an (barikua) 30ean (zapatua), 12:30ean.
  • “Historias de un baúl”, familia-antzerkia, martxoaren 28an (eguena), 18:00etan.
  • “Mute”, familia-antzerkia, martxoaren 29an (barikua), 18:00etan.
  • “Bualá”, familia-antzerkia, martxoaren 30ean (zapatua), 18:00etan.

Zabalgune eraikina izango da jaialdian umeak liluratzeko oihala altxatuko duen beste toki bat.  Martxoaren 28an, eguena, 29a, barikua, eta 30ean, zapatua, 19:00etatik aurrera, “Oliver & Luiba: Los inventores” magia-ikuskizuna hasiko da. Lehen saria irabazi zuen 2023ko Espainiako Magiako Txapelketako magia komikoaren kategorian.    Sei pertsonaia dibertigarriren inguruan oinarritzen da argumentua, asmakizunen laguntzarekin eguneroko edozein gertaera gainditzen dutenak.

Umeentzako pertsonaia ospetsuenetako bat, Gargantua, ez da faltako Bilbao basque FESTekin daukan hitzordura. Guggenheim Bilbao Museoaren zabalgunean egongo da martxoaren 28tik (osteguna) 30era (larunbata), 11:00etatik 14:00etara eta 16:00etatik 19:00etara. Gainera, 12:00etatik 13:30era Txistularien Udal Bandaren zuzeneko musika izango du lagun; arratsaldeetan, 17:00etatik 18:30era, Jira Musika (28an, eguena), Ziortza eta Leire (29an, barikua) eta Izaldi (30ean, zapatua) arituko dira.

Gainera, jaialdiaren azken egunean, martxoaren 31n (domeka), Areatzako karpan hainbat jarduera izango dira 11:00etatik 14:00etara familia osoarentzat, hala nola Bizkaiko eta Arabako bolo-jokoak, igel-toka, belaunaldien arteko egur-tailerrak, euskal folkloreko jantzien erakusketa eta musika-animazioa Musikako Udal Eskolako txistu-bandarekin.

ANTZERKI-FORMAKO IBILBIDEAK ETA ITSASADARREAN ZEHARREKO IBILALDIAK

Zazpi Kaleetan eta Areatzan egiten diren antzerki-formako ibilbideak eta Mirentxurekin eta Begotxurekin itsasadarrean itsasontziz egiten diren ibilbideak ezinbesteko klasikoak dira Bilbao Basque FESTen. Bilboko anfitrioiek dei egingo dute uribilduaren historia modu original eta atseginean errepasatzeko ibilbide dibertigarria partekatzera, 12:00etatik aurrera, hilak 28an (eguena), 29an (barikua) eta 30ean (zapatua).

Beste ibilbide oso berezi bat Mirentxu eta Begotxu lagun pareak Bilboats itsasontzian Bilboko itsasadarretik eskaintzen duena da, Pio Baroja plazako pantalanetik irtenda. Komiko bikote UEFAren Women’s Champions League 2024ko finala zelan antolatuko luketen kontatuko digu, uribilduan egingo baita datorren maiatzaren 25ean.  Antzerki-formako paseoak 12 urtetik gorakoentzat dira eta 30 minutu irauten dute, eta hilaren 28an (eguena), 29an (barikua) eta 30ean (zapatua) egin daitezke, 11:30ean, 12:30ean, 13:30ean, 16:30ean, 17:30ean eta 18:30ean.  Tiketak (hiru euro) https://www.bilboats.com/ webgunean eta Bilboats-en bulegoan (Pio Baroja plaza) egongo dira eskuragarri.

BILBAO BASQUE FEST ZENBAKIETAN

Bilbao basque FEST euskal kulturaren jaialdia bost egunetan luzatuko da, sei gairekin – Gourmet, Kultura, Musika, Market, Zinema eta Sport –, uriko 30 espaziotan. 308 jatetxe, taberna, denda eta denda espezializatuk hartuko dute parte edizio honetan eta 200 jarduera inguru egingo dira, 156 artistarekin, eta 125 pertsona enplegatuko dira jaialdia produzitzeko eta gauzatzeko.

Jendeak, beste hainbat planen artean, musikako, dantzako eta antzerkiko 58 ikuskizun, euskal kiroleko 34 jarduera, zero kilometroko produktuen dastaketa arinak eta gastronomia-tailer txikiak izango ditu.

Aste Santua Bilbon gozatzeko Bilbao basque FESTen programa osoa eta informazio gehigarria dago hemen: https://www.bilbao.eus/basquefest/.

15.000 txapa banatuko dira, QR kode bat izango dutenak webgune ofizialera lotzeko. Gune horretan jarduerei, ordutegiei eta jaialdiari buruzko xehetasun guztiak daude jasota, baita bestelako informazio garrantzitsua ere.

SARE SOZIALAK:

#BilbaoBasqueFEST

by

  • Bilboko Udalak, Bizkaiko Foru Aldundiak eta Eusko Jaurlaritzak berriro ere lortu dute San Mamesera ekartzea kluben arteko Europako errugbi-txapelketa nagusietako finalak: EPCR Challenge Cup 2026 eta Investec Champions Cup 2026.

  • European Proffesional Club Rugby (EPCR) erakundeak beste behin izendatu du Bilbo egoitza anfitrioi gisa; historian hori gertatzen den bigarren aldia da, 2018ko finaletan lortutako arrakastaren ondoren. Cardiffeko Principality Stadium ikonikoa hautatu dute 2025eko finalak jokatzeko.

  • Gaur bertan Cardiffen egindako ekitaldian eman dira ezagutzera bi izendapenak; bertan izan dira Cristina Múgica, Bizkaiko Foru Aldundiko Lurralde Lehiakortasunerako eta Kanpo Sustapenerako Zuzendaria, eta Xabier Ochandiano, Bilboko Udaleko Garapen Ekonomiko, Merkataritza eta Enplegu Saileko Zinegotzia.

Bilboko Udalak, Bizkaiko Foru Aldundiak  eta Eusko Jaurlaritzak errugbi-federazioekin eta Athletic Clubekin batera, egindako elkarlanari esker, San Mames estadioan jokatuko dira berriro kluben arteko Europako errubi-txapelketa nagusiak: EPCR Challenge Cup 2026 eta Investec Champions Cup 2026.

Gaur goizean Cardiffeko Principality Stadium ikonikoan egindako ekitaldian, European Proffesional Club Rugby (EPCR) erakundeak ezagutzera eman du non jokatuko diren 2025eko eta 2026ko finalak. Euskal erakundeetako ordezkariak bertan izan dira, hain zuzen ere, Cristina Múgica, Bizkaiko Foru Aldundiko Lurralde Lehiakortasunerako eta Kanpo Sustapenerako Zuzendaria, eta Xabier Ochandiano, Bilboko Udaleko Garapen Ekonomiko, Merkataritza eta Enplegu Saileko Zinegotzia.

EPCR erakundeak The Sports Consultancy-rekin batera egindako lizitazio-prozesuaren ostean, non hamabi herrialdetako 23 estadioren eskaintzak jaso dituzten, EPCR erakundearen Batzarrak erabaki du EPCR Challenge Cup 2026 eta Investec Champions Cup 2026 txapelketak esleitzea “ezin hobeto hornituta dagoen Bilboko San Mames estadioari”. Bestalde, Galesko hiriburuko Principality Stadiumek, 74.000 ikusle hartzeko gaitasuna duenak, datorren urteko errugbi-finalak hartuko ditu.

“Nazioarteko errugbia Bizkaira itzuliko da. Zaleentzako eta lurraldearentzako albiste paregabea izateaz gain, Bilbo Bizkaia nazioartean kokatzeko aukera ematen duten ekitaldiak antolatu eta erakartzeko erakundeek egindako lan onaren aintzatespena ere badakar, izan ere, horri esker gizartean arrastoa, legatua, uztea da asmoa” adierazi du Elixabete Etxanobek, Bizkaiko Ahaldun Nagusiak.

“Abegikortasuna, harrera-gaitasuna eta kirol-elkarte zein -kluben eta, oro har, herritarren inplikazioa dira baloratzen diren aktiboak, eta ondo kokatzen gaituzte beste lurralde batzuekin lehiatzeko orduan. 2026an Bilbok eta Bizkaia osoak errugbiko finalez gozatzeko aukera izango dugu eta beste behin erakutsiko dugu zer garen eta partekatzeko zer daukagun”, esan du ahaldun nagusiak.

“Aukera paregabea izango da San Mamesen bigarren aldiz maila goreneko errugbia ikusteko. Pozarren gaude eta EPCR erakundeari eskerrak eman nahi dizkiogu nazioarteko kirol-ekitaldi hau hartzeko Bilbo hiriarengan agertu duen konfiantzagatik; 2018an lortutako arrakasta lortzea espero dugu gutxienez”, adierazi du Xabier Ochandiano Bilboko Udaleko Garapen Ekonomiko, Merkataritza eta Enplegu Saileko Zinegotziak. “Zintzotasuna, grina, elkartasuna, diziplina, errespetua, talde-lana, kiroltasuna eta ahaleginaren kultura errugbiari lotutako balioak dira, eta gure hirian ere horien aldeko apustua egiten dugu”.

“Azken urteotan kirol-ekitaldi garrantzitsuak izan ditugu Euskadin. Horrek erakusten du gaitasuna daukagula antolakuntza-erronka horiei arrakastaz aurre egiteko, eta beti izaten dugu euskal herritarren ahalegina eta lankidetza gure alde. Erronka horiek geure gain hartzen ditugu, Euskadiren irudia nazioartean indartzeko asmoz. 2026an Bilbon jokatuko diren errugbiko finalek berriro ere aukera emango digute erronkari ilusioz aurre egiteko eta 2018ko finaletan lortutako arrakasta gainditzeko helburua duen herri gisa nazioartean aurkezteko. Horretarako, beste batzuetan ikusi dugun bezala, funtsezkoak izango dira erakundeen arteko lankidetza eta herritarren laguntza eta inplikazioa”, esan du Bingen Zupiriak, Eusko Jaurlaritzako Kultura eta Hizkuntza Politikako Sailburuak.

Dominic McKay, EPCR erakundeko presidenteak, zera adierazi zuen bi izendapenak iragartzeko ekitaldian: “Atsegin handiz adierazten dizuegu Cardiff eta Bilbo izango direla EPCR-ren 2025eko eta 2026ko finalak hartuko dituzten hiriak. 2026ko finalari dagokienez, Bilbora itzultzeko irrikaz gaude, izan ere, errugbiaren egundoko ospakizunaren egoitza izan zen 2018. urtean. Bilbo bezalako hiri anfitrioiak aukeratzeak islatzen du gure asmoa: jarraitzaileentzat, klubentzat eta interesa duten alderdientzat esperientzia bikainak eskaintzea. Badakigu Bilbok ikusleak erakarriko dituela eta gure kirola zaletu gehiagorengana hurbilduko duela, hiri anfitrioi zoragarria baita”.

Euskal erakundeek Cardiff zoriondu nahi izan dute 2025eko finalak hartzeko izendatu dutelako. Leku ikonikoa eta enblematikoa da errugbiarentzat, eta Bilbok 2026an hartuko du haren lekukoa.

Gogorarazi beharra dago San Mamesek beste bi kirol-ekitaldi historiko hartuko dituela datozen hilabeteetan: UEFA Women’s Champions League txapelketako finala 2024ko maiatzaren 25ean eta UEFA Europa League txapelketaren finala 2025ean.

2018AN EGIA BIHURTUTAKO AMETS BAT

Bilbo egoitza gisa hautatzea historikoa izan zen 2018an, EPCRren finalen asteburua lehen aldiz errugbiko sei nazio tradizionaletatik kanpo antolatu zenean. Gloucester Rugby talde britainiarrak eta Cardiff Blues galestarrak inauguratu zituzten Bilboko Europako finalak 2018an, Challenge Cupeko titulua lortzeko. Bestalde, Leinster Rugby talde ingelesak eta Racing 92 frantziarrak Champions Cupeko finala jokatu zuten. Leinster Rugby taldeak Txapeldunen Kopako titulua eskuratu zuen orduan eta Cardiff Rugby taldeak Challenge Cup txapelketaren garaikurra jaso zuen.

by

  • Xabier Ochandiano Bilboko Udaleko Garapen Ekonomiko, Merkataritza, Turismo eta Enpleguko zinegotziak eta Ainara Basurko Ekonomia Sustapen Saileko foru diputatuak Bilbao Bizkaia Film Commission-en 2023ko jarduera-balantzea aurkeztu dute gaur Zabalgune eraikinean.

  • Bilbao Bizkaia Film Commission-ek lagundutako ikus-entzunezko proiektuek izandako eragin ekonomiko zuzena 58,5 milioi eurokoa izan da, eta zifra hori laukoiztu egin da 2021ean izandako datuarekin alderatuta (13,8 milioi euro).

  • 2023an 151 ekoizpen filmatu ziren, eta 1.026 filmaketa-egun izan ziren Bilbo-Bizkaian, azken hau datu errekorra izanik, aurreko urtean baino %74 jardunaldi gehiago. 12 film luze eta 7 serie, hauek izan  dira gehien areagotu diren ekoizpenak, %140 eta %40 hurrenez hurren, inpaktu ekonomikoaren gastu errealaren %90 sortuz, jarduera pizgarri fiskal berriak indarrean dauden lehenbiziko urtean.

  • 33 film labur, 21 dokumental, 31 telebista-saio, 8 bideoklip, 2 webserie, 33 publizitate-iragarki eta 4 argazki-saiok osatzen dute iazko jarduera.

Xabier Ochandiano Bilboko Udaleko Garapen Ekonomiko, Merkataritza, Turismo eta Enpleguko zinegotziak eta Ainara Basurko Ekonomia Sustapeneko Saileko foru diputatuak Bilbao Bizkaia Film Commission-en 2023ko jarduera-balantzea aurkeztu dute gaur Zabalgune eraikinean. Oso datu positiboak eman dituzte, uria eta lurraldea destino lehiakor eta erakargarria baitira ikus-entzunezko industriarentzat.

Bilbao Bizkaia Film Commission-ek lagundutako ikus-entzunezko proiektuek izandako eragin ekonomiko zuzena 58,5 milioi eurokoa izan da, eta zifra hori laukoiztu egin da 2021ean izandako datuarekin alderatuta (13,8 milioi euro). Eragin ekonomiko induzitua(1)ri dagokionez, 2023an 139,6 milioi eurokoa izan zen, 2021ekoa baino sei aldiz handiagoa.

Datuek argi hitz egiten dute: 151 ekoizpen filmatu dira Bilbao Bizkaia Film Commission-en laguntzarekin, eta 269 ekoizpeni eman zaie arreta. Horietatik 68 nazioartekoak izan dira. Guztira, teknikari eta artista artean, 1.113 pertsona mobilizatu dira (figuranteak kontuan hartu gabe), eta 1.026 filmaketa-egun izan dira Bilbo-Bizkaian, 2022an baino %74 gehiago.

Zifren artean azpimarratzekoa da, halaber, film luzeak (12) eta serieak (7) areagotu direla gehien aurreko urtearen aldean, %140 eta %40, hurrenez hurren. Izan ere, gero eta eragin ekonomiko handiagoa eragin duen gastu errealaren %90 aipatutako film luzeek eta serieek osatu dute. 33 film labur, 21 dokumental, 31 telebista-saio, 8 bideoklip, 2 webserie, 33 publizitate-iragarki eta 4 argazki-saiok osatzen dute iazko Bilbao Bizkaia Film Commission-ek lagundutako jarduera.

Pizgarri fiskal berriak indarrean dauden lehenbiziko aplikazio-urtean, Bilbo-Bizkaia finkatu egin da ikus-entzunezko industriaren lehentasunezko destino gisa. Horren guztiaren ondorioz, lurraldeko 67 udalerritan filmatu da, Bilbo udalerri horien erdigunea izaki.

“Hiriak momentu bikaina bizi du ikus-entzunezko industriaren lehentasunezko agertoki gisa, eta horrek garapen ekonomiko handiagoa dakar, enplegua sortuz, eta sustapen-erakargarritasun handia Bilbo-Bizkaiarentzat. Gorantz doan sektore ekonomiko honetan filmaketak erakartzeko eta kudeatzeko apustu aproposa bere fruituak ematen ari da”, nabarmendu du Xabier Ochandianok.

Ainara Basurko Ekonomia Sustapeneko foru diputatuak adierazi duenez, “2023 urte bikaina izan da ikus-entzunezko industriaren bultzadarako eta Bilbao Bizkaia Film Commission-entzat. Filmaketen datuak hobetzeaz gain, ikusten ari gara urtez urte ekoizpen handiak erakartzeko gai garela, bai kuantitatiboki bai kualitatiboki. Ez da kasualitatea. Gure ikus-entzunezko industriaren sustapena eta garapena bultzatzeko estrategia partekatu baten emaitza da. Eta Bilbo-Bizkaia,  zinemaren, telebistaren eta entretenimenduaren industriarako helmuga erakargarri eta lehiakor bihurtzeko modu diskretu eta eraginkorrean egiten den lan guztia islatzen dute“.

HAZTEN ARI DEN SEKTORE BAT

Urian eta lurraldean filmatu diren film luzeen ondoko izenburu hauek argi erakusten dute ikus-entzunezkoen sektorea nola hazten ari den Bilbo eta Bizkaian: Hate Songs, Alejo Levisek zuzendua; Una Ballena, Pablo Hernandorena; Anatema, Jimina Sabadúrena; El bus de la vida eta Cuatro Paredes, Ibon Cormenzanarenak; El Hoyo 2, Galder Gaztelu-Urrutiak zuzendua; Nina, Andrea Jaurrietarena; El Molino, Alfonso Cortés-Cavanillasena; Jone, batzuetan, Sara Fantovarena; Nosotros, Helena Tabernarena; No puedo vivir sin ti, Santiago Requejorena; edo Marco, Aitor Arregi, Jon Garaño eta Jose Mari Goenagarena.

Serieei dagokienez, aipagarriak dira The othe side, Daniel Écijak Disney+entzat sortua; Detective Touré, Jon Arretxeren eleberrietan oinarritua, EITB eta RTVErentzat; Ángela (Atresmedia/Disney+), Querer (Movistar+), Cicatriz (Amazon Prime/RTVE),eta Romi (Mediaset). National Geographic-en Europe from above dokumentala eta Fushigi Hakken telebista-saioa, Tokyo Broadcasting kanalarena, Bilbok eta Bizkaiak sektorean dauzkaten posizionamendu eta arrakastaren adibide garbia dira. Hiriak zenbait ekoizpen arrakastatsuren aurre-estreinaldiak ere hartu zituen iaz, hala nola 20.000 especies de abejas (Estíbaliz Urresola), El silencio (Aitor Gabilondok Netflix-entzat) eta Una vida no tan simple (Félix Viscarret).

Publizitate-iragarkien sektorean, zifrak pixka bat jaitsi dira azken urtean; joera horrek merkatua sare sozialen eta influencerren munduan kontzentratzen duelako, eta, beraz, produkzioek ez dute behar Film Commission baten laguntza bezalako zerbitzurik. Gauza bera gertatzen da argazki-saioekin, espazio publikoen edo kanpoko espazioen ordez estudioak edo espazio itxiak bilatzen baitituzte, eta, beraz, ez dute lankidetza hori behar.

Bilbao Bizkaia Film Commission-ek 2023an babestutako ikus-entzunezko proiektuen eragin sozioekonomikoari buruzko azterketa eta analisia ikerketan, Bilbo-Bizkaiari buruz ikus-entzunezko produkziorako ekosistema gisa hoberen baloratzen diren alderdietako batzuk pizgarri fiskalak (4,80/5) eta konpromiso publikoa (4,50/5) dira. Hotel- eta logistika-gaitasuna, segurtasun juridikoa eta baimenak eta erabilgarritasuna ere positiboki baloratu dira, bost puntutik lau baino gehiago jaso baitituzte.

Bilbo-Bizkaia agertoki gisa hautatzeko arrazoien artean, ekoizpen-etxeek zerga-pizgarriak eta laguntza publikoak (4,73/5) aipatu dituzte lehenik, eta, ondoren, esperientzia propioa (4,22/5) eta lokalizazioak (4,08/5). Bilbao Bizkaia Film Commission-ek emandako laguntzaren balorazio orokorra oso ona izan da: 5 puntutik 4,9. Nabarmentzekoa da laguntza pertsonalizatu eta hurbilekoa, eta ekoizpen-etxeen behar espezifikoetara egokitzeko malgutasuna.

AURREIKUSPEN ONAK 2024RAKO

Ekoizpen batzuk dagoeneko amaituta daude, hala nola Querer seriearen filmaketa, eta urtarrilean hainbat ekoizpen jarriko dira martxan: Romi eta Cicatriz serieak, Cuerpo Escombro eta Sin Instrucciones filmak, edo Soy Nevenka lanaren grabaketa, Iciar Bollaínek zuzendua, hilabete honen amaieran abiatuko dena. Beraz, urteko lehen hiruhileko honetarako aurreikuspenak oso positiboak dira: Bilbo-Bizkaia ikus-entzunezko filmaketak egiteko erreferentzia gisa sendotzen eta bultzatzen dute Estatu osoan eta Europan.

2024. urterako lehentasunezko erronken artean, ikerketak tokiko talentua indartzeko beharra azpimarratu du prestakuntzaren eta lanbide-kualifikazioaren aldeko apustua eginez, eta ekoizpen- eta azpiegitura-zentroen eskaintza handitzea eta hobetzea.

Ildo horretan, Bilbo-Bizkaia Ikus-entzunezkoen Hub bat ari da sortzen, Zorrotzako puntan kokatuko den proiektu batean. Aurreikuspenen arabera, 100.000 metro koadroko espazio bat egongo da filmaketarako, plato digitalekin, postprodukzioko espazioekin, kanpoaldeko filmaketekin, kamerinoekin, biltegiekin, bulegoekin eta abarrekin. Horrek, zalantzarik gabe, balio erantsi handia ekarriko dio Bilbo-Bizkaiari ikus-entzunezko industriaren esparruan.

LEHENENGO URTEA PIZGARRI FISKAL BERRIEKIN

Bilbo-Bizkaiak, 2023ko urtarriletik aurrera, zerga-tratamendu lehiakorragoa du ikus-entzunezko ekoizpenetarako. “Kultura sustatzeko pizgarri fiskalak eguneratzen eta handitzen dituen foru arauaren” helburua da Bilbo-Bizkaiak kultur ekoizpenerako daukan erakargarritasuna sendotzea, sektoreko eragileek gure lurraldean egiten duten lana babestuz eta arreta berezia jarriz euskarazko ekoizpenetan (bai ikus-entzunezkoak, bai eszenikoak).

Kenkari hori kultur izaerako honako ekoizpen hauei aplikatzen zaie, edozein nazionalitate dutela ere: film luze eta laburrak eta beste ikus-entzunezko lanak (hala nola fikziozko serieak, animaziozkoak edo dokumentalak, zinematografikoak, telebistakoak nahiz formatu digital berrietakoak). Kenkariaren oinarria ekoizpenaren kostuak osatuko du, bai eta ekoizpen-etxeak ordaindu beharreko kopiak lortzeko gastuek eta publizitate- eta sustapen-gastuek ere. Aplika daitekeen kenkaria %35etik %60ra bitartekoa izango da, lurraldean egindako gastu eta inbertsioen ehunekoaren arabera, eta beste % 10ean gehituko da baldin eta erabat euskaraz egindako obra bada. Horrela, gehieneko kenkaria % 70ekoa izango da.

BILBAO BIZKAIA FILM COMMISSION

2015ean, Bilboko Udalak eta Bizkaiko Foru Aldundiak Bilbao Bizkaia Film Commision zerbitzu publikoa eta doakoa sortzea sustatu zuten, filmaketak artatzeko, kudeatzeko eta erakartzeko. Urteotan 1.547 filmaketari arreta eman zaie, eta 1.016 ikus-entzunezko proiektu gauzatu dira.

Bilbao Bizkaia Film Commission-en laguntza egonkor eta pertsonalizatua ekoizpenaren fase guztietan ematen da, lokalizazioetan, zerbitzu profesionaletan, administrazio-izapideetan, ekoizpen-espazioetan, ostatuan eta logistikan, bai eta babes eta konfiantza instituzionalean, segurtasun juridikoan eta pizgarri fiskaletan ere.

Lan hori guztia lankidetza publiko-pribatuari esker egiten da, ekoizleen eta eragile pribatuen eta erakunde publikoen arteko bitartekari gisa jarduten baitu. Bilbo-Bizkaiko filmaketa-industrian aurrera egiteko beharrezko lankidetza da beraz. Bilbao Bizkaia Film Commission Spain Film Commission-eko eta European Film Commission Network-eko kidea da. Azken horrek 90 film commission-etik gora ordezkatzen ditu, Europako Batzordearen laguntzarekin.

SARE SOZIALAK:

1 Eragin ekonomiko induzitua: ikus-entzunezkoen sektoreko edo ikus-entzunezko sektorearen mendeko industrietako langileek jasotako ordainsariak kontsumo pribatuan (etxeko ekonomiak) eragiten duen gastuari lotuta dago.

by

  • Turismo Berrikuntza eta Teknologiak Kudeatzeko Estatuko Merkataritza Sozietateak (SEGITTUR) ematen du izendapen hori, eta helburu du helmuga turistikoen lehiakortasuna eta bizilagunen bizi-kalitatea hobetzea.

  • Horrela, uria batu egingo da Bartzelonak, Donostiak, Gijónek, Málagak, Tenerifek, Santanderrek eta beste zenbait hirik osatzen duten taldera. Hiri horiek bikaintasuna gidatzen dute DTI ereduaren ezarpenaren arloan eta garapen turistikoaren abangoardian daude.

Bilboko Udalak “Helmuga Turistiko Adimenduna” (DTI) bereizgarria jasoko du gaur FITUR-en. Bilbao Ekintzako zuzendari nagusi Javier Garcinuñok jasoko du aitorpena, Udalaren ordezkari gisa, Madrilgo IFEMAko 10. pabiloiko Know-How & Export auditoriumean, 10:30ean.

Helmuga Turistiko Adimenduna programa Turismoko Estatu Idazkaritzak (SETUR) sustatutako eta Berrikuntza eta Teknologia Turistikoak Kudeatzeko Estatuko Merkataritza Sozietateak (SEGITTUR) kudeatutako proiektu bat da, eta programaren helburua da helmuga turistikoen lehiakortasuna eta bertako bizilagunen bizi-kalitatea hobetzen laguntzea, bost jarduera-eremutan eraginez: gobernantza, berrikuntza, teknologia, jasangarritasuna eta irisgarritasuna.

Helmuga Turistiko Adimendunaren bereizgarria DTI metodologian ezarritako eskakizunen betetze-mailan % 80ko edo gehiagoko puntuazioa lortzen duten lekuei ematen zaie. Bilbok % 83,4ko puntuazioa lortu zuen.

Metodologia horrek jarduera turistikoaren zeharkakotasuna eta toki bakoitzaren ezaugarri bereizgarriak kontuan hartzen dituen kudeaketa-eredu bat ezartzea sustatzen du.

Helmuga Turistiko Adimenduna honela defini daiteke: helmuga turistiko berritzaile bat, abangoardiako azpiegitura teknologikoaren gainean finkatua, lurralde turistikoaren garapen jasangarria bermatzen duena, guztientzako irisgarria dena, bisitariaren eta ingurunearen arteko interakzioa eta integrazioa errazten dituena eta bisitariak helmugan duen esperientziaren kalitatea eta bertako bizilagunen bizi-kalitatea hobetzen dituena.

Horrela, Bilbo batu egingo da DTI ereduaren ezarpenaren arloan bikaintasuna gidatzen duten helmugen multzora (Bartzelona, Donostia, Gijón, Málaga, Tenerife, Santander…), eta garapen turistikoaren abangoardian kokatuko da etorkizunera begirako estrategia batekin.

SARE SOZIALAK:

by

  • Bizkaiko Foru Aldundiak eta Bilboko Udalak Bilbo-Bizkaia destinoa aurkeztuko dute gaur arratsaldean, 15:30etik aurrera, Turismoaren Nazioarteko Azokako Euskadi Standean.

  • Hauek dira 2024ko ardatz turistikoak: Bizkaiko natura, parkeak eta paisaiak; 16 bizikleta-ibilbide; ekitaldi handiak, hala nola UEFAren Emakumezkoen Champions League-ren finala.

Bilbo-Bizkaiak gaur arratsaldean bere turismoko produktuak aurkeztuko ditu Europako merkatuko hartzaile eta eskaintzaileentzat lider den FITUR azokan. 15:30etik aurrera izango da, Euskadiko standean (9. pabiloia, 9C06 standa).

Aurkezpena Sonia Pérez Garraio, Mugikortasun eta Turismoko foru diputatuak eta Xabier Ochandiano Bilboko Udaleko Ekonomiaren Garapen, Merkataritza, Turismo eta Enplegu Saileko zinegotziak egingo dute. Produktu turistiko berrien eta Bilbo-Bizkaiaren erakargarri nagusien berri emango dute. Fiturren, besteak beste, Leire Sáez Bizkaiko Turismoko zuzendaria eta Javier Garcinuño Bilbao Ekintza udal-sozietateko zuzendaria egongo dira, bakoitza bere lantaldeak lagunduta.

2024. urteari begira, erakunde biek turismo-eskaintza batzuk nabarmendu nahi dituzte erakargarri gisa, eta eskaintza horien protagonista dira, hain zuzen ere, hiriko ekitaldiak (esaterako, emakumezkoen UEFA Champions League-aren finala) eta naturako turismoa. Mendiak eta haranak, herriak, kultura-ondarea, gastronomia, jarduerak eta Bizkaiko barnealdeko nortasuna izango dira lurraldearen erakargarri nagusiak edizio honetarako.

2030erako Turismo Estrategiaren barruan, Bizkaiko barnealdeari zuzenean lotutako turismo-produktu bi daude: parke naturalak, eta natura eta paisaiak. Naturagune babestuak, gailurrak eta ekoturismoa biltzen dituen katalogo bat aurkeztuko da gaur. Gorbeia, Urkiola eta Armañon arduraz gozatzeko gonbidapena egingo da. Era berean, Bizkaia osoa, kostaldea, barnealdea zein metropolia, bizikletaz ezagutzeko 16 ibilbidez osatutako dokumentu bat ere aurkeztuko da.

Sonia Pérez Garraio, Mugikortasun eta Turismoko foru diputatuak ziurtatu duenez, “Fiturrek kanpo-proiekzio paregabea eskaintzen digu geure ondare naturala erakusteko eta Bizkaia osoan –kostaldean zein barrualdean– beti ikusgarri diren paisaietan egoteko. Hori dena, aukera berriak baztertu gabe, hala nola gure lurraldea zikloturismoaren bidez ezagutzea eta gozatzea“.

“Helburua da barne-turismoa sendotzea eta, horretarako, turismoaren sektoreko eragile publiko eta pribatuen artean eskaintza lehiakorra sortzea, jasangarritasunaren aldeko apustua eginez (ingurumenekoa, soziala eta ekonomikoa).”

BILBO EMAKUMEEN CHAMPIONSEKIN

Bilbo-Bizkaia kultura- eta kirol-ekitaldi handiak hartzeko eta gozatzeko destino gisa ere sustatzen da. Hainbat eskaintza aurkezten ditu, beraiei lotutako baliabide turistikoei balioa ematen dietenak, eta esperientzia turistiko globala eskaintzen du, nazioartean erakargarria eta lehiakorra den proposamen batekin.

2024rako erakargarri nagusien artean, UEFA Women’s Champions League-ren finala da azpimarratzekoa. San Mamesen jokatuko da, maiatzaren 25ean. Final historiko bat izango da, Europako emakumezkoen futbol-ekitaldi garrantzitsuena.

Xabier Ochandiano Bilboko Udaleko Ekonomiaren Garapen, Merkataritza, Turismo eta Enplegu Saileko zinegotziak esan duenez, “emakumezkoen Championseko finala “Katedralean” jokatzea aukera handia izango da gure hiriburua, gure jendea eta gure giro ikusgarria agerrarazteko Europa eta mundu mailako erakusleiho honetan. Horrek hiriarekiko eta lurraldearekiko ezagutza eta erakarpen handiagoak ekarriko ditu”. Modu berean, azpimarratu egin ditu “kultura, kirol eta arte alorretako hitzorduen kalitatea eta ugaritasuna, baita Bilbo-Bizkaian bisitatu daitezkeen leku interesgarri ugariak ere”.

Ochandianok azpimarratu duenez, “Euskadiko turismo kulturalari dagokionez, Bilbok duen lidergoa tokiko ekonomiaren zati garrantzitsu eta gero eta handiagoa da, eta hiriburuan turismoa asko hazi da”. Bilbok 1.149.698 bisitari izan zituen 2023ko urtarriletik azarora. % 50,9 atzerritarrak izan ziren, batez beste 1,98 eguneko egonaldia, eta bisitarien batez besteko balorazio orokorra 10etik 8,27 izan zen.

Bilbo-Bizkaiak hainbat proposamen ditu, eta haien artean nabarmentzekoak dira Bilbao BBK Live, Bilbao Blues Festival, BBK Bilbao Music Legends Fest eta BIME musika-jaialdiak.  Horiei nazioarteko zinema gehitu behar zaie, hala nola ZINEBI, FANT eta Zinegoak. Azkenik, Guggenheim Bilbao Museoa protagonista nagusitzat duten erakusketa artistikoak daude, baita bisitariak beste inon topatuko ez dituen erakargarri turistiko eta herriko jai ugariak ere.

Eskaintza zabal horren ikuspegi bateratua emateko, katalogo bat sortu da “The Place to BE. 2024: Irabazteko lurraldea” izenburupean. Katalogo horretan, hauek biltzen dira, besteak beste: musika-panoramaren programazioa, kirol-ekitaldiak, hitzordu eta jai tradizional eta errotuenak, artea bere askotariko formetan, zinema letra larriz eta jaialdiak (On Stage). Eta hori guztia Bilboko eta Bizkaiko zenbait proposamen eta tokitan egiteko ekimen eta bisitaz osatzen da.

SARE SOZIALAK:

by

  • Urtarrilaren 24tik 28ra, Bizkaiko Foru Aldundiak eta Bilboko Udalak Bilbao Bizkaia helmuga turistikoa sustatuko dute Turismoaren Nazioarteko Azokan (FITUR), eta, bertan, azpimarratu egingo dituzte eskualdeak eskaintzen dituen natura-ingurunea, bizikleta-ibilbideak eta kultura- eta kirol-ekitaldi handiak, hala nola emakumezkoen UEFA Champions League-aren finala.

  • Sonia Pérez, Garraioetako, Mugikortasuneko eta Turismoko foru-diputatua, eta Xabier Ochandiano, Bilboko Udaleko Ekonomiaren Garapeneko, Merkataritzako, Turismoko eta Enpleguko Saileko zinegotzia, FITUR-en inaugurazioan izango dira, Bilbao Bizkaiko turismo-produktu berriak in situ aurkezteko.

Bilbo Bizkaia aurten ere egongo da Europako merkatuko hartzaile eta eskaintzaileentzako lider den FITUR azokarekin urtero daukan hitzorduan. Urtarrilaren 24tik 28ra, Bizkaiko Foru Aldundia eta Bilboko Udala batera izango dira azokan Bilbao Bizkaia helmuga sustatzen. Garraioetako, Mugikortasuneko eta Turismoko foru-diputatu Sonia Pérez, Bizkaiko Turismoko zuzendari Leire Sáez eta Bilboko Udaleko Ekonomiaren Garapeneko, Merkataritzako, Turismoko eta Enpleguko Saileko zinegotzi Xabier Ochandiano eta bere taldea FITUR-en inaugurazioan izango dira, urtarrilaren 24an (eguaztena), Bilbao Bizkaiaren turismo-produktu berriak eta alderdi erakargarrienak in situ aurkezteko.

2024. urteari begira, erakunde biek turismo-eskaintza batzuk nabarmendu nahi dituzte erakargarri gisa, eta eskaintza horien protagonista dira, hain zuzen ere, hiriko ekitaldiak (esaterako, emakumezkoen UEFA Champions League-aren finala) eta naturako turismoa. Mendiak eta haranak, herriak, kultura-ondarea, gastronomia, jarduerak eta Bizkaiko barnealdeko nortasuna izango dira edizio honetarako lurraldearen erakargarri nagusiak.

Sonia Pérez Mugikortasuneko, Garraioetako eta Turismoko foru-diputatuak aurkeztuko ditu Bizkaiko turismo-produktu berriak. Zehazki, bi euskarri berri jarriko dira sektoreko profesionalen eta Bilbao Bizkaiaren erakusmahaiak bisitatzera animatzen direnen eskura.

NATURA, PARKEAK ETA PAISAIAK BIZKAIAN

2030erako Turismo Estrategiaren barruan, Bizkaiko barnealdeari zuzenean lotutako turismo-produktu bi daude. “Parke naturalak” eta “Natura eta paisaiak” produktuak Bizkaiko barrualdea osatzen duten turismo-kudeaketako erakunde guztien arteko kontzeptualizazio, egituraketa eta formulazio estrategiko baten emaitza dira. Helburua da barne-turismoa sendotzea eta, horretarako, turismoaren sektoreko eragile publiko eta pribatuen artean eskaintza lehiakorra sortzea, jasangarritasunaren aldeko apustua eginez (ingurumenekoa, soziala eta ekonomikoa).

Naturagune babestuak, gailurrak eta ekoturismoa biltzen dituen katalogo bat aurkeztuko da FITUR-en. Gorbeia, Urkiola eta Armañon arduraz gozatzeko gonbidapena egingo da. Bestalde, ekitera animatzen ditu turistak: begiratokiak deskubritzera, mendi-ibilbideak egitera, bide berdeak eta Donejakue bidea ezagutzera… Baina lasaitzeko aukera ere zabaltzen die: herri eta paisaia ederrak gozatzeko aukera, eta osasun- eta ongizate-jardueretan parte hartzekoa.

PEDALEI ERAGITEA: BIZKAIA EZAGUTZEKO BESTE MODU BAT

Era berean, Bizkaia osoa, kostaldea, barnealdea zein metropolia, bizikletaz ezagutzeko 16 ibilbidez osatutako katalogo bat ere aurkeztu da. Merkatu-nitxoak ere apustu estrategikoa dira Bilbao Bizkaia markarako; hala, eskaintza hau helburu jakin batekin destinoak bilatzen dituzten pertsonei bereziki zuzendutako produktu bat da.

Ibilbide horien barruan, nahitaez bisitatu beharreko baliabide turistiko guztiak nabarmentzen dira, eta zerbitzu osagarriei buruzko informazioa ere jasotzen da, bizikletarekin ezustekoren bat gertatuko balitz ere.

THE PLACE TO BE: EKITALDI HANDIAK

Bilbao Bizkaiak kultura-ekitaldiak hartzeko eta haietaz gozatzeko helmuga gisa ere aurkeztu nahi du bere burua. Hala, Xabier Ochandiano zinegotziak askotariko eskaintzen katalogo zabal bat aurkeztuko du FITUR-en. Eskaintza horiek ekitaldiei lotutako baliabide turistikoei balioa ematen diete, eta esperientzia turistiko globala ematen dute, nazioartean proposamen erakargarri eta lehiakorra eginez.

2024rako erakargarri nagusien artean, UEFA Women’s Champions League-ren finala da azpimarratzekoa. San Mamesen jokatuko da, maiatzaren 25ean; final historiko bat izango da, Europako emakumezkoen futbol-ekitaldi garrantzitsuena. Lehen lerroko nazioarteko ekitaldi horrek, gainera, gizonen eta emakumeen arteko berdintasunaren balio ukaezina berretsiko du, tradizioa eta modernitatea batzen diren ingurune batean, kirol-eta jai-giroan.

Gainera, Bilbao Bizkaiak zenbait proposamen ezagun ditu, eta, haien artean, azpimarratzekoak dira Bizkaiko hiriburuan egiten diren musika-jaialdiak, hala nola Bilbao BBK Live, Bilbao Blues Festival, BBK Bilbao Music Legends Fest eta BIME 2024.

Horiei gehitu behar zaizkie nazioarteko zinemako eskaintza, ZINEBI – Zinema Dokumental eta Film Laburren Nazioarteko Jaialdiaren eskutik, zeinak 66. edizioa izango baitu aurten, FANT fantasiazko zinemaren programa eta Zinegoak LGTBIQ+ zinemako eta arte eszenikoetako jaialdia.

Azkenik, Guggenheim Bilbao Museoa eta Arte Ederren Museoa protagonista nagusitzat dituzten erakusketa artistikoak daude, baita bisitariak beste inon topatuko ez dituen erakargarri turistiko eta herriko jai ugariak ere.

Eskaintza zabal horren ikuspegi bateratua emateko, katalogo bat sortu da “The Place to BE. 2024: Irabazteko lurraldea” izenburupean. Katalogo horretan, hauek biltzen dira, besteak beste: musika-panoramaren programazioa (Music); kirol-ekitaldiak (Sports); hitzordu eta jai tradizional eta errotuenak (Be basque); artea bere askotariko formetan (Arts); zinema letra larriz (Cinema), eta jaialdiak (On Stage). Eta hori guztia Bilboko eta Bizkaiko zenbait proposamen eta tokitan egiteko ekimen eta bisitaz osatzen da (A good Idea!).

MARKAK HAUSTEN

Bilbao Bizkaiak aurtengo berritasunak aurkeztuko ditu FITUR-en, 2023an aurreko sarrera eta ostatu-gauen erregistroak gainditu ondoren eta Bilbok inoiz baino bisitari gehien izan ondoren. Eustat-en datuen arabera, 2023ko urtarriletik azarora, uriak 1.149.698 turistaren bisita jaso zuen (goranzko joerari eutsiz, 2019an baino % 21,4 gehiago –pandemiaren aurreko urtea–), eta Bizkaiak jasotako bisita guztien % 66,8 pilatu zuen.

Nazioartean oihartzun handia duten ekitaldi handiak berreskuratu direnez, Bilbo munduko turismo-erreferentzia bihurtu da berriz ere, eta, gainera, turistek gero eta interes handiagoa dute Bizkaiko beste eremu batzuk ezagutzeko.

Turistaren profila honako hau da: 47,2 urte ditu batez beste, bikotean bidaiatzen du, errenta-maila ertaina du eta ostatu tradizionalaren alde egiten du. Jarduerei dagokienez, % 95ek baino gehiagok jarduera kulturalak eta gastronomikoak aukeratzen dituzte, eta 8,27ko balorazioa ematen diote helmugari. Turista horiek tokiko ekonomiaren zati handia dira.

Bestalde, datu horiek adierazten dute Bilbo kultura- eta sormen-turismoan nabarmentzen dela (Euskadiko kultura-turismoaren kontsumoaren % 25,7 pilatzen du).

FITUR, NAZIOARTEKO ERREFERENTZIAZKO TURISMO AZOKA

FITUR turismoko profesionalentzako topagune global bat da, eta merkatu hartzaile eta eskaintzailetarako azoka nagusia. 2023ko edizioak aurreikuspenik onenak gainditu zituen: 222.000 lagun bildu zituen (2022ko datuaren ia bikoitza).

2024ko edizioan, azokak berak emandako datuen arabera, 8.500 erakusketa-enpresak baino gehiagok hartuko dute parte, eta 136.000 profesionalek baino gehiagok eman dute dagoeneko izena. Azokak Madrilgo IFEMAko zortzi pabiloi hartuko ditu, eta 130 herrialderen baino gehiagoren turismo-eskaintza bilduko du.

Bilbao Bizkaia nazioarteko hitzordu horretan egongo da, 2030erako Turismo Estrategiari erantzunez. Estrategia horren helburuak dira jasangarritasuna, digitalizazioa eta berrikuntza, bisitariak erakartzeko eta pertsona guztien ongizatean eragingo duen sektore lehiakorragoa eta ingurunearekiko errespetutsuagoa garatzeko funtsezko elementu gisa.

by

  • Ekainetik irailera bitartean, 454.828 turistek bisitatu zuten Bilbo, 2022ko denboraldi berean baino % 3,6 gehiagok (urte hartakoa izan zen serie historikoaren daturik onena ordura arte).

  • Gaualdiek gora egin dute, 916.198 gaualdira iristeraino, hau da, iazko ekainetik irailera bitartean izandako zifra baino % 6,4 gehiago. Hotel-sarreretan gora egiten jarraitzen du atzerritik etorritako pertsonen kopuruak (40.000).

  • Bilbok hoteletako plazak gehitu ditu (87 hotel, eguneko 10.123 plazarekin), baita apartamentu turistikoenak ere (25 enpresa-establezimendu eta 1.433 plaza eguneko).

  • Bilbok beste errekor historiko bat erregistratu du berriz ere udako turismo-helmuga gisa. Halaxe egiaztatzen dute joan den udan lortutako zifrek, ekaina, uztaila, abuztua eta iraila barne, non berriz ere uriak bere historiako bisitari gehien izan baitu.Xabier Ochandiano Bilboko Udaleko Garapen, Merkataritza, Enplegu eta Turismoko zinegotziak datu horiek guztiak eman ditu gaur prentsaurrekoan. Datu horiek agerian jartzen dute “udalak Aldundiarekin eta turismo-eragile guztiekin batera egiten duen lana, hiria helmuga erakargarria eta kalitatezkoa izan dadin”.

    Eustatek emandako datuak aztertu ondoren, azaldu du aurtengo ekainetik irailera bitartean 454.828 turisten bisita jaso zuela hiriak. “Horrek esan nahi du 2022ko aldi berean baino % 3,6 gehiago direla, orduan lortu baitzen serie historikoaren markarik onena, 438.973 bisitarirekin”.

    Nazioarteko oihartzuna duten ekitaldi handiak eta beste hitzordu batzuk erakartzen eta garatzen ari gara, hala nola Aste Nagusia, 1,8 milioi pertsona baino gehiagorekin, Bilbao BBK Live eta Bilbao Blues Festival jaialdiak, kirol probak (Tourra), bai eta hainbat esparrutako kongresu ugari eta garrantzitsuak ere. Horrek guztiak Bilbo turismo urbanoaren nazioarteko erreferente bihurtzen du.

    Bestalde, hotel-establezimenduetako gaualdien kopuruak ere gora egin du aurreko urtearekin alderatuta. Zehazki, 2022an 861.471 izatetik 2023an 916.198 izatera igaro dira: % 6,4ko gehikuntza.

    Bilboko hotel-establezimenduetako gaualdien hazkunde-indize hori Bizkaikoa (% 5,8) baino handiagoa da. Ildo horretan, uriak Bizkaiko bisitarien % 66,9 biltzen du, eta EAE osoa hartuz gero, % 30,2.

    ATZERRIKO JATORRIA

    Hoteletara doazen bisitarien jatorriari dagokionez, atzerritik etorritakoak iaz 234.156 izatetik 2023an 274.156 izatera igaro dira; hau da, % 17,1 gehitu dira. Kopuru horiek erakusten dute hirian hazten ari den kolektibo bat dela.

    Estatuko bisitari gutxiago egon dira hoteletan: aurtengo ekainaren eta irailaren artean 180.672 etorri dira, % 11,8 gutxiago, baina aldi berean *apartamentu turistikoetako egonaldiak areagotu dira: 10.838 pertsona eta 25.236 gaualdi.

    Atzerriko turismoan, Frantziatik datoz oraindik ere bisitari gehien Bilbora, Alemaniatik, Estatu Batuetatik eta Erresuma Batuetatik baino gehiago. Bestalde, Estatuaren barruan, hirian ostatu hartzen duten pertsonen jatorriaren rankingean Madrilgo komunitatea da lehenengoa, alde handia atereaz Katalunia, Andaluzia eta EAEri.

    HOTEL-PLAZA GEHIAGO ETA ERRENTAGARRITASUN HANDIAGOA

    Azkenik, kontuan hartu beharreko datua da hotel-plazen gorakada. 2019an (pandemia baino lehen), Bilbok egunean 8.580 plaza zituen 79 hotel-establezimendutan banatuta. Udako hilabete hauetan, aldiz, Bizkaiko hiriburuak 10.123 plaza izan ditu egunean, 87 establezimendutan.

    Gainera, gela bakoitzaren batez besteko errentagarritasuna ere hazi da, % 18,9, 2022ko 91,62 eurotatik 2023ko udako 108,92 eurotara igaroz. Bisitarien batez besteko egonaldia zertxobait hazi da, iaz 1,96 gaualdi eta aurten 2,01 gaualdi eginez; eta 2,08 gaualdi atzerriko turismoaren kasuan.

    Kategorien arabera, estatuko eta nazioarteko turismoak 3 izar edo gehiagoko hotelak aukeratzen ditu (plazen % 76,8).

    TURISMO BULEGOAK

    Bestalde, Bilboko turismo-bulegoek 133.201 aurrez aurreko bisitariak erregistratu zituzten ekainetik irailera bitarteko lau hilabeteetan. Horietatik % 57,7 nazioartekoak izan ziren, % 32,2 estatukoak eta % 10,1 EAEkoak.

    Atzerriko bisiten jatorriari dagokionez, rankingaren buruan Frantzia dago (% 12), ondoren Erresuma Batua (% 10,65), Alemania (% 7,53), Italia (% 4,76), AEB (% 4,06) eta Herbehereak (% 3,42). Estatuko bisiten artean, Madril nabarmentzen da (% 7,8), eta ondoren Katalunia (% 6,15), Andaluzia (% 4,71) eta Valentziako komunitatea (% 3,48).

    *  APARTAMENTU TURISTIKOAK

    Apartamentu turistikoak (EZ ETXEBIZITZA TURISTIKOAK) enpresa-establezimenduak dira, alojamendu-unitatez osatuak. Multzo independente gisa eskaintzen dira, eta aldi baterako ostatu ematera bideratzen dira, profesionalki, ostatu hartzen duen pertsonaren bizilekua aldatzera iritsi gabe.

    Modalitate hori gero eta bisitari gehiago izaten ari da Bilbon, batez ere estatuan.

    SARE SOZIALAK:

by

  • BBK Bilbao Music Legends Festak ziurtatuta du DEEP PURPLE, CANNED HEAT, THE SCREAMIN’ CHEETAH WHEELIES eta SUSAN SANTOSen parte-hartzea, 2024ko ekainaren 14an eta 15ean egingo den zazpigarren ediziorako

BBK-k eta Bilboko Udalak babestutako eta Dekker Eventsek antolatutako jaialdia Bilbao Arenan egingo da. Lehenbiziko bonuak salgai daude jada, merkaturatze-sustapen berezi batean: 80 € + gastuak (kopuru mugatua).

Hard rockaren aitzindari eta inoizko banda onenetako bat, DEEP PURPLE, ibilbide geldiezineko taldea, BBK BILBAO MUSIC LEGENDS FESTaren zazpigarren ediziorako ziurtatutako lehen kartelburua da. Rockaren kulturaren zenbait doinu klasiko bikainen egileak dira, eta hainbat belaunalditako jarraitzaileak erakartzea lortu dute. Orain, baieztatu dute “Legends” jaialdiaren agertokian egongo direla; hartara, bertaratzen direnek rock onenaren saio batez gozatzeko aukera izango dute. 150 milioi disko baino gehiago saldu eta mundu osoko estadioak bete dituzte zenbait hamarkadatan zehar, eta, beraz, ez da harritzekoa Planet Rock britainiar irratiak “historiako 5. talderik garrantzitsuena” izendatu izana.

Britainiarrekin batera, “Legends”-ean joko du, halaber, CANNED HEATek, 1965ean Los Angelesen sortutako blues-rock/boogie talde ospetsuak. Hala, berriz programatuko da iazko edizioko kontzertua. Nashvilletik (Tennessee) etorrita, eta aurten egindako biran sarrera guztiak saldu ostean, Mike Farrisen taldea, THE SCREAMIN’ CHEETAH WHEELIES, jaialdian arituko da bere rock klasiko eta kementsuarekin, 2024an Espainian egingo duen emanaldi bakarrean. Azkenik, SUSAN SANTOS power trioa dugu, Susan bera buru. Blues-rock onena jotzen duen talde hori dugu ziurtatutako lehen multzo honetako atzena.

BILBAO ARENAN

BBK BILBAO MUSIC LEGENDS FESTa Bilbao Arenan egingo da, 2024ko ekainaren 14an eta 15ean. Ondo finkatutako jaialdiak, berriz ere ekarriko digu urtero askotariko entzuleak biltzen dituen musika-eskaintza, nazioartean, nazio barruan eta gurean ospea duten eta adin guztietako musikazaleak Miribillaraino erakarriko dituzten artistekin.

Sarrera doakoa da 14 urteetara arte (adin hori barne), eta giroa belaunaldi askorentzat egokia izatea da helburua. Hala, jaialdia Bilbo ikuspuntu kultural zein sozialetik aberasteko zutabeetako bat da, eta haren balioak sendotzen ditu, kultur agertoki bizi eta irmo gisa.

Gainera, aurreko edizioetan bezala, jaialdiak musika-eskaintza dibertsifikatzen lagunduko du, beste behin ere tokiko artistek jardungo baitute Voodoo Child terrazan (Bilbao Arenaren kanpoaldean). Aire zabaleko eremu horretan aukera gastronomiko askotarikoa eta zabala egongo da, tokiko eskaintza eta guzti, eta jaialdiaren merchandising ofizialaren salmenta-gune bat ere jarriko da.

Antolatzaileek hurrengo edizioaren kartela osatuko duten izen gehiago iragarriz joango dira, nazioarteko mito handiak hartu dituen jaialdia egiteko: Van Morrison, The Beach Boys, Jeff Beck, Steve Winwood, Jethro Tull, Bob Geldoff, Nina Hagen, Mavis Staples, John Cale, Steven Van Zandt, Graham Nash, Paul Carrack, Status Quo eta Chris Isaak, besteak beste.

Jaialdira joan nahi dutenek bi eguneko bonua eskuratu dezakete dagoeneko, Kutxabanken bidez edo jaialdiaren webgune ofizialean (www.musiclegendsfestival.com), merkaturatze-prezio berezian: 80 € gehi gastuak (kopuru mugatua).

by

  • Bizkaiko Foru Aldundiko eta Bilboko Udaleko turismoaren arloko zenbait profesionalek, tokiko 18 enpresarekin batera, sustapen-topaketa batean parte hartuko dute bihar, martitzena, Zurich hirian. Bertan, Suitzako 70 agente eta tour-operadore baino gehiago biltzea espero da.

  • Horrela, berriro hasiko da bi erakundeek urtean zehar antolatzen duten workshop-zikloa, Bilbao Bizkaia erakargarria izatea eta kanpoko merkatuan lotura komertzialak izatea sustatzeko programatzen dena.

Bilboko Udaleko eta Bizkaiko Foru Aldundiko Turismoko talde teknikoak topaketa profesional berri bat egingo du bihar, martitzena, Suitzako Zurich hirian, Bilbao Bizkaia turismo-jomuga gisa sustatzeko eta merkataritza-loturak indartzeko.

Oraingo honetan, tokiko 18 enpresak ere parte hartu dute bidaian: horietatik 14 ostatuen sektorekoak dira (hotelak, elkarteak…), eta beste 4 agentziak. Gainera, bi hirien artean zuzeneko lotura eskaintzen duen Vueling hegazkin-konpainiaren ordezkariek ere hartuko dute parte.

Workshop berri honetan, Suitzako 70 eragile inguru biltzea espero da, eta Bilbao Bizkaia-ren aurkezpen zabala eskainiko zaie, hiri kultural gisa dituen lehentasunezko ardatzen eta ikonoen inguruan (museoak…), eta baita arlo hauetan ere: gastronomia, ibilbideak, paisaiak, merkataritza, kirolak, Athletic esperientzia…hori guztia, zuzeneko euskal musika eta dantza tradizionalez lagunduta.  Aldi berean, negozio-bilerak egingo dira Zurichen, turismo-eragile horiekin enpresa-harremanak ezartzeko edo, hala badagokio, indartzeko.

Jomugaren esperientzia bizia eta iradokitzailea lortzeko, nobedade gisa, Bilboko Txistularien Banda ere joango da ordezkariekin, topaketa girotzeko eta gure kulturaren eta nortasunaren musika- eta dantza-errepertorio bat aurkezteko. Errepertorio horretan, gainera, gure gastronomia oinarri duen afari bat eskainiko da, 0 kilometroko produktuekin.

TOPAKETA BERRIAK

Topaketa berri honekin, Aldundiko eta Bilboko Udaleko ordezkariek hasiera eman diote udagoieneko denboraldiari, Bilbo eta Bizkaia atzerrian sustatzeko topaketen zikloarekin. Aurten, hainbat intentsitate-maila ezarri dira sustapen-ekintzetan, bost irizpideren arabera:

  • Merkatu bakoitzak Bilbao Bizkaiari ematen dion bisitari-kopurua, termino absolutuetan.
  • Merkatu horretako sarreren eta gaualdien hazkundea urtean zehar.
  • Herrialde bakoitzarekin aireko konektibitatea areagotzea, bai maiztasunari dagokienez, bai plaza kopuruari dagokionez.
  • Merkatu bakoitzaren errentagarritasunaren azterketa, herrialde bakoitzeko turistek gure lurraldean egiten duten batez besteko gastuari eta erosteko ahalmenari lotuta.
  • Eta azken urteotan ezarritako harreman komertzialetan edo instituzionaletan antzemandako aukerak.

Suitzan 2023an jarduketa ugari egingo direla aurreikusi da, baita Irlandan, Ameriketako Estatu Batuetan eta Herbehereetan ere.  Beste merkatu batzuetan –Frantzian, Alemanian, Erresuma Batuan, Italian, Portugalen eta Belgikan- ekintzak intentsitate ertainarekin egin dira, eta intentsitate txikiagoarekin Danimarkan, Norvegian, Suedian, Finlandian eta Baltikoko herrialdeetan, hegazkin bidezko konexio berriak direla eta.

Urtea amaitzeko falta diren hilabeteetan Londresko turismo-azoka (World Travel Market), Valladolideko Barne Turismoko Azoka (INTUR) eta Canneseko ILTM luxuaren segmentuko turismo-azoka daude aurreikusita. 2023a Stockholmen, Italian eta Mexiko hiriko amerikar merkatuetan bitartekaritza turistikora zuzendutako beste ekintza profesional batzuekin amaituko dugu.

by

  • Aste Santuan kultura-jardueren eskaintza zabal bat egongo da Bilbon, besteak beste, dantza, monologoak, kaleko antzerkia edo erromeriak. Bilbao basque FEST apirilaren 5etik 9ra ospatuko da

  • Kukai Dantza konpainiaren “Gelajauziak (fragments)” ikuskizun zirraragarria edo Lekittoko Deabruak taldearen “Akelarre” ikuskizuna izango dira Gasaren plazan; “Humor & Basque” zikloko monologoak Bilborocken; Trapu Zaharra konpainiaren “Turisteando” kale-antzerki barregarria Erripa kaian, edo Bilboko anfitrioien ibilbide antzeztuak Alde Zaharretik eta Mirentxu eta Begotxurenak itsasadarretik. Horiexek izango dira bederatzigarren edizio honetako unerik magikoenetako batzuk.

  • Gainera, euskal kulturako jaialdiak 200 jarduera baino gehiago eskainiko ditu, doakoak eta publiko guztientzat, hiriko 30 bat espaziotan banatuta. Jarduerek, besteak beste, gastronomiarekin, herri kirolekin, musikarekin edo zinemarekin zerikusia izango dute. Bilbao Basque FEST jaialdiaren bidez, hiria jarduera ekonomikorako eta bisitariak erakartzeko gune finkatu da, Bilbo dinamizatzeko eta Aste Santuan bertako merkataritza eta ostalaritza indartzeko.

Apirilaren 5etik 9ra, Bilbao basque FEST jaialdiaren bederatzigarren edizioa antolatuko da hiribilduan. Aurten ere, KULTURA izango da elementu garrantzitsuenetako bat Aste Santuan milaka turista erakarri eta bilbotarrei hiriaz gozatzeko aukera ematen dien jaialdi arrakastatsu honetan.

Gasaren plaza eta Bizikidetasun plaza izango dira dantzak Bilbao basque FEST jaialdiaren ibilbideari ekiteko aukeratu dituen agertokiak. Hori horrela, ostegunean, apirilak 6, Kukai Dantza taldearen Gelajauziak (fragments) ikuskizun zirraragarria eskainiko da 20:30ean. Ikuskizunean eszena garaikideko bi artista handi bilduko dira: Jon Maya eta Cesc Gelabert. Bi dantzariek dantza klasikoaren kontzeptuak berrikusi dituzte gaur egungo ikuskizun bat sortzeko, Néstor Barrenetxearen eszenografiarekin, zeinak bi MAX sari jaso zituen, besteak beste.

Agertoki berean baina egun bat beranduago, ostiralean, apirilak 7, Lekittoko Deabruak taldeak ikusleak hipnotizatuko ditu Akelarre ikuskizunaren mugimendu erritmikoekin. Bertan, belagileek, sorginek eta Akerbeltz pertsonaiak arbasoen zeremonia hori ospatuko dute musika, sua eta piroteknia uztartuko dituen koreografia batekin.

Beste alde batetik, Isozaki Dorreek inguratzen duten Bizikidetasun plaza agertoki bikaina izango da Kresala Dantza Taldearen body-art eta dantza ikuskizunaz gozatzeko apirilaren 7an, ostirala, 19:30ean. Talentua eta energia uztartuko dira Aztarnak izenburua duen lanean, eta dantza eta pintura nahastuko dituen aparteko erakustaldia izango da.

Beste estilo batekin, Sekai konpainiak Breaking Beethoven lana aurkeztuko du agertoki berean, larunbatean, apirilak 8, 19:30ean. Lan horretan, ospe handiko musikari alemaniarraren konposizioak, break dance estiloa eta dantza garaikidea batuko dira ikuskizun bakarrean, eta ez du inor epel utziko.

ERRITMOA ETA JAI-GIROA ERROMERIETAN

Bilbao Basque Fest jaialdiaz dantzatzen gozatu nahi duten pertsonek, hain zuzen ere, egunero egin ahal izango dute Gasaren plazan 19:00etan, erromerietan. Hasiberriak eta eskarmentudun dantzariak bilduko dira bertan euskal dantzak ikasteko asmoz. Ortzadar, Lorratz eta Gaztedi Dantzari Taldea arduratuko dira betiko musika jotzeaz, ikusleak dantzan jartzeko asmoz.

Urtero bezala, tontor ospetsuenetako batera iritsiko da jaialdia: Artxanda Bilbao basque FEST jaialdiaren azken egunean, igandea, apirilak 9, milaka pertsona bilduko dira 12:00etan Inguma Dantza Taldearekin. Taldeak gure betiko dantzen pausoak erakutsiko dizkie bertaratzen diren guztiei, sagardoa eskuan dutela, euskal folklorearen atalik garrantzitsuenetako batez gozatu dezaten.

BARREZ LEHERTZEKO EUSKAL UMOREA BILBOROCKEN ETA ERRIPA KAIAN

“Euskal zigilua” duten barrez lehertzeko antzerkiak Bilborock jaialdiko arratsaldeak eta Erripa kaia bizituko ditu. Hala, “Humor and Basque” Bilborockera itzuliko da ostegunean, apirilaren 6an, 20:00etan, “Kiero ser vasco, palabra de catalán” lanarekin, Raül Supervia komikoarena. Katalunian jaio arren, komikoak euskaldun izateko baldintza guztiak betetzen ditu.

Ostiralean, apirilaren 7an, Kolektibo Monstrenkoren txanda helduko da, eta “Espejismo” taularatuko du. Antzezlanak zuzeneko musika testu “epiko” eta poetikoekin konbinatuko du, umorea galdu gabe.

Azkenik, larunbatean, apirilaren 8an, María Urzelai, Getari Etxegarai eta Leire Orbe aktoreek ikus-entzuleen barre-algarak piztuko dituzte, “Los cuatro elementos” interpretazioarekin, Ibon Belandia musikariarekin batera. Lekua bete arte egongo dira eserlekuak.

Umore-eskaintzak ere bere lekua izango du Erripa kaian ostegunean, apirilaren 6an, 18:00etan, Trapu Zaharra konpainiaren “Turisteando” kale-antzerki barregarriarekin. Roulotte batetik abiatuko den tramak etxekoandre bat du protagonista. Etxekoandreak itsas bidaia birtual bat irabazten du, eta horri esker irudimena hegan egiten uzten ahal du eta fantasia oso ezohikoak bete.

BILBAO BASQUE FEST JAIALDIAREN KLASIKOAK

Bilboko anfitrioiak Alde Zaharretik ibiliko dira eta Mirentxu eta Begotxu, berriz, itsasadarretik. Bilbao basque FEST jaialdiaren protagonista handiak izango dira.

Bilboko anfitrioiak klasikoek hiribilduaren historiaren berri emango digute modu berezi, atsegin eta dibertigarri batean San Antongo elizan hasiko diren ibilbide antzeztuetan, ostegunean, ostiralean eta larunbatean, apirilak 6, 7 eta 8, 12:00etatik aurrera. Alde Zaharreko kale nagusietatik eta Areatzatik ibiliko dira, eta istorio zirraragarriak eta gutxi ezagutzen diren berezitasunak kontatuko dizkigute.

Bestalde, Mirentxu eta Begotxurekin ere beste ibilbide oso berezi bat egin ahal izango dute Bilboats itsasontzian Bilboko itsasadarretik. Bikote komikoak Frantziako Tourraren etapa guzti-guztiak hiribilduan egitea defendatuko du; izan ere, Tourraren hasierako etapa Bilbon izango da aurten. Lagun dibertigarriek ondo pentsatu dute dena: maskota, instalazioak eta inaugurazio-zeremonia, bai eta hiribilduaren ezaugarri arkitektonikoetan eta tradiziorik bilbotarrenetan oinarritutako txapelketako etapa berriak ere. Hori guztia Frantziako Tourra Bilboko Tour bihurtu dadin lortzeko.

Ibilaldi antzeztuak ostegun, ostiral eta larunbatean —apirilak 6, 7 eta 8— egin ahal izango dira 11:30ean, 12:30ean, 13:30ean, 16:30ean, 17:30ean eta 18:30ean. Txartelak (3 euro) Bilboatsen Pio Baroja plazako bulegoan eta webgune honetan daude eskuragarri: www.bilboats.com.

BILBAO BASQUE FEST ZIFRETAN

Bilbao Basque FEST euskal kulturako jaialdia, apirilaren 5etik 9era bueltan izango dugu, Bilboko Udalak antolatutako 200 jarduera baino gehiagorekin. Jaialdiak sei gai (Gourmet, Kultura, Musika, Market, Zinema eta Sport) izango ditu hiriko 30 bat espaziotan zehar.

Bilbao Basque FEST jaialdia Euskal nortasun kutsua duen kultura eta aisialdi proposamena da eta hiria jarduera ekonomikorako eta bisitariak erakartzeko gune gisa finkatzea lortu du, Bilbo dinamizatzeko eta Aste Santuan bertako merkataritza eta ostalaritza indartzeko.

360 jatetxe, taberna, merkataritza, denda espezializatu… parte hartuko dute 230 artista baino gehiago barne hartzen dituen eta 150 pertsonari baino gehiagori lana emango dien edizio honetan, jaialdia ekoizteko eta gauzatzeko..

Jendeak honako jarduera hauetaz gozatzeko aukera izango du, besteak beste: musika, dantza eta antzerkiko 69 ikuskizun, euskal kiroleko 25 jarduera eta zero kilometroko produktuen 900 dastatze espres eta 400 tailer gastronomiko txiki baino gehiago.

Gainera, Bilboko Udalak euskarazko, gaztelaniazko, ingelesezko eta frantsesezko 15.000 informazio liburuxka banatuko ditu, jarduerei eta ordutegiei buruzko xehetasun guztiekin eta herritarrentzako informazio erabilgarriarekin.

Hemen duzu Aste Santuan Bilbon Bilbao basque FEST jaialdiaz gozatzeko behar duzun informazio guztia eta programa osoa: basquefest.bilbao.eus.

SARE SOZIALAK:

#BilbaoBasqueFEST